នគរបាលខណ្ឌកំបូល ចុះធ្វើអត្តសញ្ញាណប័ណ្ណសញ្ជាតិខ្មែរ ជូនចាស់ជរា និងស្ត្រីមានផ្ទៃពោះ​៣០០នាក់ដល់មូលដ្ឋាន

ដើម្បីសម្រួលសេវារដ្ឋបាលដល់ប្រជាពលរដ្ឋដែលជាជនចាស់ជរា និងស្ត្រីមានផ្ទៃពោះដែលលំបាកក្នុងការធ្វេីដំណេីរ​មក​ថតអត្តសញ្ញាណប័ណ្ណសញ្ជាតិខ្មែរ មន្ត្រីនគរបាលនៃអធិការដ្ឋាននគរបាលខណ្ឌកំបូល នៅព្រឹកថ្ងៃទី២៧ ខែមេសា ឆ្នាំ ២០២៥នេះ បានចុះធ្វើអត្តសញ្ញាណប័ណ្ណ ដែលជិតផុតសុភលភាព និងថតថ្មី ជូនប្រជាពលរដ្ឋសរុប៣០នាក់ ស្ថិតនៅភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ហុង ពិសិដ្ឋ អធិការនៃអធិការដ្ឋាននគរបាលខណ្ឌកំបូល បានអោយដឹងថា ការចុះធ្វើអត្តសញ្ញាណប័ណ្ឌសញ្ជាតិខ្មែរជូនពលរដ្ឋដល់មូលដ្ឋាននេះ ធ្វើឡើងតាមការសំណូមពរពីប្រជាពលរដ្ឋ ឱ្យសមត្ថកិច្ចចុះថតអត្តសញ្ញាណបណ្ណសញ្ជាតិខ្មែរចល័តតាមមូលដ្ឋាន។ ការចុះថតអត្តសញ្ញាណប័ណ្ណដល់មូលដ្ឋាននេះ គឺដេីម្បីសម្រួលដល់ប្រជាពលរដ្ឋដែលជាជនចាស់ជរា និងស្ត្រីមានផ្ទៃពោះ លំបាកក្នុងការធ្វេីដំណេីរមកថតអត្តសញ្ញាណប័ណ្ណសញ្ជាតិខ្មែរដល់ប៉ុស្តិ៍នគរបាល ឬដល់អធិការរដ្ឋាននគរបាលខណ្ឌ។

ឆ្លៀតក្នុងឱកាសនោះ មន្ត្រីនគរបាលក៏បានរៀបចំវេទិកាសាធារណៈផ្សព្វផ្សាយផលប៉ះពាល់នៃការប្រេីប្រាស់គ្រឿងញៀន បញ្ហាក្មេងទំនេីង និងពិគ្រោះយោបល់​ និងបិទ Sticker តាមខ្នងផ្ទះប្រជាពលរដ្ឋដេីម្បីងាយស្រួលក្នុងការទំនាក់ទំនងអន្តរាគមន៍ទាន់ពេលវេលា​។

លោកអធិការក៏បានណែនាំដល់អាណាព្យាបាល ត្រូវអប់រំកូនចៅមិនត្រូវដាក់អាវុធ ឬឧបករណ៍កែឆ្នៃតាមខ្លួនដូចជា ដាវ កាំបិត និងមិនត្រូវប្រើប្រាស់គ្រឿងញៀនដែលធ្វើប៉ះពាល់ខ្លួនឯង គ្រួសារ និងសង្គមជាតិ។

ប្រជាពលរដ្ឋ ក៏បានសំណូមពរដល់លោកអធិការខណ្ឌ សូមអោយកងកម្លាំងបង្ក្រាបក្រុមក្មេងទំនើង និងបទល្មើសផ្សេងៗអោយទាន់ពេលវេលាដើម្បីរក្សាសន្តិសុខសុវត្ថិភាពជូនប្រជាពលរដ្ឋក្នុងមូលដ្ឋាន៕

អត្ថបទ៖ សំណាង