ពូទីន ប្រាប់ត្រាំ ថា រុស្ស៊ី ដាច់ខាតត្រូវតែសងសឹកអ៊ុយក្រែន

យោងតាមប្រធានាធិបតីអាមេរិក ដូណាល់ ត្រាំ, មេដឹកនាំរុស្ស៊ី វ្ល៉ាឌីមៀរ ពូទីន បានប្រាប់គាត់ថា ទីក្រុងមូស្គូ ដាច់ខាតត្រូវតែសងសឹកចំពោះការវាយប្រហាររបស់អ៊ុយក្រែន លើមូលដ្ឋានទ័ពរបស់ខ្លួនកាលពីថ្ងៃមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំព្រមានបែបនេះនៅលើបណ្តាញសង្គម Truth Social បន្ទាប់ពីបានពិភាក្សាតាមទូរស័ព្ទជាងមួយម៉ោងជាមួយលោក ពូទីន កាលពីថ្ងៃពុធទី៤ខែមិថុនាឆ្នាំ២០២៥។

ទោះបីជាយ៉ាងណាក៏ដោយ ប្រធានាធិបតីអាមេរិកក៏បញ្ជាក់ដែរថា នេះគឺជាកិច្ចសន្ទនាដ៏ល្អមួយ ប៉ុន្តែមិនមែនជាកិច្ចសន្ទនាដែលនឹងឈានទៅរកកិច្ចសន្តិភាពភ្លាមៗនោះទេ។

នេះគឺជាការសន្ទនាលើកដំបូងរវាងមេដឹកនាំទាំងពីរ ចាប់តាំងពីអ៊ុយក្រែន បើកការវាយប្រហារដោយដ្រូនយ៉ាងភ្ញាក់ផ្អើលលើមូលដ្ឋានអាកាសរុស្ស៊ីកាលពីថ្ងៃទី១ខែមិថុនា។

អ៊ុយក្រែន វាយប្រហារលើមូលដ្ឋានទ័ពអាកាសរុស្ស៊ីចំនួន៥កន្លែងតំបន់ Murmansk ភាគខាងជើង, Ivanovo និង Ryazan ភាគកណ្តាល, Irkutsk នៅស៊ីបេរី និង Amur នៅចុងបូព៌ា ហើយវាគឺជាលើកដំបូងដែលអ៊ុយក្រែន វាយចូលដល់តំបន់ស៊ីបេរីនិងចុងបូព៌ា ក្នុងសង្គ្រាមរយៈពេលជាង៣ឆ្នាំមកនេះ។ 

តាមការអះអាងរបស់អ៊ុយក្រែន ខ្លួនបានកម្ទេចយន្តហោះចម្បាំងប្រភេទ Tu-95, Tu-22M និង A-50 សរុបចូលគ្នាអស់៤០គ្រឿង ប៉ុន្តែក្រោយមករូបភាពផ្កាយរណបបង្ហាញថា រុស្ស៊ីខ្ទេចយន្តហោះអស់ត្រឹម១៤គ្រឿងប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រី​ការពារជាតិអាមេរិក អវត្តមានលើក​ដំបូង ពីកិច្ចប្រជុំរដ្ឋមន្ត្រីការពារជាតិជួយអ៊ុយក្រែន​