កីឡា

គ្រូខ្មែរ ៣ រូប ប្រជែងគ្រូបរទេស ៨ រូប ក្នុងលីគកម្ពុជា ចាប់ផ្តើមចុងសប្តាហ៍នេះ

បានផុស

១០ ខែ មុន

នៅ

ថ្ងៃពុធ ៦ សីហា ២០២៥

ដោយ

លីគបាល់ទាត់កំពូលកម្ពុជា រដូវកាល ២០២៥-២៦ នឹងចាប់ផ្តើមបើកទំព័រប្រវត្តិសាស្ត្រនៅថ្ងៃសៅរ៍ ទី៩ ខែសីហា ឆ្នាំ ២០២៥ ដោយមានក្លិបចំនួន ១១ ត្រូវប្រកួតប្រជែង។

រដូវកាលថ្មីនេះត្រូវបានចាត់ទុកជាការប្រកួតដែលមានការប្រកួតប្រជែងកម្រិតខ្ពស់បំផុតមិនធ្លាប់មាន បន្ទាប់ពីក្លិបជាច្រើនបានរៀបចំក្រុមយ៉ាងខ្លាំងបំផុតគឺការបញ្ចេញកីឡាករ និងនាំចូលកីឡាករថ្មី។ ក្នុងនោះក្រុមការងារគ្រូបង្វឹកក៏កាន់តែឈានដល់កម្រិតស្តង់ដា។

ក្លិបទាំង ១១ នាក់ដឹកនាំដោយគ្រូបង្វឹកជនជាតិខ្មែរ ៣ រូប និងជនជាតិបរទេស ៨ រូបដែលត្រូវប្រជែងគ្នា។ លោក Mattew McConkey គ្រូបង្វឹកព្រះខ័នរាជស្វាយរៀងក្មេងជាងគេ និង លោក Satyasagara គ្រូបង្វឹកគិរីវង់សុខសែនជ័យអាយុច្រើនជាង។

លោក ទុំ សារ៉ាយ / អាយអេសអាយ ដង្កោសែនជ័យ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទុំ សារ៉ាយ ជនជាតិខ្មែរ អាយុ ៣៣ ឆ្នាំ បានដឹកនាំ អាយអេសអាយ ដង្កោសែនជ័យ កាលពីពាក់កណ្តាលរដូវកាលមុន (២០២៤-២៥)។ លោកធ្លាប់ដឹកនាំក្រុមអគ្គិសនីកម្ពុជា និងក្រុមយុវជនអាយអេសអាយ ដង្កោសែនជ័យ ពីឆ្នាំ ២០២២ ដល់ ២០២៣។

លោក ឃីម បូរី / ណាហ្គាវើលដ៍

លោក ឃីម បូរី ជនជាតិខ្មែរ អាយុ ៣៥ ឆ្នាំ បានដឹកនាំណាហ្គាវើលដ៍ កាលពីឆ្នាំ ២០២២។ ណាហ្គាវើលដ៍ជាក្លិបទី១សម្រាប់លោកក្នុងនាមជាគ្រូបង្វឹក បន្ទាប់ពីមានបទពិសោធច្រើនក្នុងអាជីពជាកីឡាករ។

លោក ភា សុភក្ត្រា / កងយោធពលខេមរភូមិន្ទ

លោក ភា សុភក្ត្រា ជនជាតិខ្មែរ អាយុ ៤៣ ឆ្នាំ ធ្លាប់បានដឹកនាំក្រុម កងយោធពលខេមរភូមិន្ទជាច្រើនលើក និងធ្លាប់ដឹកនាំក្រុមបាល់ទាត់យុវជនជម្រើសជាតិកម្ពុជាផងដែរ។

លោក Sotaro Yasunaga / អង្គរថាយហ្គឺរ

លោក Sotaro Yasunaga ជនជាតិជប៉ុន អាយុ ៤៩ ឆ្នាំ ចូលមកដឹកនាំ អង្គរថាយហ្គឺរ នៅឆ្នាំ ២០២៥ បន្ទាប់ពីលោកដឹកនាំក្រុម SC Sagamihara ក្នុងលីគជប៉ុនលំដាប់ទី៣។

