អ៊ីរ៉ង់​ពង្រីក​បម្រាមបណ្ដើរឆ្កែ ចំពេល​មាន​ការ​បង្រ្កាប​វប្បធម៌

​អាជ្ញាធរ​អ៊ីរ៉ង់ បានពង្រីកការហាមឃាត់ការបណ្ដើរសត្វឆ្កែទៅកាន់ទីក្រុងយ៉ាងហោចណាស់ចំនួន១៨ រួមទាំងទីក្រុង Isfahan, Kerman និង Ilam ខណៈដែលអាជ្ញាធរបានលើកឡើងពីការព្រួយបារម្ភអំពីសណ្តាប់ធ្នាប់សាធារណៈ និងសុវត្ថិភាព។ នេះបើយោងតាមការចេញផ្សាយរបស់សារព័ត៌មាន​ BBC កាលពីថ្ងៃទី០៨ខែមិថុនា។

ការផ្លាស់ប្តូរនេះបង្កើតឡើងនៅលើបម្រាមឆ្នាំ២០១៩ នៅទីក្រុងតេអេរ៉ង់ ហើយថែមទាំងហាមឃាត់ការដឹកជញ្ជូនសត្វឆ្កែនៅក្នុងយានជំនិះផងដែរ។

រដ្ឋាភិបាលរបស់អ៊ីរ៉ង់បានបំបាក់ទឹកចិត្តប្រជាជនជាយូរមកហើយពីការចិញ្ចឹមសត្វឆ្កែ ដោយនិយាយថា វាផ្ទុយនឹងតម្លៃសាសនា​អ៊ីស្លាម និងនាំមកនូវឥទ្ធិពលរបស់លោកខាងលិច។ យ៉ាងណាក៏ដោយ មនុស្សកាន់តែច្រើន ជាពិសេសជន​ជាតិ​អ៊ីរ៉ង់វ័យក្មេងកំពុងចិញ្ចឹមសត្វឆ្កែដោយស្ងាត់ៗ ប្រឆាំងនឹងច្បាប់សាសនា និងសង្គមដ៏តឹងរឹង។

ក្រុមមន្ត្រី បាននិយាយថា អ្នកណាម្នាក់ដែលចាប់បានល្មើសច្បាប់បម្រាម​បណ្តើរ​ឆ្កែ​ថ្មីអាចប្រឈមនឹងបញ្ហាផ្លូវច្បាប់។ ម្ចាស់សត្វឆ្កែជាច្រើនឥឡូវនេះប្ដូរមកបណ្ដើរសត្វចិញ្ចឹមរបស់ពួកគេនៅពេលយប់ ឬនៅកន្លែងស្ងាត់ ដើម្បីជៀសវាងការចាប់បាន។

គួរបញ្ជាក់ថា មិនមានច្បាប់ទូទាំងប្រទេសប្រឆាំងនឹងការចិញ្ចឹមសត្វឆ្កែទេ ប៉ុន្តែអាជ្ញាធរមូលដ្ឋានតែងតែបង្កើតការហាមឃាត់ផ្ទាល់ខ្លួនរបស់ពួកគេ។ ទោះយ៉ាងណាមេដឹកនាំកំពូលរបស់អ៊ីរ៉ង់ លោក Ayatollah Ali Khamenei បាននិយាយថា ការមានសត្វឆ្កែមិនអីទេសម្រាប់ការយាម​ការ​ផ្ទះ​សម្បែង​​នោះ​។

ពាក់ព័ន្ធរឿងនេះដែរ ក្រុមអ្នករិះគន់និយាយថា ការបង្រ្កាបសត្វឆ្កែគ្រាន់តែជាមធ្យោបាយមួយរបស់រដ្ឋាភិបាលក្នុងការគ្រប់គ្រងមនុស្សកាន់តែច្រើន ហើយថា ប៉ូលិសគួរតែផ្តោតលើបញ្ហាធំជាងនេះ ដូចជាឧក្រិដ្ឋកម្មកើនឡើងជាដើម៕

អត្ថបទ៖ ប៊ុន សុភាព