“កាក់ប្រាក់” ក្នុងយល់សប្តិជាប្រផ្នូលពាក់ព័ន្ធបញ្ហាហិរញ្ញវត្ថុ

ជំនឿអំពីការទស្សន៍ទាយរបស់ប្រជាជនខ្មែរមានច្រើនទម្រង់ណាស់។ ជាមួយគ្នាដែរ សុបិនជាផ្នែកមួយនៃជំនឿ ហើយសុបិនឃើញកាក់ប្រាក់ គឺជាសុបិនមួយដែលមនុស្សជាច្រើនតែងតែប្រើដើម្បីបកស្រាយអំពីប្រផ្នូលផ្សេងៗ។ សុបិននេះ ជារឿយៗផ្សារភ្ជាប់ទៅនឹងបញ្ហាហិរញ្ញវត្ថុរបស់ម្ចាស់សុបិន ខណៈវាត្រូវបានបកស្រាយដូចខាងក្រោម៖

សុបិនសន្សំកាក់ប្រាក់

ទស្សន៍ទាយថា អ្នកនឹងទទួលបានទ្រព្យសម្បត្តិមកវិញយ៉ាងច្រើន ដោយការវិនិយោគ។ ប៉ុន្តែ​ក្នុង​អំឡុង​ពេល​នេះ ​ចូរ​ប្រយ័ត្ន​នឹង​ការចំណាយលើមនុស្សជិតស្និទ្ធ។ កុំ​​ជឿ​ទុក​ចិត្ត​នរណា​ម្នាក់​ដោយ​ងាយពេក។ យ៉ាងណាមិញ​សម្រាប់​អ្នក​នៅ​លីវ សុបិន​នេះ​ត្រូវ​បាន​គេ​ជឿថា អតីតគូស្នេហ៍នឹងវិលត្រឡប់មកវិញ។

សុបិនរើសបានកាក់ប្រាក់

បើអ្នកណាសុំខ្ចីប្រាក់ កុំទាន់ឱ្យគេខ្ចី ព្រោះអ្នកនឹងមិនទទួលបានប្រាក់បង្វិលមកវិញនោះទេ ឬមិនអ៊ីចឹងទេ បើគេសងមកក្ដី អ្នកនិងកូនបំណុលអាចមានបញ្ហាជម្លោះនឹងគ្នា។ ក្នុងអំឡុងពេលនេះ ចូរត្រូវប្រយ័ត្នចំពោះការចំណាយប្រចាំថ្ងៃផងដែរ។ ចំណែក​ការងារ​និង​ជំនួញ​​អាច​រងសម្ពាធខ្លះដែរ ប៉ុន្តែ​បើមិនអន្ទះអន្ទែង ហើយរង់ចាំ​បន្តិច​ទៀត អ្នកនឹង​ឆ្លង​កាត់​ឧបសគ្គបាន។

សុបិនឃើញកាក់ប្រាក់រាយប៉ាយលើដី ឬឥដ្ឋ

អ្នកប្រហែលជាត្រូវខ្ជះខ្ជាយលុយយ៉ាងច្រើនលើរឿងដែលមិនសំខាន់។

សុបិនឃើញឱ្យកាក់ប្រាក់ទៅឱ្យនរណាម្នាក់

បកស្រាយ​ថា ​អ្នក​នៅ​លីវ​មាន​លាភ​សំណាង​ក្នុង​រឿង​ស្នេហា។ អ្នកនឹង​រក​ឃើញ​មិត្ត១០០ឆ្នាំ ​ដែល​មាន​ជំហរ​ហិរញ្ញវត្ថុ​ល្អ។​ ប្រសិនបើអ្នកទើបរៀបការរួច អ្នកនឹងមានកូនឆាប់ៗនេះហើយ។ ប្រសិនអ្នករកស៊ីជួញដូរ ឬម្ចាស់បំណុល នេះជាសញ្ញាល្អ ព្រោះកូនបំណុលនឹងយកប្រាក់មកសងអ្នកវិញ។

សុបិនជ្រុះបាត់កាក់ប្រាក់

សុបិននេះ មានន័យថា អ្នក​នឹង​មាន​ការ​ផ្លាស់​ប្តូរ​ក្នុង​វិស័យ​ការងារ ហើយវាអាចធ្វើឱ្យអ្នកនឿយហត់បន្តិច។ ដូច្នេះប្រសិនចង់ប្ដូរការងារ អំឡុងពេលនេះ មិនគួរប្ដូរការងារទេ។ យ៉ាងណាមិញ អ្នកដែលមានបញ្ហាសុខភាពយូរមកហើយ នឹងជាសះស្បើយពីជំងឺ៕

អត្ថបទ៖ សន្យា

ចុចអាន៖ យល់សប្តិឃើញ “កណ្ដុរ” ជាសញ្ញាជម្លោះនៅក្នុងគ្រួសារ

ចុចអាន៖ ដាក់កាក់ប្រាក់ក្នុងកាបូប ឬមានព្យួរនៅផ្ទះ ​ជានិមិត្តរូបហៅលាភសក្ការចូលឥតដាច់