ត្រាំ ថាខកចិត្តជាមួយ ពូទីន តែមិនបារម្ភពីទំនាក់ទំនងរុស្ស៊ីនិងចិននោះទេ

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី០៣ខែកញ្ញា ប្រធានាធិបតីអាមេរិកលោក ដូណាល់ ត្រាំ និយាយថា លោកមានការខកចិត្តចំពោះលោក វ៉្លាឌីមៀរ ពូទីន ដែលមិនព្រមចរចារជាមួយអ៊ុយក្រែន តែលោកមិនបានព្រួយបារម្ភអំពីទំនាក់ទំនងចិន និងរុស្ស៊ីដែលកំពុងកើនឡើងនោះទេ។

ប្រធានាធិបតីអាមេរិកលោក ដូណាល់ ត្រាំ បានសម្តែងការខកចិត្តចំពោះប្រធានាធិបតីរុស្ស៊ីលោក វ៉្លាឌីមៀរ ពូទីន ចំពោះការខកខានក្នុងការឆ្ពោះទៅមុខលើកិច្ចចរចាសន្តិភាពជាមួយអ៊ុយក្រែន ទោះបីជាលោក ត្រាំ ជំរុញឱ្យលោកជួបដោយផ្ទាល់ជាមួយមេដឹកនាំអ៊ុយក្រែនលោក វ៉ូឡូឌីមៀ ហ្សេលេនស្គី បន្ទាប់ពីកិច្ចប្រជុំកំពូលនៅAlaskaរបស់ពួកគេក៏ដោយ។

ផ្ទុយ​ទៅ​វិញ ទីក្រុង​ម៉ូស្គូ​បាន​បង្កើន​ការ​វាយ​ប្រហារ​តាម​អាកាស​លើ​ក្រុង​គៀវ ដែល​ធ្វើ​ឲ្យ​ភាព​តានតឹង​កាន់​តែ​អាក្រក់​ជាមួយ​អាមេរិក និង​អឺរ៉ុប។ លោក ត្រាំ មិនបានបញ្ជាក់ពីសកម្មភាពអ្វីដែលក្រុងវ៉ាស៊ីនតោនអាចនឹងចាត់វិធានការនោះទេ ប៉ុន្តែបានចង្អុលបង្ហាញអំពីផលវិបាកនាពេលខាងមុខ ប្រសិនបើលោក ពូទីន និងលោក ហ្សេលេនស្គី ខកខានជួបគ្នាក្នុងពេលឆាប់ៗនេះ។

លើសពីនេះលោក ត្រាំក៏បានធានាជាថ្មីថា ទោះបីជាមានកិច្ចសហប្រតិបត្តិការយោធាកាន់តែខ្លាំងឡើងរវាងរុស្ស៊ី ចិន និងកូរ៉េខាងជើងក៏ដោយ ក៏សហរដ្ឋអាមេរិកមិនត្រូវបានគំរាមកំហែងឡើយ ដោយលើកឡើងពីអំណាចយោធាដែលមិនអាចប្រៀបផ្ទឹមបាន។ រដ្ឋមន្ត្រីក្រសួងរតនាគារលោក Scott Bessent ក៏បានបញ្ជាក់ថា ទីក្រុងវ៉ាស៊ីនតោនកំពុងពិនិត្យមើលការឆ្លើយតបដែលអាចកើតមាន រួមទាំងការដាក់ទណ្ឌកម្មលើរុស្ស៊ី ខណៈដែលរុស្ស៊ីបន្តយុទ្ធនាការទម្លាក់គ្រាប់បែកដ៏ខ្លាំងក្លារបស់ខ្លួនលើអ៊ុយក្រែន៕

អត្ថបទ៖ ប៊ុន សុភាព