ក្រុមហ៊ុនអាកាសចរណ៍ Sky Angkor Airlines ប្រើប្រាស់ ABA PayWay ដើម្បីទូទាត់ថ្លៃសំបុត្រយន្តហោះ យ៉ាងងាយស្រួលនិងសុវត្ថិភាព

 ABA ដែលជាធនាគារពាណិជ្ជធំជាងគេនៅកម្ពុជា មានសេចក្តីរីករាយនឹងចាប់ដៃគូជាមួយក្រុមហ៊ុន​អាកាសចរណ៍ Sky Angkor Airlines ដែលជាក្រុមហ៊ុនអាកាសចរណ៍ឈានមុខមួយនៅកម្ពុជា ដើម្បី​បង្កើនភាពងាយស្រួលក្នុងការកក់ និងទូទាត់ថ្លៃសំបុត្រយន្តហោះតាមរយៈ ABA PayWay។ 

ការរួមបញ្ចូល ABA PayWay នៅលើ គេហទំព័ររបស់ខ្លួន ក្រុមហ៊ុន Sky Angkor នឹងទទួលបាននូវបទពិសោធទូទាត់ប្រាក់យ៉ាងរលូន ជាមួយនឹងប្រព័ន្ធសុវត្ថិភាព និងប្រសិទ្ធភាពខ្ពស់ ដែលអនុញ្ញាត​ឲ្យអតិថិជនជ្រើសរើសវិធីទូទាត់តាមឌីជីថលបានជាច្រើនរបៀប។ ការដាក់បញ្ចូលប្រព័ន្ធទូទាត់ប្រាក់ដ៏ទំនើបនេះ ស្របទៅតាមការប្តេជ្ញាចិត្តរបស់ក្រុមហ៊ុន ក្នុងការបង្កើនគុណភាពសេវាកម្ម និងការពេញ​ចិត្តរបស់អតិថិជន។ 

ABA PayWay ផ្តល់នូវភាពងាយស្រួល និងភាពបត់បែនសម្រាប់អាជីវកម្មគ្រប់ប្រភេទ ដែលអនុញ្ញាត​ឲ្យអតិថិជនធ្វើប្រតិបត្តិការទូទាត់ដោយមិនប្រើប្រាស់ក្រដាសប្រាក់ ទាំងជាលុយរៀល និងដុល្លារ។ ប្រព័ន្ធនេះអាចឲ្យអតិថិជនទូទាត់ប្រាក់តាមមធ្យោបាយជាច្រើនដូចជា ABA PAY, KHQR, AliPay, WeChat Pay, និងកាតអន្តរជាតិដូចជា Visa, Mastercard, UPI, និង JCB ជាដើម។ ប្រព័ន្ធទូទាត់ប្រាក់ដែលប្រើប្រាស់បានគ្រប់តម្រូវការនេះ នឹងធានាបានថា អតិថិជនមានមធ្យោបាយធ្វើប្រតិបត្តិការទូទាត់ប្រកបដោយសុវត្ថិភាពជាច្រើន និងតាមចំណូលចិត្តរបស់ពួកគេផ្ទាល់។  

បន្ថែមពីលើភាពងាយស្រួល និងការផ្តោតទៅលើតម្រូវការអ្នកប្រើប្រាស់ជាចម្បង សុវត្ថិភាពក៏ជា​មូល​ដ្ឋានគ្រឹះនៃ ABA PayWay ផងដែរ។ ជាមួយនឹងប្រព័ន្ធទូទាត់ដែលអនុលោមតាមស្តង់ដាសុវត្ថិភាព PCI DSS ប្រព័ន្ធទូទាត់នេះអនុញ្ញាតក្រុមហ៊ុនអាកាសចរណ៍​ទទួលការទូទាត់ពីគ្រប់កាត​ទាំងអស់ប្រកប​ដោយសុវត្ថិភាព។ ដោយមានក្របខណ្ឌសុវត្ថិភាពឈានមុខគេនេះហើយ អតិថិជនអាចជឿជាក់បានថា ប្រតិបត្តិការសាច់ប្រាក់និងព័ត៌មានផ្ទាល់ខ្លួនរបស់ពួកគាត់ ត្រូវបានការពារយ៉ាងពេញលេញ។  

សម្រាប់ព័ត៌មានបន្ថែមអំពី ABA PayWay សូមទៅកាន់គេហទំព័រ https://www.payway.com.kh/km ។