ថៃ កំពុងបង្ហាញពិភពលោកថា ជាប្រទេសគ្មានសុវត្ថិភាព សម្រាប់ទេសចរ

ករណីប្រើអំពើហិង្សាលើទេសចរម្តងហើយម្តងទៀតនៅថៃ ជាពិសេសហេតុការណ៍យ៉ាងរន្ធត់ចុងក្រោយបំផុត ដែលជនជាតិម៉ាឡេស៊ី២នាក់ ត្រូវដុតទាំងរស់នៅកណ្តាលក្រុងបាងកក បានស្តែងឲ្យពិភពលោកឃើញយ៉ាងច្បាស់ថា ប្រទេសនេះគ្មានសុវត្ថិភាពឡើយចំពោះទេសចរ។

ទេសចរម៉ាឡេស៊ី២នាក់ជាគូស្នេហ៍នឹងគ្នាឈ្មោះ Gan Xiao Zhen និង Ong Yik Leong ត្រូវបុរសគ្មានការងារធ្វើម្នាក់វាយនិងដុតពួកគេនៅជិតផ្សារទំនើបមួយលើផ្លូវ Ratchadamri ក្នុងទីក្រុងបាងកក កាលពីរាត្រីថ្ងៃព្រហស្បតិ៍សប្ដាហ៍មុន បង្កការភ្ញាក់ផ្អើលទូទាំងពិភពលោក។

ករណីនេះធ្វើឲ្យទេសចរដទៃទៀតខ្លាចរអាក្នុងការទៅលេងថៃ និងជាសារដាស់តឿនដល់ទេសចរទាំង​ឡាយថា ប្រទេសនេះកាន់តែអសន្តិសុខ គ្មានសណ្តាប់ធ្នាប់ និងមិនធានាសុវត្ថិភាពពួកគេបានឡើយ។

ការវាយប្រហារនេះគឺជាបញ្ហាប្រឈមដ៏ធំ ចំពោះវិស័យទេសចរណ៍របស់ថៃ ខណៈប្រទេសនេះកំពុងខិតខំខ្លាំងណាស់ ដើម្បីស្តារឡើងវិញឲ្យដល់កម្រិតមុនវិបត្តិជំងឺកូវីដ១៩។

ជនជាតិ​ចិននិង​ម៉ាឡេស៊ី ជា​​ទេសចរ​បរទេស​ឈានមុខគេដែលទៅលេងប្រទេសថៃ ដូច្នេះហើយ ហេតុការណ៍ទេសចរទាំងពីរនាក់នេះ គឺជាក្តីបារម្ភកំពូលរបស់ថៃ ព្រោះថា ព័ត៌មាននេះបានផ្សព្វផ្សាយទូទាំងពិភពលោក មិនមែនតែនៅក្នុងប្រទេសម៉ាឡេស៊ីឬចិនប៉ុណ្ណោះទេ។

នៅឆ្នាំ ២០២៤ ប្រទេសថៃបានទទួលទេសចរម៉ាឡេស៊ីប្រមាណ ៤,៩៥ លាននាក់ខណៈ ទេសចរចិន មានប្រមាណ ៦,៧៣ លាននាក់។

ដ្បិតតែគ្មានរបាយការណ៍ផ្លូវការអំពីករណីប្រើអំពើហិង្សាលើទេសចរបរទេសនៅថៃក៏ដោយ ប៉ុន្តែគេដឹងថា មិនមែនតិចដងឡើយដែលទេសចរបរទេសត្រូវរងការវាយប្រហារ ពេលដែលពួកគេទៅលេងកម្សាន្តក្នុងប្រទេសនេះ។ 

ទោះបីជាយ៉ាងណាក៏ដោយ បើយោងតាមរបាយការណ៍ចងក្រងក្នុងឆ្នាំ២០២៥, គិតត្រឹមខែកក្កដាឆ្នាំនេះប៉ុណ្ណោះ មានការប្រើអំពើហិង្សាលើទេសចរបរទេសចំនួន៥ករណីធំ កើតឡើងនៅក្នុងប្រទេសថៃ។

