ព័ត៌មានជាតិ

ជំនន់ទឹកភ្លៀងជន់លិចខេត្តចំនួន ១១ ប៉ះពាល់ពលរដ្ឋជាង ៣ ម៉ឺន ២ ពាន់គ្រួសារ និងដំណាំស្រូវជាង ១ ម៉ឺន ៥ ពាន់ហិតា

បានផុស

៩ ខែ មុន

នៅ

ថ្ងៃពុធ ១ តុលា ២០២៥

ដោយ

ជំនន់ទឹកភ្លៀងបានបណ្តាលឱ្យជន់លិចខេត្តចំនួន ១១ ប៉ះពាល់ប្រជាពលរដ្ឋជាង ៣ ម៉ឺន ២ ពាន់គ្រួសារ ផ្ទះជាង ២ ម៉ឺន ៤ ពាន់ខ្នង ជម្លៀសពលរដ្ឋទៅរកទីទួលសុវត្ថិភាពជាង ១ ពាន់គ្រួសារ និងដំណាំស្រូវជាង ១ ម៉ឺន ៥ ពាន់ហិតា ក្នុងនោះ ខូចខាតជាង ៦០០ ហិតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១ តុលា នេះថា គិតចាប់ពីថ្ងៃទី ២៦ ដល់ល្ងាចថ្ងៃទី ៣០ ខែកញ្ញា ឆ្នាំ ២០២៥ មានក្រុង/ស្រុកចំនួន ៤៦ នៃខេត្ត ១១ បានជន់លិចដោយសារជំនន់ទឹកភ្លៀង ក្នុងនោះរួមមាន ខេត្តរតនគិរី ស្ទឹងត្រែង ក្រចេះ ព្រៃវែង កំពង់ធំ សៀមរាប មណ្ឌលគិរី បន្ទាយមានជ័យ ត្បូងឃ្មុំ ឧត្តរមានជ័យ និងព្រះវិហារ បានប៉ះពាល់ដល់ប្រជាពលរដ្ឋចំនួន ៣២,២៩៥ គ្រួសារ កើន ៤,១០២ គ្រួសារ ផ្ទះប៉ះពាល់ចំនួន ២៤,៧៩៥ ខ្នង កើន ១,០២៧ ខ្នង ជម្លៀសពលរដ្ឋទៅរកទីទួលសុវត្ថិភាពចំនួន ១,១៦១ គ្រួសារ ស្រូវប៉ះពាល់ចំនួន ១៥,៨៦៤ ហិតា កើន ១,៦៩៦ ហិតា ក្នុងនោះ ស្រូវខូចខាតចំនួន ៦៣៨ ហិតា កើន ៣៦១ ហិតា។

ពាក់ព័ន្ធទៅនឹងស្ថានភាពកម្ពស់ទឹកវិញ លោក សុទ្ធ គឹមកុលមុនី បានបញ្ជាក់ថា កម្ពស់ទឹកទន្លេមេគង្គស្ទឹងត្រែងមាន ១០.៣៩ ម៉ែត្រ (កម្រិតប្រុងប្រយ័ត្ន ១០.៧០ ម៉ែត្រ) ទន្លេមេគង្គក្រចេះមានកម្ពស់ ២១.៦១ ម៉ែត្រ (កម្រិតប្រុងប្រយ័ត្ន ២២.០០ ម៉ែត្រ) ទន្លេបាសាក់ចតុមុខមាន ៩.១៥ ម៉ែត្រ (កម្រិតប្រុងប្រយ័ត្ន ១០.៥០ ម៉ែត្រ)។ លោកបានបន្ថែមថា ចំណែកស្ថានភាពទឹកស្ទឹងនានាក្នុងខេត្តពោធិ៍សាត់ នៅពុំទាន់មានបញ្ហាអ្វីគួរឱ្យព្រួយបារម្ភនៅឡើយទេ។

យោងតាមក្រសួងធនធានទឹក និងឧតុនិយម បានឱ្យដឹងថា ដោយសារសម្ពាធទាបកើតនៅសមុទ្រចិនខាងត្បូង កំពុងមានឥទ្ធិពលខ្លាំងលើរបបខ្យល់មូសុងនិរតីដែលបក់លើសមុទ្រអានដាមម៉ែន ឈូងសមុទ្រថៃ អាំងទន្លេមេគង្គ និងលើព្រះរាជាណាចក្រកម្ពុជា ធ្វើឱ្យកម្ពុជាចាប់ពីថ្ងៃទី ១ ដល់ថ្ងៃទី ៣ ខែតុលា ឆ្នាំ ២០២៥ នៅតែមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី ៤០% នៅតំបន់វាលទំនាបគ្របដណ្តប់លើផ្ទៃដី ៥០% នៅតំបន់ខ្ពង់រាប និង ៤៥% នៅតំបន់មាត់សមុទ្រ៕

អត្ថបទ ៖ សំអឿន