ក្រុមហ៊ុនអាមេរិក Argentem Creek គ្រោងវិនិយោគលើវិស័យហិរញ្ញវត្ថុនៅកម្ពុជា

ក្រុមហ៊ុន Argentem Creek គឺជាក្រុមហ៊ុនបណ្តាក់ទុនវិនិយោគដ៏សំខាន់មួយ​អាមេរិកកំពុងសិក្សាស្វែងរកឱកាសវិនិយោគលើកវិស័យហិរញ្ញវត្ថុនៅក្នុងប្រទេសកម្ពុជា ដែលជាយុទ្ធសាស្រ្តនៃការពង្រីកអាជីវកម្មរបស់ខ្លួននៅក្នុងតំបន់។

ការលើកឡើងអំពីផែនការវិនិយោគនេះត្រូវបានធ្វើឡើងក្នុងជំនួបរវាងលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា (NBC) និងលោក Maarten Terlouw ប្រធាន និងសហប្រធានផ្នែកវិនិយោគរបស់ក្រុមហ៊ុនអាមេរិក Argentem Creek និងសហការី ចូលជួបពិភាក្សាការងារ នាថ្ងៃទី៤ ខែសីហា ឆ្នាំ២០២៥ នៅធនាគារជាតិនៃកម្ពុជា អគារសែនសុខ ​។

បើយោងតាម NBC ក្រុមហ៊ុន Argentem Creek គឺជាក្រុមហ៊ុនបណ្តាក់ទុនវិនិយោគដ៏សំខាន់មួយក្នុងក្រុមហ៊ុន Salmon Group ដែលជាប្រតិបត្តិករបច្ចេកវិទ្យាហិរញ្ញវត្ថុនៅប្រទេសហ្វីលីពីន និងកំពុងស្វែងរកឱកាសពង្រីកអាជីវកម្មនៅក្នុងតំបន់ រួមទាំងប្រទេសកម្ពុជា។

ក្នុងជំនួបនេះ លោក Pravel Fedorov ប្រធានប្រតិបត្តិ និងសហស្ថាបនិកក្រុមហ៊ុន Salmon Group បានលើកឡើងអំពីវឌ្ឍនភាពអាជីវកម្មរបស់ក្រុមហ៊ុន Salmon Group គំរូអាជីវកម្មដែលផ្តោតលើហិរញ្ញវត្ថុឌីជីថល និងសារៈសំខាន់នៃបទប្បញ្ញាត្តិដែលមានភាពអំណោយផលសម្រាប់ជំរុញការអភិវឌ្ឍនវានុវត្តហិរញ្ញវត្ថុថែមទៀត។

លោកស្រីបណ្ឌិត ជា សិរី បានស្វាគមន៍ចំពោះការចាប់អារម្មណ៍លើសក្តានុពលវិនិយោគក្នុងវិស័យហិរញ្ញវត្ថុកម្ពុជា និងបានមានប្រសាសន៍ពីច្បាប់ស្តីពីវិនិយោគកម្ពុជាដែលមានលក្ខណៈបើកចំហរសម្រាប់វិនិយោគិនបរទេស ព្រមទាំងការអភិវឌ្ឍហេដ្ឋារចនាសម្ព័ន្ធហិរញ្ញវត្ថុដែលមានលក្ខណៈអំណោយផល។

លោកស្រីបណ្ឌិត ​បានណែនាំ និងផ្តល់អនុសាសន៍ពីជម្រើសសំខាន់ៗមួយចំនួនសម្រាប់ការចូលមកវិនិយោគក្នុងវិស័យហិរញ្ញវត្ថុកម្ពុជាលើកដំបូងឱ្យទទួលបានជោគជ័យ ដើម្បីផ្តល់ជាសារដ៏សំខាន់ក្នុងការផ្តល់ទំនុកចិត្តនិងការទាក់ទាញវិនិយោគបន្ថែមទៀតមកកម្ពុជា។

 លោកស្រីក៏បានលើកទឹកចិត្តឱ្យបន្តទំនាក់ទំនងជាមួយមន្រ្តីជំនាញដើម្បីផ្លាស់ប្តូរព័ត៌មាន សំដៅធ្វើការសម្រេចចិត្តវិនិយោគត្រឹមត្រូវ ព្រមទាំងបានជំរុញឱ្យក្រុមវិនិយោគិនទៅទស្សនាសារមន្ទីរព្រះស្រីឦសានវរ្ម័ន (ស.ស.រ.) ផងដែរ ដើម្បីឈ្វេងយល់ពីប្រវត្តិសេដ្ឋកិច្ច និងរូបិយវត្ថុកម្ពុជា។

យោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជាបង្ហាញថា ប្រព័ន្ធទូទាត់សង​ប្រាក់​ឌីជីថល បានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ និងលើកកម្ពស់បរិយាបន្ន​ហិ​រញ្ញវត្ថុ។

ការអភិវឌ្ឍ និងធ្វើទំនើបកម្មហេដ្ឋារចនាសម្ព័ន្ធប្រព័ន្ធទូទាត់សងប្រាក់ ជាកត្តា​សំខាន់​ក្នុង​ការ​លើក​កម្ពស់លទ្ធភាពធ្វើប្រតិបត្តិការឆ្លងគ្នារវាងគ្រឹះស្ថានធនាគារ ដែលនឹងរួមចំណែកបង្កើនប្រសិទ្ធភាព​នៃការទូទាត់អន្តរធនាគារ។

ជាក់ស្ដែងធនាគារជាតិនៃកម្ពុជា បានដាក់ឱ្យដំណើរការសាកល្បងប្រព័ន្ធទូទាត់សងប្រាក់រួម កាល​ពី​ខែឧសភា ឆ្នាំ ២០២៤ និងមានគ្រឹះស្ថានធនាគារ និងហិរញ្ញវត្ថុចំនួន ៥២ បានដាក់ឱ្យដំណើរ​ការ​សាកល្បងប្រព័ន្ធ។

នៅក្នុងឆ្នាំ ២០២៤ ប្រតិបត្តិការបញ្ជាទូទាត់សងប្រាក់អេឡិកត្រូនិកជាប្រាក់រៀលជាង ៣ ម៉ឺន ៧ ពាន់ប្រតិបត្តិការកើនឡើង ៣៣,៥៥% ដែលមានទំហំទឹកប្រាក់ ៥២៣៦ ប៊ីលានរៀល កើនឡើង ៧,៣៨%។

ចំណែកឯចំនួនប្រតិបត្តិការ​បញ្ជាទូទាត់សងប្រាក់​អេឡិច​ត្រូនិកជាប្រាក់ដុល្លារជាង ៦១ ម៉ឺន​ប្រតិបត្តិ​​ការ​​ថយចុះ ៣,៣៣% គិតជាទំហំទឹកប្រាក់ជាង ១៥ ពាន់លាន​ដុល្លារ​(១៥៣៩៣) កើន​ឡើង​១៧,៣៤% ធៀប​នឹងឆ្នាំ ២០២៣៕