ព័ត៌មានអន្ដរជាតិ

លោក Rubio បញ្ជាក់ថា អាមេរិក-អ៊ីរ៉ង់នឹងជួបមុខគ្នាផ្ទាល់នៅប្រទេសអូម៉ង់

បានផុស

១ year មុន

នៅ

ថ្ងៃសុក្រ ១១ មេសា ២០២៥

ដោយ

Chheang

រដ្ឋមន្ត្រីការបរទេស លោក Marco Rubio បានបញ្ជាក់ថា សហរដ្ឋអាមេរិក និងអ៊ីរ៉ង់ គ្រោងនឹងធ្វើកិច្ចចរចានុយក្លេអ៊ែរ«ដោយផ្ទាល់»នៅថ្ងៃសៅរ៍សប្ដាហ៍នេះ នៅប្រទេសអូម៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន Firstpost នៅថ្ងៃទី១១ខែមេសាឆ្នាំ២០២៥ កិច្ចពិភាក្សានេះ នឹងមានការចូលរួមពីបេសកជនពិសេសរបស់សហរដ្ឋអាមេរិក លោក Steve Witkoff និងរដ្ឋមន្ត្រីការបរទេសអ៊ីរ៉ង់ លោក Abbas Araghchi ក្នុងគោលបំណងដោះស្រាយការព្រួយបារម្ភអំពីកម្មវិធីនុយក្លេអ៊ែររបស់ទីក្រុងតេហេរ៉ង់។

លោក Rubio បាននិយាយថា៖ «យើងសង្ឃឹមថា វានឹងនាំទៅរកសន្តិភាព។ យើងប្រាកដណាស់ដែលអ៊ីរ៉ង់នឹងមិនមានអាវុធនុយក្លេអ៊ែរ ហើយខ្ញុំគិតថានោះជាអ្វីដែលនាំឲ្យមានកិច្ចប្រជុំនេះ»។

ប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទបានធ្វើសេចក្តីប្រកាសដ៏គួរឲ្យភ្ញាក់ផ្អើលមួយថា អាមេរិក និងអ៊ីរ៉ង់បានត្រៀមខ្លួនរួចជាស្រេច ដើម្បីចាប់ផ្តើមកិច្ចចរចាដោយផ្ទាល់ស្តីពីកម្មវិធីនុយក្លេអ៊ែររបស់ទីក្រុងតេហេរ៉ង់ ដោយព្រមានថា អ៊ីរ៉ង់នឹងជួប«គ្រោះថ្នាក់ធំ» បើកិច្ចចរចាមិនទទួលបានជោគជ័យ។

សេចក្តីប្រកាសនេះ បានធ្វើឲ្យមានការយល់ច្រឡំមួយចំនួន ដោយសារតែភាគីអ៊ីរ៉ង់បានអះអាងផ្ទុយថា កិច្ចចរចានឹងមានលក្ខណៈប្រយោលដោយមានប្រទេសអូម៉ង់ជាអន្តរការី ដើរតួជាអ្នកសម្រុះសម្រួល ពោលគឺមិនមែនជាការប្រជុំដោយផ្ទាល់នោះទេ។

លោក ត្រាំ បានគំរាមម្ដងហើយម្ដងទៀតក្នុងការប្រើប្រាស់កម្លាំងយោធា បើអ៊ីរ៉ង់មិនយល់ព្រមបញ្ចប់កម្មវិធីនុយក្លេអ៊ែររបស់ខ្លួន ដោយបញ្ជាក់ច្បាស់ៗថា អ៊ីស្រាអែលនឹងត្រូវដឹកនាំសកម្មភាពយោធាប្រឆាំងនឹងអ៊ីរ៉ង់៕

ដោយ៖ ឈាង

ចុចអាន៖ យន្តហោះទម្លាក់គ្រាប់បែកអាមេរិក៦គ្រឿងទៅដល់មហាសមុទ្រឥណ្ឌា មុនកិច្ចប្រជុំជាមួយអ៊ីរ៉ង់