លេខ ៤៩ ក្នុងជំនឿអាស៊ីផ្សារភ្ជាប់ជាមួយភាពអពមង្គល និងពពួកអមនុស្ស

ជំនឿអំពីលេខ បានផ្សារភ្ជាប់ជាមួយការរស់នៅ ទំនៀមទម្លាប់ ​និងប្រពៃណីរបស់មនុស្សអស់ជាច្រើនពាន់ឆ្នាំមកហើយ មិនថានៅលោកខាងលិចឬនៅតំបន់អាស៊ីនោះទេ។ លេខអាចនាំមកនូវសំណាងល្អ និងអាចជាប្រផ្នូលអាក្រក់ ប្រសិនយើងមើលស្រាល ហើយប្រមាថ។

តាមក្បួននព្វន្តសាស្ត្រ លេខដែលគេចាត់ទុកជាជាលេខចង្រៃបំផុតគឺលេខ ៤ និងលេខ ១៣។ លេខ ៤ មានប្រភពដំបូងមកពីប្រទេសចិនជាលេខនៃតំណាងសេចក្ដីស្លាប់ រីឯលេខ ១៣ មានកំណើតមកពីអឺរ៉ុប ដែលវាតំណាងឱ្យភាពចង្រៃឧបទ្រព។

ចំណែកលេខដែលប្រជាជានទូទៅលើលោកតែងចាត់ទុកជាលេខនាំសិរីសួស្ដីជាងគេគឺលេខ ៧ និងលេខ ៩ ព្រោះវាជានិមិត្តរូបនៃអាទិទេពសំណាង និងតំណាងឱ្យទិសទាំង ៩ ផងដែរ។ ប៉ុន្តែលេខ ៤៩ ដែលមានលេខ ៩ ជាប់មកជាមួយ បែរជាគេមានជំនឿផ្សេងទៅវិញ។

លេខ ៤៩ គេឧស្សាហ៍ឃើញនិងឮញឹកញាប់​ពាក់ព័ន្ធទៅនឹងអាគមងងឹត របៀនផ្សេងៗ ឬទាក់ទងនឹងពពួកអមនុស្សនៃឋានមនុស្សស្លាប់។

នៅប្រទេសចិន លេខ ៤៩ ជាលេខចង្រៃស្មើនឹងលេខ ១៣ ​ដែរ។ មូលហេតុដើមដំបូងដោយសារលេខ ៤ ជាលេខអពមង្គលបំផុតរបស់ប្រជាជនចិន ព្រោះវាស្តាប់ទៅដូចជាពាក្យថា “ស្លាប់” ។ អគារជាច្រើននៅក្នុងប្រទេសចិនមិនមានជាន់ទី ៤ ទេ។ អគារខ្លះរំលងជាន់ដែលមានលេខដូចជា ១៤, ២៤, ៣៤ និងជាន់ទាំងអស់ដែលមានលេខចាប់ពី ៤០-៤៩ ។ បែបនេះហើយទើបលេខ ៤៩ មិនត្រូវបានជនជាតិចិនប្រើប្រាស់ឡើយមិនថានៅផ្ទះ នៅការិយាល័យ​ ឬហាងលក់ដូរនានារបស់ពួកគេ ។

នៅប្រទេសជប៉ុន លេខ ៤៩ ត្រូវបានប្រជាជនក្នុងស្រុកចៀសវាង ហើយក៏ស្អប់ណាស់ដែរ។ ជនជាតិជប៉ុនគិតថា លេខ ៤ បញ្ចេញសំឡេងដូចទៅនឹងអក្សចិន (“ 死-ស៊ី)” ដែលមានន័យថា ស្លាប់។

ដូច្នេះនៅក្នុងប្រទេសជប៉ុន លេខ ៤ ស្ទើរតែមិនត្រូវបានប្រើជាលេខបន្ទប់ មន្ទីរពេទ្យ ផ្ទះថែទាំ សណ្ឋាគារ និងអាផាតមិនឡើយ។ ផ្ទុយទៅវិញ មានតែអ្នកលក់មឈូសឬផ្កាបុណ្យសពប៉ុណ្ណោះដែលប្រើលេខ ៤ ជាលេខទូរសព្ទ។ល។

រីឯលេខ ៩ ក៏ត្រូវបានប្រជាជនជប៉ុនចៀសវាងដូចគ្នា ដោយសារតែវាបញ្ចេញសំឡេងដូចទៅនឹងអក្សរ “ 苦-គុ” ដែលមានន័យថា ការឈឺចាប់ឬការធ្វើទារុណកម្ម។

មូលហេតុនេះទើបបានជាលេខ ៤៩ ត្រូវបានជប៉ុនប្រៀបប្រដូចនឹងអត្ថន័យនៃ “សេចក្ដីស្លាប់ ឬការងទុក្ខឈឺចាប់” ។

ចំណែកនៅ កូរ៉េខាងត្បូងវិញ ​លេខ ៤៩ ផ្សារភ្ជាប់គ្នានឹងពពួកមនុស្ស។ យើងតែឃើញរឿងភាគកូរ៉េមួយចំនួននិយាយអំពីព្រលឹងមនុស្សស្លាប់ ភ្ជាប់ជាមួយនឹងលេខ​ ៤៩ ​ហើយការពិតទៅ ប្រជាជនកូរ៉េពិតជាមានអបិយជំនឿលើរឿងនេះមែន។

តាមប្រភពពី folkency.nfm បានឱ្យដឹងថា ប្រជាជនកូរ៉េ​ជឿថា មនុស្សដែលស្លាប់ទៅ នឹងមិនទាន់អាចទៅចាប់ជាតិភ្លាមៗបានឡើយ ដោយសារពួកគេត្រូវរង់ចាំចន្លោះពី ៧ ទៅ ៤៩ ថ្ងៃសិន ដើម្បីទទួលការវិនិច្ឆ័យទោស។

រៀងរាល់ ៧ថ្ងៃម្ដង ព្រលឹងមនុស្សស្លាប់នឹងត្រូវវិនិច្ឆ័យទោសម្ដង រហូតដល់គ្រប់៧ដង ពោលគឺពួកគេមានពេលតែ ៤៩ថ្ងៃប៉ុណ្ណោះដើម្បីកាត់សេចក្ដីថាអាចទៅចាប់កំណើតថ្មី ​ឬត្រូវជាប់នៅឋានមនុស្សស្លាប់។ បើរកមិនឃើញបុណ្យកុសលអ្វីទេ ព្រលឹងនោះមិនអាចទៅណារួចឡើយ។ ក្នុងកំលុងពេលនេះ សាច់ញាតិសពត្រូវធ្វើបុណ្យឧទ្ទិសកុសលជូនអ្នកស្លាប់ ដើម្បីជួយពួកគេឱ្យជ្រះស្រឡះអំពើបាប ឆាប់បានទៅកាន់ភពថ្មី៕

ប្រែសម្រួល៖ សន្យា

ចុចអាន៖ ជំនឿបុរាណដែលចាស់ៗតែងផ្ដាំ និងហាមមិនឲ្យធ្វើ សុទ្ធតែបញ្ជាក់អត្ថន័យ ខាងក្រោមនេះទាំងអស់

ចុចអាន៖ នៅក្រោយហេតុផល ដែលមនុស្សជាច្រើន​មានតំណមនឹងលេខ​​១៣