តម្លៃប្រេងអន្តរជាតិបន្តកើនឡើង ខណៈភាពតានតឹងអាមេរិក-អ៊ីរ៉ង់មិនស្រាកស្រាន្ត

តម្លៃប្រេងឆៅអន្តរជាតិ​បាន​បន្តកើនឡើង​នៅថ្ងៃព្រហស្បតិ៍នេះ ដល់កម្រិតខ្ពស់បំផុតក្នុងរយៈពេល ៦ សប្ដាហ៍ ចំពេលដែលសហរដ្ឋអាមេរិកវាយប្រហារជុំថ្មីប្រឆាំងអ៊ីរ៉ង់ ខណៈក្រុមឧទ្ទាមហ៊ូធីនៅយេម៉ែនកំណត់​គោលដៅលើនាវាដឹកប្រេងនៅសមុទ្រក្រហម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។ ​

តម្លៃប្រេងឆៅ Brent បាន​កើនឡើង ២% ដល់ ៩៦ ដុល្លារ/បារ៉ែល ពោលគឺខ្ពស់បំផុតរាប់តាំងពីថ្ងៃទី ៨ មិថុនា គិតត្រឹមម៉ោង ៨ នៅទីក្រុងហុងកុង។ Brent បាន​កើនឡើងជាង ៣ ដុល្លារ​ ពេលបិទការជួញដូរថ្ងៃពុធ។

ដោយឡែក តម្លៃប្រេងអាមេរិក WTI វិញ បាន​កើនឡើង ១,៧% ដល់ ៨៨,២៧ ដុល្លារ/បារ៉ែល បន្ទាប់ពីហក់ឡើងជិត ៣% កាលពីថ្ងៃពុធ។ ​

អ្នកជំនាញទីផ្សារបាន​ទាញភ្ជាប់កំណើនតម្លៃទាំងនេះ ទៅនឹងភាពតានតឹងនៃស្ថានការណ៍នៅមជ្ឈិមបូព៌ា​។ យោធាអាមេរិកបានបន្តវាយប្រហារអ៊ីរ៉ង់​ ១២ យប់ជាប់ៗគ្នាកាលពីថ្ងៃពុធ បន្ទាប់ពីប្រធានាធិបតី លោក​ ដូណាល់ ត្រាំ ព្រមានថានឹងវាយប្រហារហេដ្ឋារចនាសម្ព័ន្ធអ៊ីរ៉ង់ ប្រសិនបើអ៊ីរ៉ង់បន្តវាយប្រហារលើនាវានៅច្រកសមុទ្រ​ហ័រមូហ្ស។

អ៊ីរ៉ង់អះអាងថា ច្រកសមុទ្រហ័រមូហ្សត្រូវបានបិទទាំងស្រុង ហើយបានព្រមានថា នាវាដឹកប្រេងមិនអាចឆ្លងកាត់បានដោយគ្មានការសម្របសម្រួលពីអ៊ីរ៉ង់នោះទេ។ អ៊ីរ៉ង់ក៏បាននិយាយថា នាវាដឹកប្រេងមួយបានឆេះបន្ទាប់ពីផ្ទុះដោយសារធ្វើដំណើរកាត់តាមផ្លូវមីនសមុទ្រ ខណៈនាវា ២ គ្រឿងទៀតបាន​បត់​ត្រឡប់​ក្រោយ​វិញ។

ជាមួយគ្នានេះ ក្រុមឧទ្ទាមហ៊ូធីនៅយេម៉ែន ដែលអ៊ីរ៉ង់គាំទ្រ បានប្រកាសបិទផ្លូវសមុទ្រទៅកាន់អារ៉ាប៊ីសាអូឌីតតាមច្រក​ បាប អែល ម៉ាន់ដេប និងអះអាងថាបានវាយប្រហារនាវាដឹកប្រេងអារ៉ាប៊ីសាអូឌីត ២ គ្រឿង។ របាយការណ៍សន្តិសុខដែនសមុទ្របានឱ្យដឹងថា នាវាមួយក្នុងចំណោមនោះ ត្រូវបានវាយប្រហារនៅសមុទ្រក្រហម។

​ទោះជាយ៉ាងណាក៏ដោយ រដ្ឋបាលព័ត៌មានថាមពលអាមេរិក (EIA) បានឱ្យដឹងថា ស្តុកប្រេងឆៅរបស់អាមេរិកបានកើនឡើង ២ លានបារ៉ែលកាលពីសប្តាហ៍មុន ផ្ទុយពីការរំពឹងទុករបស់អ្នកវិភាគដែលគិតថានឹងធ្លាក់ចុះ ១,១ លានបារ៉ែល។ ​កំណើនផ្គត់ផ្គង់បែបនេះ ជួបទប់តម្លៃប្រេងមិនឱ្យហក់ឡើងខ្លាំងភ្លាមៗ៕