ព័ត៌មានជាតិ

អភិបាលខេត្តបន្ទាយមានជ័យ នាំយកគ្រឿងចក្រកាយបើកមុខទឹក បញ្ចៀសការជន់លិចស្រូវពលរដ្ឋ ២ ស្រុក

បានផុស

១១ ខែ មុន

នៅ

ថ្ងៃសៅរ៍ ២៤ ឧសភា ២០២៥

ដោយ

អភិបាលខេត្តបន្ទាយមានជ័យ បាននាំយកគ្រឿងចក្រអេស្កាវ៉ាទ័រ កាយបើកមុខទឹក ដើម្បីបញ្ចៀសពីការលិចលង់ស្រូវរបស់ប្រជាពលរដ្ឋចំនួន ២ ស្រុក ដោយសារមានភ្លៀងធ្លាក់ជាប់ៗ គ្នា និងមានការបើកទឹកពីផ្នែកខាងលើ ធ្វើឱ្យទឹកផ្នែកខាងក្រោម ត្រង់ចំណុចភូមិតាម៉ា សង្កាត់ម្កាក់ ក្រុងសិរីសោភ័ណ លិចលង់ស្រូវដែលកំពុងតែបង្កបង្កើនផលទើបបានប៉ុន្មានថ្ងៃ។

ការចុះកាយបើកមុខទឹកខាងលើនេះធ្វើឡើងកាលពីថ្ងៃទី ២៣ ខែឧសភា ឆ្នាំ ២០២៥ ក្រោមការចុះបញ្ជាផ្ទាល់ពី លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ រួមទាំងមន្ទីរធនធានទឹក អភិបាលក្រុងសិរីសោភ័ណ សង្កាត់ និងភូមិ បាននាំយកគ្រឿងចក្រអេស្កាវ៉ាទ័រ ដើម្បីកាយបើកមុខទឹក បញ្ចៀសការជន់លិចស្រូវប្រជាពលរដ្ឋ នៅចំណុចអូរព្រំប្រទល់ ឃុំស្លក្រាម ស្រុកស្វាយចេក និងភូមិតាម៉ា សង្កាត់ម្កាក់ ក្រុងសិរីសោភ័ណ។

ជាមួយគ្នានោះ លោកអភិបាលខេត្ត បានផ្តល់អនុសាសន៍ដល់ក្រុង-ស្រុក ទាំង ៩ ត្រូវផ្តោតយកចិត្តទុកដាក់តាមដានស្ថានភាពទឹក ដោយមួយរយៈពេលនេះមានភ្លៀងជាបន្តបន្ទាប់ អាចប្រឈមនឹងជំនន់ទឹកភ្លៀង ជាពិសេសបើក្នុងករណីតំបន់ដែលប្រឈមនឹងជំនន់ទឹកភ្លៀង ត្រូវរកវិធីគ្រប់មធ្យោបាយក្នុងការរំដោះទឹកកុំឱ្យមានការជន់លិចផលដំណាំ ក៏ដូចជាផ្ទះសំបែងប្រជាពលរដ្ឋ។ មួយវិញទៀត បើក្នុងករណីជំនន់ទឹកភ្លៀងធ្លាក់មកខ្លាំង ប៉ះពាល់ធ្ងន់ធ្ងរ ត្រូវជម្លៀសប្រជាពលរដ្ឋទៅកាន់ទីទួលសុវត្ថិភាព៕

អត្ថបទ ៖ អ ពៅ