ក្រុមមន្ត្រីនគរបាលចរាចរណ៍ដែលទារលុយពីបុរសឥណ្ឌូនេស៊ី ត្រូវបានហៅ​មកសួរនាំ និងរង់ចាំការសម្រេចពីលោកស្នងការ

ក្រុមមន្ត្រីនគរបាលចរាចរណ៍ និងមន្រ្តីជាប់កិច្ចសន្យាសរុបចំនួន៩រូប នៅគោលដៅស្តុប ព្រះសក្យមុនីចេតិយ ត្រូវបានកោះហៅមកសួរនាំនៅព្រឹក០៤ ខែកក្កដា ឆ្នាំ២០២៥នេះ ដើម្បីប្រមូលព័ត៌មានឲ្យបានច្បាស់លាស់គ្រប់ជ្រុងជ្រោយ​យកមកវិភាគវាយតម្លៃ ហើយធ្វើរបាយការណ៍ រាយការណ៍ជូនលោកស្នងការ ដើម្បីពិនិត្យ និងសម្រេច។ ការកៅហៅមកសួរនាំនេះ បន្ទាប់មានការផ្សព្វផ្សាយតាមបណ្តាញសង្គមករណីឃាត់រថយន្តជនជាតិឥណ្ឌូនេស៊ី ១គ្រឿង និងទាមទារលុយចំនួន៣០០ដុលា្លរ តែបុរសឥណ្ឌូនេស៊ី បានសម្រួលមកត្រឹម៥០ដុល្លារវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីក្រុមការងារព័ត៌មាន និងប្រតិកម្មរហ័ស នៃស្នងការការដ្ឋាននគរបាលរាជធានីភ្នំពេញ បន្ទាប់ពីបែកធ្លាយករណីនេះ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកស្នងការរងផែនការងារធនធានមនុស្ស ការិយាល័យបុគ្គលិក កោះហៅមន្ត្រីនគរបាលចរាចរណ៍ និងមន្រ្តីជាប់កិច្ចសន្យា ចំនួន៩រូប នៅគោលដៅស្តុបព្រះសក្យមុនីចេតិយ ស្ថិតក្នុងសង្កាត់ស្រះចក ខណ្ឌដូនពេញ ដើម្បីសួរនាំបំភ្លឺ និងកំពុងធ្វើការស្រាវជ្រាវតាមជំនាញរបស់នគរបាល ប្រមូលព័ត៌មានឲ្យបានច្បាស់លាស់គ្រប់ជ្រុងជ្រោយយកមកវិភាគវាយតម្លៃ ហើយធ្វើរបាយការណ៍ រាយការណ៍ជូនឯកឧត្តមស្នងការ ដើម្បីពិនិត្យនិងសម្រេច។

តាមការបំភ្លឺ ក្រុមមន្ត្រីនគរបាលចរាចរណ៍នៅគោលដៅ ស្តុបព្រះសក្យមុនីចេតិយ បានហៅអ្នកបើកបររថយន្ដម្នាក់ដែលជាជនជាតិឥណ្ឌូនេស៊ី សួរនាំរកឯកសាររថយន្ត នៅពេលនោះជនជាតិឥណ្ឌូនេស៊ី បានបង្ហាញ ប័ណ្ណបើកបរអាស៑ាន រួចហើយ តែប៉ូលីសនៅតែទាមទាររកឯកសារ ផ្សេងៗ រហូតប៉ូលីសទាមទារលុយចំនួន៣០០ដុលា្លរ តែបុរសឥណ្ឌូនេស៊ី បានសម្រួលមកត្រឹម៥០ដុល្លារវិញ មិនតែប៉ុណ្ណោះមានប៉ូលីសមកទាមទារបន្ថែម៤០០០រៀល។

បន្ទាប់ពីមានការផ្សព្វពីសម្មភាពក្រុមមន្ត្រីនគរបាលចរាចរណ៍ទាំងនេះ ធ្វើឲ្យមហាជន ក៏ដូចជាអ្នកលេងបណ្ដាញសង្គមនាំគ្នារិះគន់លើក្រុមមន្ត្រីអនុវត្តច្បាប់ទាំងនេះមិនសំចៃមាត់៕