នាយ កុយ អំពាវនាវសប្បុរសជនចូលរួមបច្ច័យកសាងវត្តសូរភី ហៅវត្តក្បាលកោះ

កាលពី​ថ្មី​ៗនេះមហាជនអ្នកគាំទ្រមានការចាប់អារម្មណ៍ បន្ទាប់ពីឃើញនៅ​លើ​បណ្តាញ​សង្គម​មានការចែករំលែកនូវរូបភាពនិងវីដេអូមួយ ដែលបង្ហាញទីមោង​រចនាមុខមាត់​ដូច​ទៅ​នឹងតារាកំប្លែងជើងចាស់ល្បីឈ្មោះ នាយ កុយ របស់​វត្តមួយនៅក្នុងភូមិសាស្ត្រស្រុក​ស្អាង ខេត្តកណ្តាល។

ទោះបីមានការរចនាមុខមាត់​ដូចទីងមោងដូចនឹងខ្លួនយ៉ាងណាក្តី តែតារា​កំប្លែងលោក ជួង ជី ហៅ​កុយ បាន​បញ្ជាក់​ថា លោក​មិន​បាន​ប្រកាន់ ឬ​ជំទាស់​ទៅ​លើ​ការ​រចនា​ទីងមោង​ដែល​មានមុខ​ដូច​ទៅ​នឹង​រូប​លោក​នោះ​ឡើយ។ មិនតែប៉ុណ្ណោះនាយ កុយ ថែមទាំងបានផ្សព្វផ្សាយ និងអំពាវនាវសប្បុរសជនចូលរួមបច្ច័យកសាង វត្តសូរភី ហៅវត្តក្បាលកោះទៀតផង។

បើតាមលោក ជួង ជី ហៅ នាយ កុយ ដើម្បីរួមចំណែកគាំទ្រដល់ការដង្ហែរទៀនព្រះវស្សា ជាមួយក្រុមយុវជនទីងមោងនៅវត្តសូរភី លោកស្នើឱ្យសាធារណជនចូលរួមបច្ច័យក្នុងការរួមចំណែកជួយកសាងវត្តខាងលើនេះផង ព្រោះវិហារចាស់ទ្រុឌទ្រោម និងត្រូវបានរុះរើចេញអស់ហើយដើម្បីកសាងព្រះវិហារថ្មី។

តារាកំប្លែងនាយ កុយ ក៏បានបង្ហាញអារម្មណ៍សប្បាយចិត្តផងដែរ នៅពេលឃើញរូបទីងមោងរចនាមុខមាត់របស់ខ្លួន​ខណ:លោក​ចាត់​ទុក​ថា រូបនេះជា​ការ​ធ្វើ​ឡើង​ក្នុង​ការ​ន័យ​ចូល​ចិត្ត និង​ស្រឡាញ់​ក្នុង​នាម​លោក​ជា​អ្នកសិល្បៈ​ដែល​មានកេរ្តិ៍ឈ្មោះ​ម្នាក់។ ក្រៅពីនេះ នាយកុយ ក៏មានរចនាទីងមោងមុខមាត់ដូចទៅនឹងតារាកំប្លែងនាយ ក្រឹម ដែលជាមិត្តភ័ក្តិសិល្ប:រួមអាជីពជាមួយនាយ កុយ ផងដែរ៕ ចាន់រ៉ា