តំណាង ICRC ទៅដល់ទីតាំង ដើម្បីសួរសុខទុក្ខទាហានកម្ពុជា ដែលត្រូវថៃ ចាប់ខ្លួនទាំងបំពាន

តាមការបញ្ជាក់ពីកងទ័ពថៃ, នៅថ្ងៃអង្គារទី៥ខែសីហាឆ្នាំ២០២៥ តំណាងកាកបាទក្រហមអន្តរជាតិ (ICRC) បានទៅសួរសុខទុក្ខនិងពិនិត្យមើលសុខុមាលភាពនៃទាហានកម្ពុជាទាំង១៨រូប ដែលថៃចាប់ខ្លួនទៅទាំងបំពាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលបំណងនៃការពិនិត្យរបស់ ICRC ដល់ទីតាំងនេះ គឺដើម្បីបញ្ជាក់ឲ្យច្បាស់ថា ថៃ ធ្វើទង្វើបែបណាចំពោះទាហានកម្ពុជា មានមើលថែ ធ្វើបាបឬធ្វើទារុណកម្មអ្វីឬក៏អត់?

ទោះបីជាយ៉ាងណាក៏ដោយ មិនមានការបញ្ចេញរូបថត អំពីស្ថានភាពទាហានកម្ពុជាទាំង១៨រូបទេ ហើយតំណាង ICRC ក៏មិនទាន់ចេញសេចក្តីរាយការណ៍អ្វីដែរ។

សូមរម្លឹកថា កាលពីព្រឹកថ្ងៃទី២៩ខែកក្កដា ក្នុងពេលកងទ័ពកម្ពុជា អត់ធ្មត់ខ្ពស់គោរពបទឈប់បាញ់ កងទ័ពថៃបែរជាឈ្លានពាននឹងបំពានបទឈប់បាញ់ ដោយប្រើល្បិចលបលួចចាប់ទាហានកម្ពុជាចំនួន២០រូបយកទៅទឹកដីខ្លួន បំពានច្បាប់មនុស្សធម៌អន្តរជាតិ។

មកទល់ពេលនេះ ថៃទើបបញ្ជូនយោធិនកម្ពុជាមកវិញបានតែ២រូបប៉ុណ្ណោះ ដោយក្នុងនោះមានម្នាក់រងរបួសធ្ងន់មិនអាចដើរបាន និងម្នាក់ទៀតវង្វេងស្មារតី។

ទោះជាស្ថានការណ៏មានការវិវត្តប្រែប្រួលយ៉ាងណាក៏ដោយ សម្ដេច ហ៊ុន ម៉ាណែត អះអាងថា រាជរដ្ឋាភិបាលកម្ពុជា នៅតែបន្តតាមដានដោយយកចិត្តទុកដាក់បំផុត ចំពោះសុវត្ថិភាពរបស់យោធាកម្ពុជាចំនួន១៨រូប ដែលកំពុងស្ថិតក្នុងការឃុំខ្លួនរបស់អាជ្ញាធរថៃ និងកំពុងចាត់វិធានការតាមយន្តការចាំបាច់ផ្សេងៗ ដើម្បីឲ្យមានការដោះលែងយោធាកម្ពុជាឲ្យបានឆាប់បំផុត និងមានសុវត្ថិភាព៕

អត្ថបទ៖ សុខ សុវណ្ណ

ចុចអាន៖ ថៃ ប្រាប់ថា ខ្លួនអនុញ្ញាតឲ្យ ICRC និងអង្គការអន្តរជាតិផ្សេងទៀត មកពិនិត្យសុខុមាលភាពទាហានកម្ពុជាទាំង១៨រូប