“ភូមិអាស៊ាន” នឹងនាំយកម្ហូបអាហារ និងវប្បធម៌នៃប្រទេសអាស៊ានទាំងអស់ មកតាំងបង្ហាញនៅភ្នំពេញ

ពិព័រណ៍ “ភូមិអាស៊ាន” នឹងប្រារព្ធឡើងរយៈពេល៣ថ្ងៃ គឺចាប់ពីថ្ងៃទី២៥ ទី២៦ និងទី២៧ ក្នុងខែវិច្ឆិកា ឆ្នាំ២០២២ ខាងមុខ វេលាម៉ោង ៩ព្រឹក ដល់ម៉ោង ៩យប់ នៅក្នុងសាកលវិទ្យាល័យជាតិគ្រប់គ្រង (NUM)។ កម្មវិធីនេះ អនុញ្ញាតឲ្យសាធារណជនចូលរួមដោយសេរី ដើម្បីស្គាល់រសជាតិម្ហូបអាហារ និងវប្បធម៌នៃប្រទេសសមាជិកអាស៊ានទាំងអស់។

កម្មវិធីពិព័រណ៍ “ភូមិអាស៊ាន” ធ្វើឡើង ក្នុងគោលបំណងឲ្យប្រជាជនខ្មែរបានស្គាល់ពីវប្បធម៌ ទំនៀមទម្លាប់ផ្សេងៗក្នុងប្រទេសជាសមាជិកអាស៊ានទាំង១០ប្រទេស។ ពិព័រណ៍ “ភូមិអាស៊ាន” ក៏មានការតាំងពិព័រណ៍ម្ហូបអាហារ និងមានការលេងល្បែងប្រជាប្រិយតាមប្រទេសនីមួយៗ ក៏ដូចជា ការលេងតន្រ្តី ការសម្តែង និងដើរបង្ហាញម៉ូតជាដើម។ ទាំងអស់នេះ ធ្វើឡើងដើម្បីឲ្យប្រជាជនបានស្គាល់ និងស្វែងយល់ពីវប្បធម៌ របៀបរបបរស់នៅ អាហារហូបចុក ក្នុងប្រទេសជាសមាជិកអាស៊ានទាំង១០។

ដ្បិតថា កម្មវិធីពិព័រណ៍នេះ មិនតម្រូវឲ្យអ្នកចូលរួមបង់ប្រាក់ ដើម្បីចូលរួមទស្សនាកម្មវិធីតាំងពិព័រណ៍ក៏ពិតមែន ប៉ុន្តែ កម្មវិធីនេះ តម្រូវឲ្យមានការចុះឈ្មោះជាមុន។ លោកអ្នកអាចធ្វើការចុះឈ្មោះតាមរយៈទំព័រហ្វេសប៊ុកឈ្មោះថា “Youth Assembly”៕

ដោយ៖ អុន ស្រីមាន