1. ថ្ងៃទី២៥ខែមីនា – ក្រុមជើងកាង វាយប្រហារទេសចរអាល្លឺម៉ង់នៅ ប៉ាតាយ៉ា

បុរសជនជាតិអាល្លឺម៉ង់អាយុ៤០ឆ្នាំម្នាក់ ត្រូវបានជើងកាងមួយក្រុម មានគ្នា១០នាក់ ព្រួតវាយដំយ៉ាងដំណំ នាវេលាម៉ោង ៤:០៦ នាទីទៀបភ្លឺ។ ប៉ូលិសចាប់បានជនសង្ស័យតែ៣នាក់ប៉ុណ្ណោះ។

2. ថ្ងៃទី២២ខែមេសា – ទេសចរតៃវ៉ាន់ម្នាក់ ត្រូវគេវាយនឹងដំបងនៅ ប៉ាតាយ៉ា

ទេសចរតៃវ៉ាន់អាយុ៤១ឆ្នាំម្នាក់ ត្រូវជនមិនស្គាល់មុខ វាយមួយដំបងបណ្តាលឲ្យរបួសក្បាលទាំងមិនដឹងមូលហេតុ ពេលកំពុងអង្គុយនៅខាងក្រៅភោជនីយដ្ឋានមួយ នាវេលាប្រហែលម៉ោង១០យប់ នៅក្នុងសង្កាត់ Nong Prue។

3. ថ្ងៃទី១១ខែឧសភា – ទេសចរបារាំង ត្រូវគេចាក់ពេលប្រវាយប្រតប់គ្នា ក្នុងក្លឹបរាត្រីនៅ ភូកេត

ជនជាតិបារាំងម្នាក់ ត្រូវមនុស្សមួយក្រុមចាក់ជាច្រើនកាំបិតនៅក្នុងក្លឹប Nomad Beach នៃខេត្តភូកេត បន្ទាប់ពីមានការប៉ះទង្គិចគ្នាដោយហិង្សា។

4. ថ្ងៃទី៨ខែមិថុនា – ទេសចររុស្ស៊ីម្នាក់ ត្រូវចោរប្លន់នៅ ប៉ាតាយ៉ា

ជនជាតិរុស្ស៊ីអាយុ៥៤ឆ្នាំម្នាក់ ត្រូវចោរវាយឲ្យសន្លប់ រួចប្លន់យកចិញ្ចៀននិងកាបូប។ មិនយូរប៉ុន្មាន ប៉ូលិសក្រុងប៉ាតាយ៉ាបានចាប់ខ្លួនជនសង្ស័យ២នាក់ ដែលសុទ្ធជាអ្នកញៀនថ្នាំ។

5. ថ្ងៃទី១២ខែកក្កដា – ភ្ញៀវទេសចរអាមេរិកម្នាក់ ត្រូវម្ចាស់បារនៅប៉ាតាយ៉ា វាយយ៉ាងដំណំ

ទេសចរអាមេរិកម្នាក់ ចាប់កាន់ទូរស័ព្ទថតនៅក្នុងបារមួយ ស្រាប់តែត្រូវម្ចាស់បារ វាយយ៉ាងដំណំ ក្នុងក្រុងប៉ាតាយ៉ា។ ជនរងគ្រោះ រងរបួសជាំនិងរលាត់ពេញខ្លួន៕

អត្ថបទ៖ សុខ សុវណ្ណ

ចុចអាន៖ ថៃ កំពុងក្រពុលមុខខ្លាំង ខ្លាចទេសចរបរទេសឈប់ទៅលេង ក្រោយហេតុការណ៍ ដុតជនជាតិម៉ាឡេស៊ី