សន្តិសុខសង្គម

អាវុធហត្ថរាជធានីភ្នំពេញ បញ្ជូនក្មេងទំនើងចំនួន ៨ នាក់ ទៅកាន់តុលាការ

បានផុស

១១ ខែ មុន

នៅ

ថ្ងៃសុក្រ ១៦ ឧសភា ២០២៥

ដោយ

ក្មេងទំនើងប្រុស-ស្រី ចំនួន ៨ នាក់ ដែលវាយតប់គ្នាទៅវិញទៅមកក្នុងហាងមួយកន្លែង នៅខណ្ឌបឹងកេងកង ត្រូវបានកងរាជអាវុធហត្ថរាជធានីភ្នំពេញ ឃាត់ខ្លួន និងបញ្ជូនទៅកាន់តុលាការ នៅព្រឹកថ្ងៃទី ១៦ ខែឧសភា ឆ្នាំ ២០២៥ នេះ។

កាលពីវេលាម៉ោង ៣ ទៀបភ្លឺ ថ្ងៃទី ១២ ខែឧសភា ឆ្នាំ ២០២៥ ថ្មីៗ នេះ មានករណីក្មេងទំនើងប្រុស-ស្រី ២ ក្រុម បានធ្វើសកម្មភាពវាយតប់គ្នាទៅវិញទៅមកនៅចំណុចក្នុងហាងប្រាសាទ ទីតាំងផ្លូវលេខ ៣៧០ កែង ៥១ សង្កាត់បឹងកេងកងទី ១ ខណ្ឌបឹងកេងកង រាជធានីភ្នំពេញ។ បន្ទាប់ពីធ្វើការឃាត់ខ្លួនជាក់ស្ដែងនូវក្រុមក្មេងទំនើងទាំង ២ ក្រុម សរុបបានចំនួន ៨ នាក់ (ប្រុស ២ នាក់ ស្រី ៦ នាក់) អាវុធហត្ថរាជធានីភ្នំពេញ បានកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ និងកំពុងស្រាវជ្រាវតាមចាប់ខ្លួនបន្តនូវបក្ខពួកផ្សេងទៀត ដែលចូលរួមក្នុងសកម្មភាពវាយតប់នេះ យកមកផ្ដន្ទាទោសជាមួយគ្នាផងដែរ។

គួរបញ្ជាក់ថា កាលពីចុងខែមេសា កន្លងទៅ អាវុធហត្ថរាជធានីភ្នំពេញ ក៏បានឃាត់ខ្លួនទំនើង ៨ នាក់ បញ្ជូនទៅតុលាការ រហូតត្រូវបានឃុំខ្លួនក្នុងពន្ធនាគារព្រៃសដល់បច្ចុប្បន្ន ដែលក្នុងនោះ ៦ នាក់ ជាសមាជិកក្នុងក្រុមក្មេងទំនើងមានរហស្សនាមថា MTT (មនុស្សតូចៗ) មានអាយុត្រឹមតែ ១៤ ឆ្នាំ ១៥ ឆ្នាំ ១៦ ឆ្នាំ ជាប់ពាក់ព័ន្ធករណីនាំគ្នាធ្វើសកម្មភាពព្រួតវាយជនរងគ្រោះម្នាក់ ដណ្តើមយកម៉ូតូ ១ គ្រឿង នៅតាមបណ្ដោយវិថី ឈ្នះឈ្នះ ស្ថិតភូមិបាក់ខែង សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ និង ២ នាក់ ពាក់ព័ន្ធធ្វើសកម្មភាពលូកយកទូរស័ព្ទដៃ ១ គ្រឿង របស់នារីម្នាក់ កំពុងធ្វើដំណើរលើចំណុចផ្លូវ ១៦៣ កែងផ្លូវ ២៣២ សង្កាត់វាលវង់ ខណ្ឌ ៧ មករា រាជធានីភ្នំពេញ ដែលទូរស័ព្ទជនរងគ្រោះបានទុកនៅក្នុងឃ្លុបម៉ូតូខាងមុខ។

ពាក់ព័ន្ធករណីនេះ អាវុធហត្ថរាជធានីភ្នំពេញ ក៏បានអំពាវនាវដល់ប្រជាពលរដ្ឋ ប្រសិនបើបានឃើញទង្វើទំនើងទាំងឡាយ អាចទំនាក់ទំនងសុំកិច្ចអន្តរាគមន៍តាមរយៈទូរស័ព្ទបន្ទាន់ លេខ ១២៩១ របស់អាវុធហត្ថរាជធានីភ្នំពេញ៕

អត្ថបទ ៖ ម៉េង