នាយ ពាក់មី ស្នើសប្បុរសជនចូលរួមមូលនិធិធ្វើផ្ទះឱ្យយោធិនរហ័សនាម “Rambo ខ្មែរ” មានផ្ទះនៅនឹងគេ

នាយ ពាក់មី ផ្តួចផ្តើមគំនិតជួយសង់ផ្ទះជូនយោធិនមួយរូប ដែលមហាជនឱ្យរហ័សនាមថា “Rambo ខ្មែរ” បន្ទាប់ពីមើលឃើញពីទុក្ខលំបាករបស់លោក និងក្រុមគ្រួសារ ដែលស្ថិតក្នុងស្ថានភាពក្រលំបាក គ្មានផ្ទះសម្បែង និងកំពុងស្នាក់អាស្រ័យផ្ទះរបស់សាច់ញាតិ។

តាមរយៈសំណេរលើទំព័រហ្វេសប៊ុកផ្លូវការ រាត្រីថ្ងៃទី០២ សីហានេះ នាយ ពាក់មី អំពាវនាវសប្បុរសដូច្នេះថា “សូមបងប្អូន​ជួយឱ្យគាត់មានផ្ទះនៅនឹងគេផង”។ ទន្ទឹមនេះ នាយ ពាក់មី អះអាងដែរថា ជុំវិញកិច្ចការងារសាងសង់ផ្ទះជូនយោធិនរូបនេះ គឺលោកជាអ្នកធ្វេីការងារនេះ​ដោយផ្ទាល់​។

បើតាមវីដេអូសម្ភាស នាយ ពាក់មី បញ្ជាក់ដែរថា ក្នុងមូលនិធិជួយសង់ផ្ទះជូនគ្រួសារយោធិនរូបនេះ គឺត្រូវការទិញទាំងដីផងដែរ ដោយតម្លៃដីជាប់ទីតាំងផ្ទះសាច់ញាតិរបស់គាត់នោះ តម្លៃ ១១០០០ដុល្លារ ។ ចំណែកឯការចំណាយលើការសាងសង់ផ្ទះ នាយ ពាក់មី នឹងបន្តស្នើសុំទៅកាន់ឧកញ៉ាៗ និងសប្បុរសជនដទៃទៀត។

សូមស្តាប់វីដេអូសម្ភាសលម្អិត៖

ជាមួយនឹងការស្នើសុំនេះ មហាជនបានសម្តែងការគាំទ្រពេញទំហឹង។ ក្នុងចំណោមនោះ មានមតិភាគច្រើនលើកឡើងថា សម្រាប់វីរៈកងទ័ពកម្ពុជា គួរតែទទួលបានការគិតគូរនិងយកចិត្តទុកដាក់។ ខ្លះទៀត លើកឡើងថា “ជាពេលវេលាបង្ហាញការដឹងគុណសម្រាប់កងទ័ពការពារជាតិ”។

គួររម្លឹកថា យោធិនរូបនេះ ក៏មិនខុសពីពលទាហានខ្មែរពលីជាច្រើនរូបផ្សេងទៀតនោះដែរ។ កំឡុងពេល ដែលសៀមឈ្លានពានកម្ពុជា លោកបានចូលរួមប្រយុទ្ធយ៉ាងអង់អាចក្លាហាន តទល់នឹងសត្រូវឈ្លានពាន ខណៈទទួលបានការកោតសរសើរពីសំណាក់មហាជនកម្ពុជាគ្រប់ៗគ្នា។ ដោយហេតុនេះ នាយ ពាក់មី ក៏សន្យាសង់ផ្ទះជូនយោធិនរូបនេះ ដើម្បីមានលំនៅជាក់លាក់នឹងគេ អាចបន្តប្រកបការងារចិញ្ចឹមកូនៗដោយមិនកង្វល់ច្រើនទៅថ្ងៃមុខ៕