អេឡុន ម៉ាសក៍ គាំទ្រការទម្លាក់លោក ត្រាំ ចេញពីអំណាច ក្នុងជម្លោះដ៏ក្ដៅ

នាយកប្រតិបត្តិក្រុមហ៊ុនផលិតរថយន្តអគ្គិសនី Tesla លោក អេឡុន ម៉ាសក៍ បាន​ស្នើពីការទម្លាក់លោក ដូណាល់ ត្រាំ ចេញពីតំណែងប្រធានាធិបតីសហរដ្ឋអាមេរិក​ ខណៈលោក ត្រាំ បាន​ស្នើឱ្យមានការកាត់ផ្ដាច់កុងត្រារដ្ឋាភិបាលលើអាជីវកម្មជាមួយបណ្ដាក្រុមហ៊ុនលោក ម៉ាសក៍​ ដែលនេះបង្ហាញពីជម្លោះដ៏ក្ដៅគគុករវាងសម្ព័ន្ធមិត្តទាំង២ ដែល​មានទំនាក់ទំនងយ៉ាង​ប្ដូរផ្ដាច់ត្រឹមតែប៉ុន្មានសប្ដាហ៍មុនសោះ។

ក្នុងរយៈពេលប៉ុន្មានសប្ដាហ៍កន្លងមក​នេះ ការរង្គុះរង្គើនៃទំនាក់ទំនងបាន​ចាប់ផ្ដើមរួចហើយ ដោយលោក​ ម៉ាសក៍ បាន​រិះគន់ពីច្បាប់ពន្ធដាររបស់រដ្ឋបាល ត្រាំ។ យ៉ាងណាមិញ ទីភ្នាក់ងារសារព័ត៌មាន​រ៉យទ័រ បាន​រាយការណ៍ចុងក្រោយថា ជម្លោះបាន​ចាប់ផ្ដើមឡើងកាន់តែខ្លាំង នៅពេលលោក ត្រាំ រិះគន់លោក ម៉ាសក៍ ចេញពីការិយាល័យពងក្រពើ ដែលបន្តឱ្យភាគីទាំង២ ជះពាក្យសម្ដីដាក់គ្នាទៅវិញទៅមកលើបណ្ដាញសង្គម។

លោក ត្រាំ បានបង្ហោះនៅលើបណ្ដាញសង្គម Truth Social ថា៖ «មធ្យោបាយងាយស្រួលបំផុតក្នុងការសន្សំប្រាក់នៅក្នុងថវិការាប់ពាន់លាន​​ដុល្លារបស់យើង គឺ​បញ្ចប់ការឧបត្ថម្ភធន និង​កុងត្រារដ្ឋាភិបាលជាមួយ​អេឡុន»។

ក្រោយការបង្ហោះបែបនេះរបស់ ត្រាំ ​ផ្សារភាគហ៊ុន​របស់ក្រុមហ៊ុន Tesla បាន​ធ្លាក់ចុះ ១៤,៣ ភាគរយ ដោយ​បាត់​បង់តម្លៃទីផ្សារប្រហែល ១៥០ ប៊ីលានដុល្លារ ពេលបញ្ចប់ការជួញដូរកាលពីថ្ងៃព្រហស្បតិ៍។ វាគឺជាការធ្លាក់ចុះតម្លៃដ៏ធំបំផុតជាប្រវត្តិសាស្រ្ត​របស់ក្រុមហ៊ុន Tesla ​គិតតែក្នុងរយៈពេលតែមួយថ្ងៃ។

ប៉ុន្មាននាទីក្រោយលោក ត្រាំ បង្ហោះសារដដែល លោក ម៉ាសក៍ បាន​ឆ្លើយតបទៅនឹងការបង្ហោះមួយ​នៅលើបណ្ដាញសង្គម X ដែលស្នើថា ប្រធានាធិបតីរូបនេះ គួរតែត្រូវបានទម្លាក់ចេញពីតំណែង។

ប៉ុន្មានថ្ងៃមុន លោក ម៉ាសក៍ បាន​រិះគន់ច្បាប់ស្ដីពីការកាត់បន្ថយពន្ធ និងការចំណាយ​ដ៏ច្រើន របស់លោក ត្រាំ ​ដោយថាវា «គួរឱ្យខ្ពើមរអើម» ដែល​នឹង​បង្កើនបំណុលជាតិអាមេរិក ដែលបច្ចុប្បន្នមានចំនួន ៣៦,២ ទ្រីលាន​ដុល្លារ។ ​

