ព័ត៌មានអន្ដរជាតិ

រុស្ស៊ីនិងអ៊ុយក្រែនវាយបកគ្នាទៅវិញទៅមក ក្រោយអាមេរិកសម្រេចបានកិច្ចព្រមព្រៀងរ៉ែ

បានផុស

១ year មុន

នៅ

ថ្ងៃសុក្រ ២ ឧសភា ២០២៥

ដោយ

ការវាយប្រហារដោយយន្តហោះគ្មានមនុស្សបើករបស់អ៊ុយក្រែនបានសម្លាប់មនុស្សយ៉ាងហោចណាស់៧នាក់ ខណៈការវាយប្រហារដោយយន្តហោះគ្មានមនុស្សបើករបស់រុស្ស៊ីបានសម្លាប់មនុស្សពីរនាក់។ ការវាយប្រហារដាក់គ្នានេះកើតឡើងតែប៉ុន្មានម៉ោងបន្ទាប់ពីសហរដ្ឋអាមេរិក និងអ៊ុយក្រែនបានចុះហត្ថលេខាលើកិច្ចព្រមព្រៀងរ៉ែដ៏ចម្រូងចម្រាសមួយ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០២ខែឧសភានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហាររបស់អ៊ុយក្រែននៅតំបន់ Kherson ភាគខាងត្បូងអ៊ុយក្រែនកាលពីថ្ងៃព្រហស្បតិ៍ បានសម្លាប់មនុស្ស៧ នាក់ និងរបួសជាង ២០ នាក់។ យោធាអ៊ុយក្រែនបានបញ្ជាក់ពីការវាយប្រហារនៅក្រុង Kherson នេះ ប៉ុន្តែបាននិយាយថា ខ្លួនបានកំណត់គោលដៅលើទាហានរុស្ស៊ី និងបានសម្លាប់តែបុគ្គលិកយោធាប៉ុណ្ណោះ។ ចំណែកការវាយប្រហាររបស់រុស្ស៊ីលើទីក្រុងកំពង់ផែសមុទ្រខ្មៅ Odesa របស់ប្រទេសអ៊ុយក្រែន បានសម្លាប់មនុស្សពីរនាក់ និង ១៥ នាក់ផ្សេងទៀតបានរងរបួស។

ការវាយប្រហារទៅវិញទៅមកនេះ បានកើតឡើងបន្ទាប់ពីអ៊ុយក្រែន និងសហរដ្ឋអាមេរិកបានចុះហត្ថលេខាលើកិច្ចព្រមព្រៀងផ្តល់សិទ្ធិអាទិភាពដល់សហរដ្ឋអាមេរិកក្នុងការទទួលបានសារធាតុរ៉ែសំខាន់ៗរបស់អ៊ុយក្រែនជាមធ្យោបាយទប់ស្កាត់ការឈ្លានពានរបស់រុស្ស៊ីនាពេលអនាគត។

រដ្ឋមន្ត្រីការបរទេសអ៊ុយក្រែន លោក Andrii Sybiha បាននិយាយថា៖«កិច្ចព្រមព្រៀងនេះជាព្រឹត្តិការណ៍ដ៏សំខាន់មួយនៅក្នុងភាពជាដៃគូយុទ្ធសាស្ត្ររបស់អ៊ុយក្រែន និងសហរដ្ឋអាមេរិក ក្នុងគោលបំណងពង្រឹងសេដ្ឋកិច្ច និងសន្តិសុខរបស់អ៊ុយក្រែន»។

ប្រធានាធិបតី Volodymyr Zelenskyy បានសាទរចំពោះកិច្ចព្រមព្រៀងនេះថាជាកិច្ចព្រមព្រៀងស្មើភាព និងយុត្តិធម៌ ដែលបើកផ្លូវសម្រាប់ទំនើបកម្មនៃឧស្សាហកម្មនៅអ៊ុយក្រែន។

ទោះបីជាយ៉ាងណាក៏ដោយ ទីក្រុងមូស្គូមិនសប្បាយចិត្តទេចំពោះរឿងនេះ ដោយអនុប្រធានក្រុមប្រឹក្សាសន្តិសុខរុស្ស៊ី Dmitry Medvedev បានចេញសារលើ Telegram នៅថ្ងៃដដែលនោះថា លោកត្រាំ កំពុងបង្ខំឲ្យទីក្រុងកៀវ លក់ទ្រព្យសម្បត្តិរ៉ែរបស់ខ្លួន ដើម្បីតែការសុំបន្តជំនួយយោធា៕