កីឡា

រដូវកាលថ្មី ក្លិបបាល់ទាត់កម្ពុជា ៣ ប្រកួតពានអាស៊ី វគ្គសន្សំពិន្ទុក្នុងពូល

បានផុស

២ ខែ មុន

នៅ

ថ្ងៃពុធ ២៨ ឧសភា ២០២៥

ដោយ

ក្រុមបាល់ទាត់កម្ពុជាចំនួន ៣ ទទួលបានកៅអីប្រកួតក្នុងពានរង្វាន់ក្លិបទ្វីបអាស៊ី រដូវកាល ២០២៥-២៦ ដែលបានក្លាយជាជំហានថ្មីមួយទៀតសម្រាប់បាល់ទាត់កម្ពុជាលើឆាកអន្តរជាតិ។

ក្រុមបុរសភ្នំពេញក្រោន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់ភ្នំពេញក្រោន ក្នុងនាមជាជើងឯករងនៃលីគបាល់ទាត់កំពូលកម្ពុជាទទួលបានកៅអីវគ្គសន្សំពិន្ទុក្នុងពូល ពានរង្វាន់ AFC Challenge League នៅរដូវកាលថ្មី។ ក្រុមតំណាងកម្ពុជាមួយនេះទទួលបានកៅអីឡើងទៅកាន់វគ្គសន្សំពិន្ទុក្នុងពូល ដោយសារក្លិបនៅប្រទេសមិនអាចបំពេញទៅតាមលក្ខខណ្ឌរបស់សហព័ន្ធកីឡាបាល់ទាត់អាស៊ី។

ក្រុមបុរសព្រះខ័នរាជស្វាយរៀង

ក្លិបព្រះខ័នរាជស្វាយរៀង ទទួលបានកៅអីប្រកួតក្នុងពានរង្វាន់ក្លិបអាស៊ីលំដាប់ទី៣ AFC Challenge League នៅវគ្គសន្សំក្នុងពូលជាលើកទី២ បន្ទាប់ពីធ្វើបានល្អរហូតឈានដល់វគ្គផ្តាច់ព្រ័ត្រ និងទទួលបានចំណាត់ថ្នាក់លេខ២ក្នុងពានរង្វាន់មួយនេះ។

កាលពីរដូវកាលមុន ព្រះខ័នរាជស្វាយរៀង ត្រូវប្រកួតវគ្គជម្រុះ (Playoffs) ជាមួយក្រុមផ្សេង ដោយសារម្ចាស់ជើងឯកលីគកំពូលកម្ពុជាមានត្រឹមតែកន្លះកៅអីប៉ុណ្ណោះ ប៉ុន្តែក្លិបនៅកូរ៉េខាងជើងមិនបានបំពេញលក្ខខណ្ឌគ្រប់គ្រាន់ក្នុងការចូលរួមប្រកួតទើបផ្តល់ឲ្យក្លិបកម្ពុជាមួយនេះចូលដល់វគ្គសន្សំពិន្ទុក្នុងពូលតែម្តង។

យ៉ាងណា ព្រះខ័នរាជស្វាយរៀង បង្ហាញទម្រង់លេងដ៏ល្អចាប់ពីវគ្គសន្សំពិន្ទុក្នុងពូលរហូតដល់វគ្គផ្តាច់ព្រ័ត្រ ហើយបានជួយឲ្យក្លិបលីគកំពូលកម្ពុជាទទួលបានពិន្ទុយ៉ាងច្រើនរហូតទទួលបាន១កៅអីកន្លះនៅក្នុងរដូវកាលថ្មី។

ក្រុមនារីភ្នំពេញក្រោន

ក្រុមបាល់ទាត់នារីភ្នំពេញក្រោន បានក្លាយជាក្រុមនារីកម្ពុជាដំបូងគេបង្អស់ដែលចូលរួមប្រកួតក្នុងពានក្លិបអាស៊ីអាស៊ីលំដាប់ទី១ AFC Women’s Champions League ក្នុងនាមជាជើងឯកលីគនារីកម្ពុជាឆ្នាំ២០២៥។

ពាននារីអាស៊ី AFC Women’s Champions League ទើបតែត្រូវបានបង្កើតឡើងកាលពីឆ្នាំ២០២៤ ហើយរដូវកាល ២០២៥-២៦ ខាងមុខគឺជាព្រឹត្តិការណ៍ប្រកួតលើកទី២ដែលប្រជុំដោយក្លិបបាល់ទាត់នារីខ្លាំងៗទូទាំងទ្វីបអាស៊ី៕

អត្ថបទ៖ វីរបុត្រ