បញ្ហាជាតិចំនួន៣ ត្រូវបានរដ្ឋសភា-ព្រឹទ្ធសភា លើកមកពិនិត្យ ដើម្បីត្រៀមសម្រាប់សមាជរួមគ្នា

នៅព្រឹកថ្ងៃទី១៣ ខែឧសភា ឆ្នាំ២០២៥នេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានអញ្ជើញដឹកនាំកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា ដោយបានពិនិត្យលើបញ្ហាសំខាន់ចំនួន៣របស់ជាតិ ដើម្បីត្រៀមដាក់ចូលជាប្រធានបទសម្រាប់សមាជ នាពេលខាងមុខ។

បញ្ហារបស់ជាតិទាំង៣នេះ រួមមានទាក់ទងនឹងប្រព័ន្ធគាំពារសង្គម បញ្ហាសេដ្ឋកិច្ចក្រៅប្រព័ន្ធ និងសំខាន់បំផុតនោះ គឺពាក់ព័ន្ធទៅនឹងវិស័យកសិកម្ម ដែលគណៈកម្មាធិការសមាជរដ្ឋសភា និងព្រឹទ្ធសភា បានពិនិត្យ និងអនុម័តទៅលើប្រធានបទទាំង៣នេះ សម្រាប់សមាជលើកទី១ របស់ខ្លួន។

តាមការគ្រោងទុក ព្រឹទ្ធសភា និងរដ្ឋសភាកម្ពុជា នឹងរៀបចំធ្វើសមាជ នៅក្នុងខែមិថុនាខាងមុខ គឺតបតាមសំណើរបស់ប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត ដើម្បីជំរុញឧត្តមប្រយោជន៍ជូនប្រជាពលរដ្ឋ។ សមាជព្រឹទ្ធសភា និងរដ្ឋសភា ជាដំណើរការលទ្ធិប្រជាធិបតេយ្យ និងការទទួលខុសត្រូវដ៏ខ្ពង់ខ្ពស់បំផុតរបស់រាជរដ្ឋាភិបាលចំពោះប្រជាពលរដ្ឋ ដែលបានផ្តល់ការគំាទ្រ យ៉ាងច្រើនលើសលប់មកលើរាជរដ្ឋាភិបាល នៅក្នុងការបោះឆ្នោតជ្រើសតំាងតំណាងរាស្រ្ត នីតិកាលទី៧ កាលពីថ្ងៃខែកក្កដាឆ្នាំ២០២៣ កន្លងនេះ។

ជាការឆ្លើយតបចំពោះទំនុកចិត្តរបស់ប្រជាពលរដ្ឋបែបនេះហើយ បានជារាជរដ្ឋាភិបាលស្នើសុំសភាដែលតំណាងឱ្យប្រជាពលរដ្ឋ រៀបចំសមាជរដ្ឋសភា និងព្រឹទ្ធសភា ឡើង ក្នុងគោលបំណងបង្ហាញពីលទ្ធផលដែលរាជរដ្ឋាភិបាលសម្រេចបានក្នុងការបម្រើប្រជាពលរដ្ឋ និងប្រទេសជាតិនៅក្នុងរយៈពេលជិត២ឆ្នាំមកនេះ។

យោងច្បាប់ស្តីពីការរៀបចំ និងការប្រព្រឹត្តទៅនៃសមាជរដ្ឋសភា និងព្រឹទ្ធសភា សមាជរដ្ឋសភា និងព្រឹទ្ធសភា គឺជាការប្រជុំរួមគ្នានៃសមាជិករដ្ឋសភា និងព្រឹទ្ធសភា ដើម្បីដោះស្រាយបញ្ហាសំខាន់ៗរបស់ប្រទេសជាតិ ករណីចំបាច់ ដូចជា៖ ការគំរាមកំហែងយ៉ាងធ្ងន់ធ្ងរដល់ឯករាជ្យ អធិបតេយ្យ និងបូរណភាពទឹកដី ឬករណីប្រធានសក្តិ បណ្តាលឱ្យមានវិនាសកម្មយ៉ាងធ្ងន់ធ្ងរដល់ជាតិ និងប្រជាជន ឬករណីផ្សេងៗទៀត ដែលគណៈកម្មការធិការសមាជ យល់ឃើញថា ជាបញ្ហាសំខាន់របស់ប្រទេសជាតិ។

ព្រះមហាក្សត្រ ប្រធានព្រឹទ្ធសភា ប្រធានរដ្ឋសភា នាយករដ្ឋមន្រ្តី អាចផ្តួចផ្តើមឱ្យមានការប្រជុំសមាជបាន ដោយប្រធានសមាជ អញ្ជើញសមាជិករដ្ឋសភា និងព្រឹទ្ធសភាឱ្យចូលរួមប្រជុំសមាជ។ ច្បាប់សមាជរដ្ឋសភាព្រឹទ្ធសភា បានកំណត់ថា ប្រធានព្រឹទ្ធសភាជាប្រធានសមាជ៕