អ៊ីរ៉ង់ ប្រកាសថា អាមេរិក ចាប់ផ្តើមសង្គ្រាមដ៏គ្រោះថ្នាក់ហើយ!

ប្រទេសអ៊ីរ៉ង់បានថ្កោលទោសប្រមុខសេតវិមាន ដូណាល់ ត្រាំ ក្រោយការវាយប្រហារលើទីតាំងនុយក្លេអ៊ែររបស់ខ្លួនចំនួន៣កន្លែង ហើយពេលនេះប្រកាសថា សហរដ្ឋអាមេរិក បានចាប់ផ្តើមសង្គ្រាមដ៏គ្រោះថ្នាក់ប្រឆាំងទីក្រុងតេហេរ៉ង់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសនេះគឺចេញពីក្រសួងការបរទេសអ៊ីរ៉ង់នៅថ្ងៃអាទិត្យទី២២ខែមិថុនាឆ្នាំ២០២៥ និងត្រូវបានចុះផ្សាយដោយសារព័ត៌មាន Tasnim របស់អ៊ីរ៉ង់។

ក្នុងសេចក្តីប្រកាសនោះមានខ្លឹមសារថា «ពិភពលោកមិនត្រូវភ្លេចទេថា គឺអាមេរិក ដែលជាអ្នកក្បត់ការទូត។ អ៊ីស្រាអែល ជាអ្នកប្រព្រឹត្តអំពើប្រល័យពូជសាសន៍និងគ្មានច្បាប់ ហើយអាមេរិក គឺជាអ្នកធ្វើសង្រ្គាមដ៏គ្រោះថ្នាក់ប្រឆាំងអ៊ីរ៉ង់។ ការវាយប្រហារនេះ គឺជាការរំលោភលើធម្មនុញ្ញអង្គការសហប្រជាជាតិនិងច្បាប់អន្តរជាតិ ហើយថា រដ្ឋាភិបាលអាមេរិក ត្រូវទទួលខុសត្រូវទាំងស្រុង ចំពោះផលវិបាកធ្ងន់ធ្ងរនៃឧក្រិដ្ឋកម្មដ៏សាហាវនេះ»។

ទន្ទឹមនោះ អ៊ីរ៉ង់បានស្នើឲ្យមានកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិ ដោយជំរុញឲ្យក្រុមប្រឹក្សាថ្កោលទោសការវាយប្រហាររបស់អាមេរិក លើរោងចក្រនុយក្លេអ៊ែររបស់ខ្លួន។

ក្នុង​លិខិត​នោះ ឯកអគ្គរដ្ឋទូត​អ៊ីរ៉ង់​ប្រចាំ​ UN លោក Amir Saeid Iravani បាន​ហៅ​ការវាយប្រហារ​របស់​អាមេរិក​ថា​ជាការ​គំរាមកំហែង​យ៉ាងធ្ងន់ធ្ងរ​ប្រឆាំងសន្តិភាពនិង​សន្តិសុខ​ក្នុង​តំបន់ និង​អន្តរជាតិ​។ លោកក៏ចោទដែរថា ការវាយប្រហារនេះគឺស្ថិតនៅក្រោមការត្រួតពិនិត្យពេញលេញរបស់ទីភ្នាក់ងារថាមពលបរមាណូអន្តរជាតិ (IAEA)។

លោក Rafael Mariano Grossi អគ្គនាយក IAEA និយាយថា លោកនឹងកោះប្រជុំបន្ទាន់មួយនៅថ្ងៃចន្ទ បន្ទាប់ពីការវាយប្រហាររបស់សហរដ្ឋអាមេរិកលើរោងចក្រនុយក្លេអ៊ែរអ៊ីរ៉ង់។

យ៉ាងណា IAEA និយាយថា​ គិតត្រឹមពេលនេះ មិនទាន់មានការកើនឡើងនៃកម្រិតជាតិវិទ្យុសកម្មនៅឯទីតាំង​នុយក្លេអ៊ែររបស់អ៊ីរ៉ង់នៅឡើយទេ៕

អត្ថបទ៖ សុខ សុវណ្ណ

ចុចអាន៖ ត្រាំ គំរាមអ៊ីរ៉ង់ ថា បើហ៊ានសងសឹកអាមេរិក នឹងត្រូវខ្លាំងជាងនេះទៀត