ព័ត៌មានអន្ដរជាតិ

ណេតាន់យ៉ាហ៊ូ ប្រាប់ថានឹងបន្តកិច្ចចរចាជាមួយហាម៉ាស តែផែនការយោធាទ្រង់ទ្រាយធំនៅតែធ្វើ

បានផុស

១១ ខែ មុន

នៅ

ថ្ងៃសុក្រ ២២ សីហា ២០២៥

ដោយ

Chheang

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសថា អ៊ីស្រាអែលនឹងចូលរួមការចរចាឡើងវិញ ក្នុងគោលបំណងដោះលែងចំណាប់ខ្មាំងដែលត្រូវបានឃុំខ្លួននៅក្នុងតំបន់ហ្គាហ្សា និងបញ្ចប់សង្រ្គាម។ នេះកើតឡើងបន្ទាប់ពីក្រុមហាម៉ាសបានទទួលយកសំណើបទឈប់បាញ់បណ្ដោះអាសន្នពីអ្នកសម្រុះសម្រួលអេហ្ស៊ីប និងកាតា។

លោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណុចសំខាន់នៃកិច្ចព្រមព្រៀងបទឈប់បាញ់ថ្មីនេះ មានដូចជា ការផ្អាកការប្រយុទ្ធគ្នារយៈពេល៦០ថ្ងៃ ការដោះលែងចំណាប់ខ្មាំងអ៊ីស្រាអែល១០នាក់ដែលនៅរស់ និងសាកសព១៨នាក់ដែលក្រុមហាម៉ាសចាប់ខ្លួន ជាថ្នូរនឹងការដោះលែងអ្នកទោសប៉ាឡេស្ទីនប្រហែល ២០០នាក់។

ប្រសិនបើបទឈប់បាញ់បណ្តោះអាសន្នចាប់ផ្តើម កិច្ចពិភាក្សាបន្ថែមទៀតអំពីការបញ្ចប់សង្រ្គាមជាអចិន្ត្រៃយ៍ និងការដោះលែងចំណាប់ខ្មាំងដែលនៅសេសសល់ទាំងអស់នឹងកើតឡើង។

ទោះបីជាមានការពិភាក្សាក៏ដោយ លោក ណេតាន់យ៉ាហ៊ូ បានបញ្ជាក់ថា ផែនការនៅតែឆ្ពោះទៅមុខសម្រាប់ប្រតិបត្តិការយោធាដ៏សំខាន់របស់អ៊ីស្រាអែល ដើម្បីដណ្តើមគ្រប់គ្រងហ្គាហ្សាទាំងមូល។ រដ្ឋាភិបាលអ៊ីស្រាអែល បានកោះហៅទាហានបម្រុងចំនួន ៦០ ០០០នាក់ ដែលជាសញ្ញាមួយបង្ហាញថា ពួកគេកំពុងរៀបចំសម្រាប់ការវាយប្រហារទ្រង់ទ្រាយធំនេះ។

នៅពេលដែលការវាយលុកចាប់ផ្តើម ប្រជាជនប៉ាឡេស្ទីនរាប់សែននាក់នៅហ្គាហ្សា ត្រូវបានគេរំពឹងថានឹងត្រូវបានបញ្ជាឲ្យជម្លៀសទៅកាន់ភាគខាងត្បូងនៃតំបន់។

ផែនការនេះបានរងការថ្កោលទោសយ៉ាងខ្លាំងពីអន្តរជាតិ។ សម្ព័ន្ធមិត្តដូចជា បារាំងបានព្រមានថា អ៊ីស្រាអែលនឹងធ្វើឲ្យតំបន់ហ្គាហ្សាប្រឈមនឹងហានិភ័យនៃ«វដ្តសង្រ្គាមអចិន្ត្រៃយ៍» ខណៈពេលដែលកាកបាទក្រហម បានសង្កត់ធ្ងន់ថា វានឹង«ធ្វើឲ្យស្ថានការណ៍ដ៏មហន្តរាយរួចទៅហើយ»កាន់តែយ៉ាប់យ៉ឺនខ្លាំងសម្រាប់ជនស៊ីវិល។

សូមជម្រាបថា យោធាអ៊ីស្រាអែល បានចាប់ផ្តើមយុទ្ធនាការនៅតំបន់ហ្គាហ្សា ជាការឆ្លើយតបទៅនឹងការវាយប្រហារដឹកនាំដោយក្រុមហាម៉ាសលើភាគខាងត្បូងអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ ដែលក្នុងនោះមនុស្សប្រហែល ១ ២០០នាក់ត្រូវបានសម្លាប់ និង ២៥១នាក់ផ្សេងទៀតត្រូវបានចាប់ធ្វើជាចំណាប់ខ្មាំង។

យ៉ាងហោចណាស់មនុស្សជាង ៦២ ០០០នាក់ត្រូវបានសម្លាប់នៅហ្គាហ្សាចាប់តាំងពីពេលនោះមក។ នេះបើយោងតាមក្រសួងសុខាភិបាលនៅហ្គាហ្សា៕