ត្រាំ ចុះហត្ថលេខា ហាមពលរដ្ឋ១២ប្រទេស មិនឲ្យចូលទឹកដី អាមេរិក

លោក ដូណាល់ ត្រាំ បានចុះហត្ថលេខាលើបម្រាមធ្វើដំណើរមួយ ដោយហាមឃាត់ពលរដ្ឋមកពីប្រទេសចំនួន១២មិនឲ្យធ្វើដំណើរចូលទឹកដីសហរដ្ឋអាមេរិក ដាច់ខាត ហើយបម្រាមនេះនឹងចូលជាធរមាននៅថ្ងៃចន្ទទី៩ខែមិថុនាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសទាំង១២នោះមានដូចជា៖ អាហ្វហ្គានីស្ថាន មីយ៉ាន់ម៉ា ឆាដ សាធារណរដ្ឋកុងហ្គោ អេក្វាទ័រហ្គីណេ អេរីទ្រា ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។ បម្រាមនេះក៏រឹតត្បិតផ្នែកខ្លះលើប្រទេសចំនួន៧ដូចជា៖ ប៊ូរុនឌី គុយបា ឡាវ សៀរ៉ាឡេអូន តូហ្គោ តូមិននីស្ថាន និងវ៉េណេស៊ុយអេឡាផងដែរ។

តាមការបញ្ជាក់ពីសេតវិមាន នៅថ្ងៃព្រហស្បតិ៍ទី៥ខែមិថុនាឆ្នាំ២០២៥, ការសម្រេចចិត្តរបស់ប្រធានាធិបតីអាមេរិក ក្នុងការចុះហត្ថលេខា គឺព្រោះតែលោកបានលើកឡើងពីហានិភ័យដល់សន្តិសុខជាតិ ជាពិសេសការវាយប្រហារថ្មីៗនេះនៅរដ្ឋ Colorado ដោយបុរសម្នាក់ គប់គ្រាប់បែកសាំងលើក្រុមមនុស្សដែលកំពុងប្រមូលផ្តុំគ្នាដើម្បីបង្ហាញការគាំទ្រដល់ចំណាប់ខ្មាំងអ៊ីស្រាអែល។

ជុំវិញរឿងនេះ អ្នកនាំពាក្យសេតវិមាន Abigail Jackson និយាយថា «លោកប្រធានាធិបតី ត្រាំ កំពុងធ្វើតាមសន្យារបស់គាត់ ដើម្បីការពារជនជាតិអាមេរិកពីតួអង្គបរទេសដ៏គ្រោះថ្នាក់ដែលចង់មកប្រទេសរបស់យើង បង្កគ្រោះថ្នាក់ដល់យើង»។

យ៉ាងណា នេះមិនមែនទើបលើកដំបូងឡើយដែលលោកត្រាំ ដាក់បម្រាមចូលអាមេរិកលើប្រទេសនានា។ ជាក់ស្តែងកាលពីអាណត្តិដំបូងក្នុងឆ្នាំ២០១៧ អ្នកសាធារណរដ្ឋរូបនេះ ក៏ហាមឃាត់ប្រទេសមូស្លីមចំនួន៧ផងដែរដូចជា៖ អ៊ីរ៉ង់ អ៊ីរ៉ាក់ លីប៊ី សូម៉ាលី ស៊ូដង់ ស៊ីរី និងយេម៉ែន។ ក្រោយមកបម្រាមនោះក៏ពង្រីកដល់ប្រទេស កូរ៉េខាងជើង ឆាដ និងវ៉េណេស៊ុយអេឡា៕

អត្ថបទ៖ សុខ សុវណ្ណ

ចុចអាន៖ ពូទីន ប្រាប់ត្រាំ ថា រុស្ស៊ី ដាច់ខាតត្រូវតែសងសឹកអ៊ុយក្រែន