តៃវ៉ាន់ធ្វើសមយុទ្ធយោធាដ៏ធំបំផុតមិនធ្លាប់មាន ចំពេលមានភាពតានតឹងកើនឡើងជាមួយចិន

យោងតាមការចេញផ្សាយរបស់សារព័ត៌មាន​ CNA នៅថ្ងៃទី ០៩ ខែកក្កដានេះ តៃវ៉ាន់ចាប់ផ្តើមធ្វើសមយុទ្ធយោធាប្រចាំឆ្នាំ​ដ៏ធំបំផុតរបស់ខ្លួន ហៅថា «សមយុទ្ធ Han Kuang» ផ្តោតលើការវាយប្រហារលើប្រព័ន្ធបញ្ជាការយោធា ដើម្បីត្រៀម​ខ្លួន​សម្រាប់ការឈ្លានពានដែលអាចកើតមានពីប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណាក់កាលដំបូងនៃសមយុទ្ធសាកល្បងពីរបៀបដែលយោធានឹងឆ្លើយតប ប្រសិនបើប្រព័ន្ធទំនាក់ទំនងត្រូវបានដាច់ ដោយប្រើមេរៀនដែលបានរៀនពីសង្គ្រាមនៅអ៊ុយក្រែន។

សមយុទ្ធរយៈពេល ១០ថ្ងៃ នឹងមានការចូលរួមពីទាហានបម្រុង​ចំនួន ២២០០០នាក់ ដែល​ជាចំនួនដ៏ច្រើន​បំផុត​និងបង្ហាញ​នូវសព្វាវុធថ្មីៗ រួមទាំងប្រព័ន្ធរ៉ុក្កែត HIMARS ដែលផលិតដោយសហរដ្ឋអាមេរិក និងមីស៊ីល Sky Sword ដែល​បានអភិវឌ្ឍក្នុងស្រុក។ សមយុទ្ធនេះក៏នឹងពិនិត្យមើលថាតើ ជនស៊ីវិលបានត្រៀមលក្ខណៈបែបណា ដោយបង្កើតស្ថានីយ៍ផ្គត់ផ្គង់សង្គ្រោះបន្ទាន់ និងប្រើប្រាស់ជម្រកបន្ថែមទៀតដើម្បីការពារមនុស្សក្នុងពេលមានការវាយប្រហារ។

មន្ត្រី​ការពារជាតិ​តៃវ៉ាន់ ​បាន​និយាយថា ចិន​ទំនងជា​តាមដាន​សមយុទ្ធ​នេះ​យ៉ាង​ដិតដល់។ នៅថ្ងៃដំបូង តៃវ៉ាន់បានរាយការណ៍ថា ខ្លួន​បានរកឃើញយន្តហោះយោធាចិនចំនួន ៣១​គ្រឿង និងនាវាកងទ័ពជើងទឹកចំនួន ៧ គ្រឿង ដោយមានយន្តហោះចំនួន ២៤ គ្រឿងឆ្លងកាត់ខ្សែបន្ទាត់បំបែកភាគីទាំងពីរ។

ចំណែក​​​មន្ត្រី​ចិន បាននិយាយថា សមយុទ្ធនេះគឺគ្រាន់តែដើម្បីបង្ហាញ និងអះអាងថា តៃវ៉ាន់មិនអាចបញ្ឈប់កងទ័ពរបស់ខ្លួន​ពីការកាន់កាប់កោះនោះទេ។ ប៉ុន្តែ​រដ្ឋាភិបាល​តៃវ៉ាន់​និយាយ​ថា​ មាន​តែ​ប្រជាជន​តៃវ៉ាន់​ប៉ុណ្ណោះ​ដែល​មាន​សិទ្ធិ​សម្រេច​អនាគត​របស់​ពួកគេ។

គួរបញ្ជាក់ថា សមយុទ្ធនេះបានបង្ហាញពីកិច្ចខិតខំប្រឹងប្រែងកាន់តែខ្លាំងឡើងរបស់តៃវ៉ាន់ក្នុងការបង្កើនសមត្ថភាពការពាររបស់ខ្លួន និងទប់ស្កាត់ការឈ្លានពានដែលអាចកើតមានចំពេលមានការកើនឡើងសកម្មភាពយោធារបស់ចិននៅជុំវិញកោះនេះ៕

អត្ថបទ៖ ប៊ុន សុភាព