លោក Conor Nestor / បឹងកេត

លោក Conor Nestor ជនជាតិអៀរឡង់ អាយុ ៤១ ឆ្នាំ ចូលដឹកនាំ បឹងកេត តាំងពីពាក់កណ្តាលរដូវកាលមុន។ លោកធ្លាប់ដឹកនាំ ព្រះខ័នរាជស្វាយរៀងពីឆ្នាំ ២០១៨ ដល់ ២០២៣។

លោក Satyasagara / គិរីវង់សុខសែនជ័យ

លោក Satyasagara ជនជាតិសិង្ហបុរី អាយុ ៦១ ឆ្នាំ បានចូលមកដឹកនាំ គិរីវង់សុខសែនជ័យ នៅឆ្នាំ ២០២៥។ លោកមានបទពិសោធច្រើនដឹកនាំក្រុមដូចជា Houngang United, Chennai City និង Young Elephants ព្រមទាំងក្រុមនារីសិង្ហបុរី ពីឆ្នាំ ២០១៥ ដល់ ២០២៣។

លោក Heo Jae-won / ឡាយហ្វ ខេត្តព្រះសីហនុ

លោក Heo Jae-won ជនជាតិកូរ៉េខាងត្បូង អាយុ ៤១ ឆ្នាំ ចូលមកដឹកនាំ ឡាយហ្វ ខេត្តព្រះសីហនុ នៅឆ្នាំ ២០២៥។ លោកជាអតីតកីឡាករជម្រើសជាតិកូរ៉េកម្រិត U20 និង U23 ហើយក្លិបនៅកម្ពុជាគឺជាលើកដំបូងដែលបានក្លាយជាគ្រូបង្វឹក។

លោកគ្រូ Alex Dorado / អឹមអូអាយ កំពង់ដេវ៉ា

លោកគ្រូ Alex Dorado សញ្ជាតិអេស្ប៉ាញ អាយុ ៤០ ឆ្នាំ បានក្លាយជាគ្រូបង្វឹក អឹមអូអាយ កំពង់ដេវ៉ា នៅឆ្នាំ ២០២៥។ លោកធ្លាប់ជាគ្រូបង្វឹករបស់ក្រុមថ្នាលយុវជន Real Madrid ពីឆ្នាំ ២០១២-១៨។

លោក Oleg Starynskyi / ភ្នំពេញក្រោន

លោក Oleg Starynskyi ជនជាតិអ៊ុយក្រែន អាយុ ៣៩ ឆ្នាំ បានដឹកនាំភ្នំពេញក្រោន ទាំងកម្រិត U19 នៅឆ្នាំ ២០១៦ ដឹកនាំក្រុមធំលើកទី១ ចន្លោះឆ្នាំ ២០១៦-១៧ និងដឹកនាំលើកទី២ តាំងពីឆ្នាំ ២០២០។ លោកជាគ្រូបង្វឹកដែលមានបទពិសោធច្រើនក្នុងលីគកំពូលកម្ពុជា។

លោក Gerard Jones / វិសាខា

លោក Gerard Jones ជនជាតិអង់គ្លេស អាយុ ៣៦ឆ្នាំ បានចូលមកដឹកនាំ វិសាខា នៅឆ្នាំ ២០២៥។ លោកមានបទពិសោធច្រើនទាំងគ្រូបង្វឹក និងគ្រូបង្រៀនជំនាញគ្រូបង្វឹកបាល់ទាត់ពីឆ្នាំ ២០១០ រហូតដល់ ២០២៥។

លោក Mattew McConkey / ព្រះខ័នរាជស្វាយរៀង

លោក Mattew McConkey ជនជាតិអៀរឡង់ អាយុ ៣២ ឆ្នាំ បានក្លាយជាគ្រូបង្គោលក្លិប ព្រះខ័នរាជស្វាយរៀង នៅឆ្នាំ ២០២៥ បន្ទាប់ពីធ្វើការនៅក្លិបជើងឯកលីគកម្ពុជាមួយនេះក្នុងនាមជាគ្រូជំនួយអស់រយៈពេល ៤ រដូវកាល៕

អត្ថបទ៖ វីរបុត្រ

Related Topics:ខេមបូឌានលីគ (Cambodian Premier League)

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា