Matic ព្រលះអ្នក​ចាំទី​ Onana ធ្ងន់ៗជា​អ្នកចាំ​ទី​អន់បំផុតក្នុងប្រវត្តិសាស្ត្រ Man United

អ្នកចាំទីរបស់ Manchester United កីឡាករ Andre Onana ត្រូវបានអតីតខ្សែបម្រើក្លិបកីឡាករ Nemanja Matic ព្រលះធ្ងន់ៗ មុនការប្រកួតរវាងក្រុមបិសាចក្រហម ទល់នឹង Olympique Lyon ក្នុងពាន Europa League កាលពីថ្ងៃ ព្រហស្បតិ៍ ទី ១០ យប់មិញ។

មុនពេល Man UTD ធ្វើដំណើមកកាន់ទឹកដី បារាំង ជួបតទល់នឹងក្រុមម្ចាស់​ផ្ទះ​ Olympique Lyon នៅកីឡដ្ឋាន Parc Olympique Lyonnais ជើងទី ១ វគ្គ ៨ ក្រុមចុងក្រោយពាន UEL អ្នកចាំទី Onana បាននិយាយថា ៖ «ជាការពិតណាស់ វានឹងមិនងាយស្រួលទេ ប៉ុន្តែខ្ញុំគិតថា ពួកយើងជាក្រុមល្អជាងពួកគេ»។

ដោយសារពាក្យសម្តីនេះ បានធ្វើឱ្យ Matic ដែលជាខ្សែបម្រើក្រុម Lyon បច្ចុប្បន្នមានការច្រឡោតជាខ្លាំង ដោយរូបគេបានឆ្លើយតបទៅវិញថា៖ «ដោយសារអ្នកជាអ្នកចាំទីអន់បំផុតក្នុងប្រវត្តិសាស្ត្រ Manchester United ដូច្នេះអ្នកត្រូវប្រុងប្រយ័ត្ន ចំពោះអ្វីដែលអ្នកកំពុងនិយាយ។ ប្រសិនបើជា David de Gea, Peter Schmeichel ឬ Edwin van der Sar និយាយបែប​នេះ​ ខ្ញុំនឹងដាក់ជាសំណួរសួរ​មកខ្លួនឯង ប៉ុន្តែប្រសិនបើអ្នក ជាអ្នកចាំទី ដែលមានស្ថិតិអន់បំផុតក្នុងប្រវត្តិសាស្ត្រ Manchester United ក្នុងសម័យ​នេះទេ ដូច្នេះអ្នកត្រូវការបង្ហាញឱ្យគេឃើញជាមុនសិន មុនពេលអ្នកនិយាយ»។

យ៉ាងណាមិញ ក្រោយបញ្ចប់ការប្រកួត Onana បានទទួលរងការរិះគន់ពីសំណាក់អ្នកគាំទ្រជាខ្លាំង បន្ទាប់ពីរូបគេរបូតគ្រាប់បាល់ ២ គ្រាប់ ជាពិសេសការចាប់បាល់ក្រឡកនៅចុងម៉ោង ជាហេតុធ្វើឱ្យ Lyon តាមស្មើក្នុងលទ្ធផល ២ ទល់នឹង ២៕

ប្រែសម្រួលអត្ថបទ៖ សេម កុសល
ប្រភព៖ beIN SPORTS