ជីវិតកម្សាន្ដ

Selena ជ្រើសរើសថ្ងៃរៀបការ ដោយសារតែ Taylor Swift

បានផុស

៩ ខែ មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

សារព័ត៌មាន Daily Mail បានរាយការណ៍ថា Selena Gomez និង Benny Blanco នឹងរៀបចំពិធីមង្គលការរបស់ពួកគេនៅខែកញ្ញានេះនៅ Montecito រដ្ឋ California សហរដ្ឋអាមេរិក។ ពិធីនេះត្រូវបានគេនិយាយថា មានតែក្រុមគ្រួសារ និងមិត្តជិតស្និទ្ធចូលរួមតែប៉ុណ្ណោះ។

ប្រភពទីពីរបាននិយាយថា អាពាហ៍ពិពាហ៍ចុងរដូវក្តៅគឺល្អសម្រាប់ Selena និង Benny ព្រោះកាលវិភាគរបស់ពួកគេនឹងមានភាពមមាញឹកខ្លាំងនៅរដូវស្លឹកឈើជ្រុះ និងរដូវរងា។ ជាពិសេស គូស្នេហ៍នេះក៏មានការលំបាកក្នុងការរៀបចំកាលវិភាគអាពាហ៍ពិពាហ៍ឲ្យសមស្របនឹងកាលវិភាគមមាញឹករបស់ Taylor Swift ដោយចង់ឲ្យមិត្តសំឡាញ់ចូលរួម ហើយពិតជាសង្ឃឹមថាគូស្នេហ៍នោះ អាចមកព្រមជាមួយគ្នាបាន។

ទំនាក់ទំនងរបស់ Taylor និង Selena បានចាប់ផ្តើមនៅក្នុងឆ្នាំ ២០០៨ នៅពេលដែលពួកគេទាំងពីរបានណាត់ជួបបងប្អូនប្រុស Jonas ពីរនាក់គឺ Taylor បានណាត់ជួប Joe Jonas ហើយ Selena បានណាត់ជួប Nick Jonas ។ ថ្វីដ្បិតតែទំនាក់ទំនងទាំងនេះមិនស្ថិតស្ថេរក៏ដោយ ប៉ុន្តែពួកគេគឺជាកត្តាជំរុញឲ្យក្មេងស្រីវ័យក្មេងពីរនាក់ស្វែងរកគ្នាទៅវិញទៅមក។

ពីទីនោះ មិត្តភាពដ៏រឹងមាំមួយត្រូវបានបង្កើតឡើង យកឈ្នះលើអាយុ (Taylor ចាស់ជាង Selena ៣ ឆ្នាំ) និងការប្រជែងគ្នាក្នុងឧស្សាហកម្ម។ ក្នុងរយៈពេល ១៦ ឆ្នាំកន្លងមកនេះ Taylor និង Selena បានឆ្លងកាត់ព្រឹត្តិការណ៍ដ៏គួរឲ្យចងចាំរាប់មិនអស់ជាមួយគ្នាក្នុងអាជីព និងជីវិតផ្ទាល់ខ្លួនរបស់ពួកគេ។ ពួកគេបង្ហាញខ្លួននៅលើកម្រាលព្រំក្រហមជាមួយគ្នា គាំទ្រអាជីពរបស់គ្នាទៅវិញទៅមក និងចំណាយពេលលេងជាមួយគ្នា។

យោងតាមព័ត៌មានចុងក្រោយដែលកាសែត Daily Mail បានដឹង ពិធីមង្គលការរបស់ Selena និង Benny កាន់តែខិតជិតមកដល់ហើយ។ ប្រភពជិតស្និទ្ធមួយបាននិយាយថា តារាទាំងពីរគ្រោងនឹងរៀបចំពិធីមង្គលការរយៈពេលពីរថ្ងៃនៅឯវិមានដ៏ប្រណិតតម្លៃ ៣៥ លានដុល្លាររបស់ពួកគេក្នុងរដ្ឋកាលីហ្វ័រញ៉ា នៅខែកញ្ញាខាងមុខនេះ។ ពិធីមង្គលការនឹងប្រព្រឹត្តទៅតាមការស្បថរបស់កាតូលិក (Selena Gomez) និងជនជាតិជ្វីហ្វ (Benny Blanco)។ គូស្នេហ៍មួយគូនេះសង្ឃឹមថា ថ្ងៃដ៏ធំរបស់ពួកគេនឹងមានភាពស្និទ្ធស្នាល ឯកជន និងពោរពេញដោយទំនាក់ទំនងផ្ទាល់ខ្លួន។

ថ្មីៗនេះ ព័ត៌មានអំពីពេលដែល Selena Gomez និង Benny Blanco នឹងរៀបការកំពុងទទួលបានការចាប់អារម្មណ៍យ៉ាងខ្លាំងពីមហាជន។ ទស្សនិកជនបានផ្ញើសារអបអរសាទរដល់គូស្នេហ៍តារា។ ប្រសិនបើព័ត៌មានដែលចុះផ្សាយដោយ Daily Mail ជាការពិតនោះ ពិធីមង្គលការរបស់ពួកគេនឹងក្លាយជាព្រឹត្តិការណ៍កម្សាន្តដ៏ក្តៅគគុកបំផុត ដែលគ្របដណ្តប់ប្រព័ន្ធផ្សព្វផ្សាយ និងបណ្តាញសង្គមទូទាំងពិភពលោកនៅខែកញ្ញាខាងមុខនេះ។ ប្រព័ន្ធផ្សព្វផ្សាយបានទាក់ទងទៅតំណាងសិល្បករទាំងពីរដើម្បីបញ្ជាក់ពីថ្ងៃរៀបការ ប៉ុន្តែទាំង Selena និង Benny មិនបានឆ្លើយតបទេ៕