ព័ត៌មានជាតិ

កម្ពុជាប្រាប់ថៃឱ្យគោរពនូវសំដីរបស់ខ្លួនចំពោះបទឈប់បាញ់

បានផុស

១១ ខែ មុន

នៅ

ថ្ងៃអង្គារ ៥ សីហា ២០២៥

ដោយ

អ្នកនាំពាក្យក្រសួងការបរទេសលោក ជុំ សុន្ទរី បានប្រាប់ទៅប្រទេសថៃឱ្យគោរពនូវការសន្យារបស់ខ្លួនចំពោះបទឈប់បាញ់ ត្រូវបញ្ឈប់ការបង្ករឿងផ្នែកយោធា និងសកម្មភាពឯកតោភាគីដែលធ្វើឱ្យប៉ះពាល់ដល់សន្ដិសុខធ្វើឱ្យស្ថានភាពតានតឹងបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្នីសិទសារព័ត៌មានព្រឹកថ្ងៃទី៥ ខែសីហា ឆ្នាំ២០២៥នេះ លោក ជុំ សុន្ទរី បានបញ្ជាក់ថាកម្ពុជាជាប្រទេសគោរពនូវច្បាប់ និងបទដ្ឋានច្បាប់អន្តរជាតិ និងបំពេញបានយ៉ាងពេញលេញចំពោះបទឈប់បាញ់ ដែលខុសពីថៃដែលបង្ករឿងផ្នែកយោធាជាបន្តបន្ទាប់មកលើកម្ពុជាក្រោយបទឈប់បាញ់។

លោកបន្ថែមថា៖ «សូមធ្វើឱ្យមានភាពស៊ីគ្នារវាងការប្រកាសជាសាធារណៈនៃការតាំងចិត្តរបស់ខ្លួនចំពោះសន្ដិភាពជាមួយនឹងសកម្មភាពជាក់ស្ដែងតាមរយៈការអនុវត្តដោយសុទ្ធចិត្តនៃកិច្ចព្រមព្រៀងឈប់បាញ់គ្នា។ សូមឱ្យជៀសវាងនូវការធ្វើឱ្យមានភាពតានតឹងថែមទៀត ហើយនឹងការផ្សាយព័ត៌មានមិនពិតដែលគំរាមកំហែងដល់សន្ដិសុខដ៏ផុយស្រួលហើយនឹងស្ថេរភាពនៅតាមបណ្ដោយព្រំដែនប្រទេសទាំងពីរ»។

ការលើកឡើងរបស់អ្នកនាំពាក្យក្រសួងការបរទេសកម្ពុជាគឺបន្ទាប់ពីថៃបានព្យាយាមបង្ករឿងជាបន្តបន្ទាប់តាមខ្សែបន្ទាត់ព្រំដែនបន្ទាប់ពីមានបទឈប់បាញ់។ ព្រឹត្តិការណ៍ចុងក្រោយគឺការចូលមករាយបន្លាលួសនៅច្រកព្រំដែនអានសេះ ក្នុងខេត្តព្រះវិហារ ទឹកដីកម្ពុជាកាលពីថ្ងៃទី៤ ខែសីហា ឆ្នាំ២០២៥ ដែលជាសកម្មភាពបំពានបទឈប់បាញ់រវាងប្រទេសទាំងពីរ។

នៅមិនទាន់មានព័ត៌មានបន្ថែមយ៉ាងណាទេចំពោះស្ថានភាពច្រកអានសេះ ដោយអ្នកនាំពាក្យក្រសួងការពារជាតិលោកស្រី ម៉ាលី សុជាតា ថានឹងធ្វើការផ្ដល់ព័ត៌មាននៅក្នុងសន្នីសិទសារព័ត៌មានពេលក្រោយ។

ជម្លោះប្រដាប់អាយុរយៈពេល៥ថ្ងៃរវាងកម្ពុជានិងថៃបណ្ដាលឱ្យមានទាហានស្លាប់ និងរបួសជាច្រើននាក់ ដែលផ្ដើមចេញពីការឈ្លានពានរបស់ថៃនៅប្រាសាទតាមាន់ធំដោយបានរាយបន្លាលួស និងបាញ់ប្រហារមកលើទាហានខ្មែរមុន។ ជម្លោះនេះបានឈានដល់បទឈប់បាញ់មួយនៅថ្ងៃទី២៨ បន្ទាប់ពីមានការជួបគ្នារវាងនាយករដ្ឋមន្ត្រីកម្ពុជា និងនាយករដ្ឋមន្ត្រីស្ដីទីថៃ ក្រោមការសម្របសម្រួលដោយម៉ាឡេស៊ី ដោយផ្ដួចផ្ដើមគំនិតដោយសហរដ្ឋអាមេរិក និងតាមដានដោយប្រទេសចិន៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