ព័ត៌មានជាតិ

ព្រលានយន្តហោះតេជោតម្លៃ ២ ០០០ លានដុល្លារ បំពាក់ម៉ាស៊ីនស្កេនទំនើប មិនបាច់អ្នកដំណើរដោះសម្ភារជាប់ខ្លួន

បានផុស

៨ ខែ មុន

នៅ

ថ្ងៃសុក្រ ៣ តុលា ២០២៥

ដោយ

បើតាមមន្រ្តីជាន់ខ្ពស់មួយរូបគ្រប់គ្រងនៅអាកាសយានដ្ឋានអន្តរជាតិតេជោបានអះអាងប្រាប់កម្ពុជាថ្មីថា អាកាសយានដ្ឋានអន្តរជាតិតេជោ បាននាំយកឧបករណ៍ស្កេនដ៏ទំនើបដែលអាចស្កេនឆែកខ្លួនអ្នកដំណើរ ដោយមិនបាច់តម្រូវឲ្យដោះសម្ភារៈជាប់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម៉ាស៊ីននេះមានតម្លៃខ្ទង់ជិត ១ លានដុល្លារ ដែលបំពាក់នៅច្រកត្រួតពិនិត្យសុវត្ថិភាពអ្នកដំណើរក្នុងអាកាសយានដ្ឋានអន្តរជាតិតេជោ។ យ៉ាងណាមិញ មន្រ្តីដដែលរូបនេះបានអះអាងថា ម៉ាស៊ីននេះប្រើប្រាស់សម្រាប់តែភ្ញៀវពិសេសៗតែប៉ុណ្ណោះ មិនសម្រាប់ភ្ញៀវទូទៅនោះទេ។

អាកាសយានដ្ឋានអន្តរជាតិតេជោ បានដាក់ឲ្យដំណើរការសាកល្បងកាលពីថ្ងៃទី ០៩ ខែកញ្ញា ឆ្នាំ ២០២៥។ សាងសង់ឡើងនៅលើផ្ទៃដីទំហំ ២ ៦០០ ហិកតា ស្ថិតនៅស្រុកកណ្តាលស្ទឹង ខេត្តកណ្តាល និងផ្នែកខ្លះនៃស្រុកបាទី ខេត្តតាកែវ មានចម្ងាយប្រហែល ២០ គីឡូម៉ែត្រខាងត្បូងរាជធានីភ្នំពេញ ព្រលានយន្ដហោះអន្ដរជាតិតេជោត្រូវបានវាយតម្លៃពីអាកាសចរណ៍ស៊ីវិល ជាប់ចំណាត់ថ្នាក់លេខ ៩ ក្នុងពិភពលោក ក្នុងចំណោមព្រលានយន្តហោះប្រភេទ 4F។

អាកាសយានដ្ឋានអន្តរជាតិតេជោ អភិវឌ្ឍជាបីដំណាក់កាល ដោយដំណាក់កាលទី១ មានផ្លូវរត់ចម្ងាយ ៤ គីឡូម៉ែត្រ មានសមត្ថភាពទទួលអ្នកដំណើរជាង ១៥ លាននាក់ក្នុងមួយឆ្នាំនៅឆ្នាំ ២០២៥។ ដំណាក់កាលទីពីរ នឹងបន្ថែមផ្លូវរត់ពីរទៀត ដែលនឹងបង្កើនសមត្ថភាពអ្នកដំណើរដល់ ៣០ លាននាក់នៅឆ្នាំ២០៣០ ខណៈដំណាក់កាលទីបី នឹងពង្រីកដាក់ឱ្យប្រើប្រាស់ផ្លូវរត់ទីបី ដែលអាចទទួលអ្នកដំណើរបានរហូតដល់ ៤៥ លាននាក់នៅឆ្នាំ២០៥០។

បច្ចុប្បន្ននេះក្រុមហ៊ុនអាកាសចរណ៍ក្នុងស្រុក និងក្រៅស្រុកចំនួន ២៨ កំពុងប្រតិបត្តិការតភ្ជាប់ការហោះហើរត្រង់មកកាន់អាកាសយានដ្ឋានអន្តរជាតិតេជោ ក្នុងនោះក្រុមហ៊ុនអាកាសចរណ៍ក្នុងស្រុកចំនួន ៤ និងក្រុមហ៊ុនអាកាសចរណ៍ក្រៅស្រុកចំនួន ២៤។

នៅខែតុលាខាងមុខនេះ មានក្រុមហ៊ុនចំនួន ២ទៀត នឹងភ្ជាប់ជើងហោះហើរមកកម្ពុជា គឺក្រុមហ៊ុនអាកាសចរណ៍ Etihad Airways ដែលជាក្រុមហ៊ុនអាកាសចរណ៍ដ៏ធំលំដាប់ទី ២ របស់អេមីរ៉ាតអារ៉ាប់រួម និងក្រុមហ៊ុនអាកាសចរណ៍តួកគី៕