ព័ត៌មានអន្ដរជាតិ

លោក Pazeshkian៖ អ៊ីរ៉ង់គ្មានបំណងបង្កើតអាវុធប្រល័យលោកទេ

បានផុស

១ year មុន

នៅ

ថ្ងៃចន្ទ ១៦ មិថុនា ២០២៥

ដោយ

Chheang

ខណៈជម្លោះនិងការបាញ់ផ្លោងគ្រាប់ដាក់គ្នាជាមួយអ៊ីស្រាអែលឈានចូលដល់ថ្ងៃទី៤ ប្រធានាធិបតីអ៊ីរ៉ង់លោក Masoud Pezeshkian បានអះអាងសាជាថ្មីថា សាធារណរដ្ឋអ៊ីស្លាមរបស់លោកគ្មានចេតនាក្នុងការអភិវឌ្ឍអាវុធនុយក្លេអ៊ែរអ្វីនោះទេ ក្រៅតែពីគោលបំណងសម្រាប់បម្រើជាថាមពលស៊ីវិល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាទៅកាន់សភានាថ្ងៃចន្ទទី១៦ខែមិថុនាឆ្នាំ២០២៥ លោក Pezeshkian បាននិយាយថា «ពួកគេកំពុងអង្គុយហើយនិយាយថា អ៊ីរ៉ង់មិនគួរទទួលបានអាវុធនុយក្លេអ៊ែរទេ ខណៈដែលយើងគ្មានចេតនាចង់ទទួលបានអាវុធទាំងនេះទាល់តែសោះ» ដែលជាការលើកឡើងជាក់ស្តែងចំពោះអ៊ីស្រាអែល និងបណ្តាប្រទេសលោកខាងលិច ដែលបានចោទប្រកាន់ក្រុងតេហេរ៉ង់ជាយូរមកហើយថាកំពុងស្វែងរកអាវុធនុយក្លេអ៊ែរ។

លោក Pezeshkian បានបន្ថែមថា «យើងមានសិទ្ធិទទួលបានអត្ថប្រយោជន៍ពីថាមពលនុយក្លេអ៊ែរ និងការស្រាវជ្រាវដែលផ្តល់អត្ថប្រយោជន៍ដល់សង្គមនេះ ហើយគ្មាននរណាម្នាក់មានអំណាចអាចដកហូតសិទ្ធិនេះចេញទេ»។

ថ្មីៗនេះ ទីភ្នាក់ងារថាមពលអាតូមិកអន្តរជាតិ (IAEA) បានរាយការណ៍ថា អ៊ីរ៉ង់បានបង្កើនការចម្រាញ់សារធាតុអ៊ុយរ៉ាញ៉ូមដល់កម្រិតភាពសុទ្ធ ៦០% ដែលកៀកជិតដល់កម្រិត ៩០% ក្នុងការផលិតអាវុធនុយក្លេអ៊ែរ។ ទោះជាបែបនេះក្ដី អ៊ីរ៉ង់នៅតែអះអាងដដែលៗថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងស៊ីវិលប៉ុណ្ណោះ។

សហរដ្ឋអាមេរិក និងអ៊ីរ៉ង់ បានធ្វើកិច្ចប្រជុំចំនួន៥លើករួចមកហើយគិតចាប់តាំងពីខែមេសា ពាក់ព័ន្ធនឹងកម្មវិធីនុយក្លេអ៊ែររបស់ទីក្រុងតេហេរ៉ង់ និងការស្ដារឡើងវិញនូវកិច្ចព្រមព្រៀងដែលលោក ត្រាំ ធ្លាប់បានដកខ្លួនចេញជាឯកតោភាគីកាលពីឆ្នាំ២០១៨ ដើម្បីដាក់កម្រិតលើការចម្រាញ់សារធាតុអ៊ុយរ៉ាញ៉ូម។ យ៉ាងណា ដំណើរការការទូតនេះ បានរលាយសាបសូន្យទៅវិញ ក្រោយកិច្ចប្រជុំជុំទី៦ដែលគ្រោងធ្វើឡើងនៅថ្ងៃអាទិត្យក្នុងប្រទេសអូម៉ង់ត្រូវបានលុបចោល បន្ទាប់ពីអ៊ីស្រាអែលបើកការវាយប្រហារតាមដែនអាកាសប្រឆាំងនឹងអ៊ីរ៉ង់កាលពីថ្ងៃសុក្រ៕

ដោយ៖ ឈាង