​ក្រោយនោះ លោក ត្រាំ នៅស្ងៀម ប៉ុន្តែនៅថ្ងៃព្រហស្បតិ៍ លោកបាន​ប្រាប់អ្នកយកព័ត៌មាន​នៅការិយាល័យពងក្រពើថា លោកមាន​ការ «ខកចិត្តខ្លាំង» ចំពោះលោក ម៉ាសក៍ ដោយ​បន្ថែមថា៖ «ស្ដាប់ អេឡុន និងខ្ញុំ ធ្លាប់មាន​ទំនាក់ទំនងដ៏ល្អ។ ប៉ុន្តែខ្ញុំមិនដឹងថា យើងនឹងបែបនេះទៀតឬអត់នោះទេ»។

លោក ម៉ាសក៍ ដែលចំណាយប្រាក់ ៣០០ លាន​ដុល្លារ ដើម្បីជួញយុទ្ធនាការបោះឆ្នោតឱ្យ ត្រាំ កាលពីឆ្នាំមុន បាន​ឆ្លើយតបទៅវិញ​ដោយបង្ហោះនៅលើ X ថា៖ «បើគ្មានខ្ញុំ លោក ត្រាំ ចាញ់ឆ្នោតបាត់ទៅហើយ។ រមិលគុណណាស់»។

ក្នុងការបង្ហោះមួយផ្សេងៗទៀត លោក ម៉ាសក៍ បាន​រិះគន់លើគោលនយោបាយពន្ធគយដ៏ចម្រូង​ចម្រាស់​របស់ ត្រាំ ដោយថា វានឹងធ្វើឱ្យ​សេដ្ឋកិច្ចអាមេរិកធ្លាក់ចុះនៅឆ្នាំនេះ។

ក្រៅពី Tesla លោក ​ម៉ាសក៍ ជាម្ចាស់ក្រុមហ៊ុន​​ SpaceX និង​ផ្កាយរណប​គឺ Starlink ។ SpaceX មានសារៈសំខាន់ចំពោះកម្មវិធីអវកាសរបស់រដ្ឋាភិបាល​សហរដ្ឋអាមេរិក ក្នុងនាមជាអ្នកមាំការសម្រាប់គម្រោងរដ្ឋ។ ​លោក ម៉ាសក៍ បាននិយាយថា ដោយសារតែការគំរាមកំហែងរបស់លោក ត្រាំ ​លោក​នឹងចាប់ផ្តើមបិទយានអវកាស Dragon របស់ SpaceX ដែលជាយាន​អវកាសអាមេរិកតែមួយគត់ ដែលអាចដឹកអ្នកអវកាសទៅកាន់ស្ថានីយអវកាសបាន។

គួរគូសបញ្ជាក់ថា ក្រោយឡើងកាន់អំណាចជាប្រធានាធិបតីអាមេរិកនៅអាណត្តិទី ២ នេះ លោក ត្រាំ បាន​តែងតាំងលោក ម៉ាសក៍ ឱ្យធ្វើជាប្រធានការិយាល័យទទួលបន្ទុកប្រសិទ្ធភាពរដ្ឋាភិបាលរបស់អាមេរិក(DOGE)។ ក្រោយពីនោះ លោក ម៉ាសក៍ បានចាប់ផ្ដើមការងារជាច្រើនដ៏ចម្រូងចម្រាស់ រួមទាំងពីមន្រ្តីផ្ទៃក្នុងរបស់ ត្រាំ ដូចជា​ការកាត់បន្ថយការចំណាយសហព័ន្ធយ៉ាងច្រើន និងការបញ្ឈប់បុគ្គលិករដ្ឋទ្រង់ទ្រាយធំជាដើម។

យ៉ាងណាមិញ ការព័ន្ធនយោបាយរបស់លោក ម៉ាសក៍ ធ្វើឱ្យ​ក្រុមហ៊ុន Tesla របស់លោកដួលចុះ ជាពិសេសពាក់ព័ន្ធនឹងការលក់រថយន្តអគ្គិសនី ដែលធ្វើឱ្យ​លោក​ប្រកាសដកខ្លួនចេញពីរដ្ឋបាល ត្រាំ កាលពីសប្ដាហ៍មុន៕

​