ព័ត៌មានជាតិ

កម្ពុជា-ចិន រួមគ្នាបណ្ដុះបណ្ដាលមូលធនមនុស្ស និងអ្នកជំនាញផ្នែកថាមពល តាមរយៈកម្មវិធីប្រកួតជំនាញបច្ចេកទេស

បានផុស

៨ ខែ មុន

នៅ

ថ្ងៃអាទិត្យ ២៨ កញ្ញា ២០២៥

ដោយ

លោក ម៉ុល វិបុល អនុរដ្ឋលេខាធិការ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញបើក និងបិទកម្មវិធីប្រកួតប្រជែងជំនាញ “ពានរង្វាន់អគ្គិសនីបំភ្លឺផ្លូវពាណិជ្ជកម្ម” ឆ្នាំ ២០២៥ ដែលសហការរៀបចំដោយសមាគម នៃសហគ្រាសវិនិយោគថាមពលអគ្គិសនីចិននៅកម្ពុជា និងវិទ្យាស្ថានពហុបច្ចេកទេសខេត្តពោធិ៍សាត់ ពីថ្ងៃទី ២៥ ខែកញ្ញា រហូតដល់ថ្ងៃទី ២៧ ខែកញ្ញា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីដែលប្រព្រឹត្តទៅនៅវិទ្យាស្ថានពហុបច្ចេកទេសខេត្តពោធិ៍សាត់ មានវត្តមានជាសហអធិបតីពីសំណាក់ លោក ខូយ រីដា អភិបាល នៃគណៈអភិបាលខេត្តពោធិ៍សាត់ ព្រមទាំងវត្តមានចូលរួមពីឯកឧត្តមទីប្រឹក្សាក្រសួងរ៉ែ និងថាមពល , ប្រធានមន្ទីរការងារ និងបណ្តុះបណ្តាលវិជ្ជាជីវៈ , តំណាងអគ្គិសនីកម្ពុជា , លោកប្រធានសភាពាណិជ្ជកម្មចិននៅកម្ពុជា , លោកប្រធានសមាគមសហគ្រាសអគ្គិសនី នៃសភាពាណិជ្ជកម្មចិននៅកម្ពុជា , តំណាងវិស័យឯកជន អាជ្ញាធរក្រោមជាតិ និងលោកគ្រូ អ្នកគ្រូ សិស្សានុសិស្ស នៃវិទ្យាស្ថានពហុបច្ចេកទេសខេត្តពោធិ៍សាត់។

ការប្រកួតប្រជែងជំនាញបច្ចេកទេសនេះ ធ្វើឡើងបាន ២ លើក រួចមកហើយ ដោយលើកទី ១ បានប្រព្រឹត្តទៅនៅខេត្តស្ទឹងត្រែង និងលើកទី ២ នៅខេត្តកោះកុង និងលើកទី ៣ គឺ ប្រព្រឹត្តទៅនៅខេត្តពោធិ៍សាត់។ ព្រឹត្តិការណ៍នេះ បង្កើតឡើងដើម្បីជាឱកាសជួបជុំគ្នារវាងអ្នកជំនាញផ្នែកថាមពលអគ្គិសនីកម្ពុជា-ចិន ជាការបង្ហាញនូវទេពកោសល្យ ការចែករំលែកបទពិសោធ និងក៏ជាការអនុវត្តជាក់ស្ដែង នៃកិច្ចសហប្រតិបត្តិការត្បូងពេជ្រក្នុងវិស័យថាមពលអគ្គិសនី រវាងប្រទេសទាំងពីរ ក្រោមគំនិតផ្ដួចផ្ដើម “ខ្សែក្រវាត់ និងផ្លូវ”។

បេក្ខជនដែលបានចូលរួមប្រកួតមាន ២ ក្រុម ៖ ជនជាតិចិន ១ ក្រុម និងជនជាតិខ្មែរ ១ ក្រុម និងបានទទួលជ័យលាភីទៅតាមផ្នែកនីមួយៗ នៃវិញ្ញាសាសម្រាប់ការប្រកួតរបស់អ្នកជំនាញបច្ចេកទេស នៃជនជាតិទាំងពីរ។ វិញ្ញាសា នៃការប្រកួតប្រជែង គឺមាន ៣ ធំៗ រួមមាន ការប្រឡងទ្រឹស្ដី ការអនុវត្តជាក់ស្ដែង និងសំណួរចម្លើយ។

ជាលទ្ធផល នៃការប្រកួត គណៈកម្មការបានរកឃើញម្ចាស់ជ័យលាភី ដែលជាក្រុមប្រកួតរវាងជនជាតិខ្មែរទទួលបានពានរង្វាន់លេខ ១ ចំនួន ២ រូប , លេខ ២ ចំនួន ២ រូប និងលេខ ៣ ចំនួន ៤ រូប។ រីឯម្ចាស់ជ័យលាភីសម្រាប់ក្រុមប្រកួតរវាងជនជាតិចិន ទទួលបានពានរង្វាន់លេខ ១ ចំនួន ១ រូប , លេខ ២ ចំនួន ៣ រូប និងលេខ ៣ ចំនួន ៥ រូប។

លោកអនុរដ្ឋលេខាធិការ ថ្លែងថា កម្មវិធីប្រកួតជំនាញបច្ចេកទេសឆ្នាំ ២០២៥ នេះ គឺជាការធ្វើសមាហរណកម្មឧស្សាហកម្ម និងការអប់រំនៅវិទ្យាស្ថានពហុបច្ចេកទេសខេត្តពោធិ៍សាត់ ដែលទីតាំងនេះ នឹងក្លាយជាទីកន្លែងបណ្ដុះបណ្ដាលយុវជនដែលជាមូលធនមនុស្ស និងអ្នកជំនាញផ្នែកថាមពលកម្ពុជា-ចិន និងសម្រាប់កិច្ចសហការ រវាងសាលាបច្ចេកវិទ្យា នៃប្រទេសទាំងពីរ៕

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា