អ្នកឧកញ៉ា ឃុន សៀ ​ចូលរួមឧបត្ថម្ភថវិកា ១លានដុល្លារ ដល់កងទ័ពជួរមុខ​កម្ពុជា និងជនភៀសសឹក តាមរយៈ សម្តេចតេជោ ហ៊ុន សែន

អគ្គនាយកជាន់ខ្ពស់ក្រុមហ៊ុន ធីភី ម៉ូរ៉ាល់ គ្រុប អ្នកឧកញ៉ា ឃុន សៀ ​ព្រមទាំងក្រុមគ្រួសារ​ បានចូលរួមឧបត្ថម្ភថវិកា ១,០០០,០០០ ដុល្លារ (១លានដុល្លារ) ដល់កងទ័ពជួរមុខ​កម្ពុជា និងជនភៀសសឹក តាមរយៈ សម្តេចអគ្គមហាសេនាបតីតេជោ ហ៊ុន សែន

ការចូលរួមឧបត្ថម្ភថវិការបស់ អ្នកឧកញ៉ា ឃុន សៀ និងក្រុមគ្រួសារ​ គឺជាការចូលរួមចំណែកលើកទឹកចិត្ត ដល់កងទ័ពកម្ពុជាដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំ ដើម្បីការពារបូរណភាពទឹកដី នៅតាមបណ្តោយព្រំដែនកម្ពុជា-ថៃ។

សម្តេចតេជោ ហ៊ុន សែន ថ្លែងអំពាវនាវប្រជាពលរដ្ឋទាំងអស់ ឱ្យចូលរួមឧបត្ថម្ភតាមការស្ម័គ្រចិត្តដល់កងទ័ព ដើម្បីបង្ហាញពីភាពរួបរួមគ្នា ជាធ្លង់មួយនៃខឿនការពារជាតិរបស់កម្ពុជា។

ឆ្លៀតឱកាសនេះ យើងខ្ញុំសូមបួងសួងដល់ ទេវតារក្សាទឹកដីនៃព្រះរាជាណាចក្រកម្ពុជា បុព្វបុរសខ្មែរគ្រប់ព្រះអង្គ និងវត្ថុសក្តិសិទ្ធិក្នុងលោក សូមតាមថែរក្សាការពារកងទ័ពកម្ពុជារបស់យើង ឱ្យជួបប្រទះតែសេចក្តីសុខ ជៀសផុតពីជំងឺដង្កាត់ទាំងឡាយ ហើយឈ្នះអស់ខ្មាំងសត្រូវ៕