ព័ត៌មានអន្ដរជាតិ

ប្រមុខ UN៖ តំបន់ហ្គាហ្សា គឺជា «វាលពិឃាដ» ដូច្នេះពិភពលោក ត្រូវធ្វើសកម្មភាពទប់ស្កាត់អ៊ីស្រាអែល

បានផុស

១ year មុន

នៅ

ថ្ងៃពុធ ៩ មេសា ២០២៥

ដោយ

តាមការចេញផ្សាយរបស់ BBC នៅថ្ងៃទី០៩ខែមេសា, អគ្គលេខាធិការអង្គការសហប្រជាជាតិលោក Antonio Guterres បាននិយាយកាលពីថ្ងៃអង្គារថា «ហ្គាហ្សាគឺជាវាលពិឃាត ហើយជនស៊ីវិលស្ថិតនៅក្នុងរង្វង់មរណៈគ្មានទីបញ្ចប់» ខណៈអ៊ីស្រាអែលបិទច្រកនាំចូលទំនិញទាំងអស់ និងបន្តសង្រ្គាមប្រឆាំងក្រុមហាម៉ាស។

ការអត្ថាធិប្បាយរបស់លោក Guterres កើតឡើងបន្ទាប់ពីប្រធានទីភ្នាក់ងារចំនួនប្រាំមួយរបស់ UN ដូចជា OCHA,WFP, UNICIEF, WHO,Unrwa និងUNOPS បានអំពាវនាវដល់មេដឹកនាំពិភពលោកឱ្យចាត់វិធានការជាបន្ទាន់ដើម្បីធានាថា ស្បៀងអាហារ និងការផ្គត់ផ្គង់នានា បានទៅដល់ប្រជាជនប៉ាឡេស្ទីននៅហ្គាហ្សា។

ថ្លែងប្រាប់អ្នកសារព័ត៌មាន លោក Guterres និយាយថា អ៊ីស្រាអែល មានកាតព្វកិច្ចនៅក្រោមច្បាប់អន្តរជាតិ ដើម្បីធានាថាស្បៀង និងការផ្គត់ផ្គង់ផ្នែកវេជ្ជសាស្រ្តបានដល់ប្រជាជនរងគ្រោះ។

យ៉ាងណា ឆ្លើយតបនឹងការអត្ថាធិប្បាយនេះ ក្រសួងការបរទេសអ៊ីស្រាអែលអះអាងថា មិនមានការខ្វះខាតជំនួយនៅហ្គាហ្សាទេហើយថែមទាំងចោទលោក Guterres ថា កំពុងបង្ខូចកេរ្តិ៍ឈ្មោះអ៊ីស្រាអែលទៀតផង។

គួររម្លឹកថា អ៊ីស្រាអែលបានបិទផ្លូវដឹកទំនិញនិងជំនួយនៅហ្គាហ្សាតាំងពីថ្ងៃទី២មីនាមកម្ល៉េះ បន្ទាប់ពីបទឈប់បាញ់ដំណាក់កាលដំបូងផុតកំណត់។ ចំណែកក្រុមហាម៉ាស ក៏បដិសេធបន្តបទឈប់បាញ់ និងចោទប្រកាន់អ៊ីស្រាអែលថាមិនគោរពការប្តេជ្ញាចិត្តរបស់ខ្លួន។

បន្ទាប់មក អ៊ីស្រាអែល ក៏ចាប់ផ្តើមបើកប្រតិបត្តិការទម្លាក់គ្រាប់បែកនិងវាយលុកជើងគោកឡើងវិញ នៅថ្ងៃទី១៨ខែមីនា ហើយចាប់តាំងពីពេលនោះមក បានសម្លាប់ពលរដ្ឋប៉ាឡេស្ទីន ១ ៤៤៩ នាក់ប៉ុន្តែយោធាអ៊ីស្រាអែលនៅតែទទូចថា ខ្លួនមិនបានកំណត់គោលដៅលើជនស៊ីវិលនោះទេ។

សូមជម្រាបជាថ្មី អំឡុងការផ្អាកប្រយុទ្ធក្នុងរយៈពេលពីរខែនៃបទឈប់បាញ់ដំណាក់កាលដំបូង, គេឃើញមានការដឹកជំនួយមនុស្សធម៌កាន់តែច្រើនចូលទៅក្នុងតំបន់ហ្គាហ្សា ក៏ដូចជាការដោះលែងចំណាប់ខ្មាំងពីក្រុមហាម៉ាសចំនួន ៣៣នាក់ផងដែរ៕