កីឡា

យប់នេះ ក្រុមនារីកម្ពុជា ប៉ះ វៀតណាម លើកទី៥ ក្នុងប្រវត្តិសាស្ត្រ

បានផុស

១១ ខែ មុន

នៅ

ថ្ងៃពុធ ៦ សីហា ២០២៥

ដោយ

ក្រុមបាល់ទាត់ជម្រើសជាតិនារី កម្ពុជា ត្រូវប្រកួតជាមួយ ក្រុមនារីវៀតណាម វេលាម៉ោង ៧:៣០នាទី យប់ថ្ងៃពុធ ទី៦ ខែសីហា ឆ្នា ២០២៥ វគ្គសន្សំពិន្ទុក្នុងពូលពានរង្វាន់នារីអាស៊ាន ASEAN Women’s Championship នៅប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនារីវៀតណាមជាក្រុមខ្លាំងមួយនៅតំបន់អាស៊ានដែលមានបទពិសោធក្នុងការប្រកួតលើឆាកអន្តរជាតិជាច្រើនឆ្នាំមកហើយ ប្រៀបធៀបនឹងក្រុមនារីកម្ពុជាជាក្រុមក្មេងខ្ចីទើបមានសកម្មភាពផ្លូវលើឆាកអន្តរជាតិកាលពីឆ្នាំ ២០១៨។

នេះជាការជួបគ្នាលើកទី៥ ក្នុងប្រវត្តិសាស្ត្រសម្រាប់បាល់ទាត់នារីទាំងពីរ។ ៤លើកកន្លងមក ក្រុមនារីកម្ពុជាមិនធ្លាប់យកឈ្នះវៀតណាមឡើយ។ កាលពីឆ្នាំ ២០១៩ ក្រុមនារីកម្ពុជា បានចាញ់ នារី វៀតណាម ០-១០ ក្នុងពាននារីអាស៊ាន, ឆ្នាំ ២០២១ ចាញ់ ១-៦ ក្នុងកីឡាស៊ីហ្គេម, ឆ្នាំ ២០២២ ចាញ់ ០-៣ ក្នុងពាននារីអាស៊ាន និងឆ្នាំ ២០២៣ បានចាញ់ ០-៣ ក្នុងកីឡាស៊ីហ្គេម។

ទោះបីជាយ៉ាងណា សង្កេតឃើញថា ក្រុមនារីកម្ពុជាបានកាត់បន្ថយពីការចាញ់ដោយគ្រាប់បាល់ច្រើនមកសល់តិចគ្រាប់។ សម្រាប់ការប្រកួតលើកទី៥នេះ ក្រុមនារីកម្ពុជាក៏មិនសង្ឃឹមឈ្នះដែរ ខណៈសមាជិកល្អៗមួយចំនួនមិនបានចូលរួមជាមួយទេ។ កីឡាការិនីខ្លះជាប់ជួយក្រុមសម្រាប់ពានរង្វាន់អាស៊ី និងកីឡាការិនីខ្លះនៅប្រទេសវៀតណាម។ ជាក់ស្តែងកីឡាការិនីល្អៗរបស់ក្រុមនារីភ្នំពេញក្រោនមិនបានចូលរួមជាមួយទេដោយសារពួកគេត្រូវជួយក្លិបសម្រាប់ការប្រកួតពានក្លិបនារីអាស៊ី AFC Women’s Champions League។

ក្រុមបាល់ទាត់នារីកម្ពុជា ធ្លាប់បានចូលរួមប្រកួតពាននារីអាស៊ាន ASEAN Women’s Championship ៤ លើកគិតទាំងឆ្នាំ ២០២៥ បន្ទាប់ពីលើកទី១ ឆ្នាំ ២០១៨ លើកទី២ ឆ្នាំ ២០១៩ និងលើកទី៣ ឆ្នាំ ២០២២។ ៣លើកកន្លងមក ក្រុមនារីកម្ពុជា បានឆ្លងកាត់ការប្រកួតសរុប ១១ លើកគឺ ឈ្នះ ២ លើក ស្មើ ១ លើក និងចាញ់ ៨ លើក ក្នុងនោះ បានស៊ុតចូលដៃគូចំនួន ១៧គ្រាប់ និងត្រូវបានដៃគូស៊ុតចូល ៥៩គ្រាប់៕