សហគ្រាសមួយ ទិញផ្លែចេក និងដូងពីកសិករ ផលិតចេញជាផលិតផលជាង២០មុខ

សហគ្រាសស្ថិតនៅស្រុកចំការលើ ខេត្តកំពង់ចាមមួយ ទិញផ្លែចេក និងផ្លែដូងពីកសិករ ផលិតចេញជាផលិតផលជាង២០មុខ ដាក់លក់នៅទីផ្សារ និងកំពុងទទួលបានការគាំទ្រពីអតិថិជន។

ស្ថិតនៅក្នុងវ័យ ៤៥ឆ្នាំ អ្នកស្រី យន់ ផល្លី ជាម្ចាស់សហគ្រាសគំនិតថ្មី ប្រាប់ កម្ពុជាថ្មី ថា សហគ្រាសរបស់អ្នកស្រី បានបើកដំណើរការឡើងមកតាំងពីឆ្នាំ២០១៣ មកម្ល៉េះ។ បច្ចុប្បន្នសហគ្រាសបានដើរតួនាទីក្នុងការផលិតចំណីអាហារចេញអំពីផ្លែដូង និងចេក ក្នុងនោះមានដូចជា៖ ស្ករគ្រាប់ចេក ស្រាចេក ដំណាប់ចេក ស្ករគ្រាប់ដូង ដំណាប់ដូង និងមានប្រភេទដំណាប់ធ្វើពីផ្លែឈើជាច្រើនមុខទៀត។

អ្នកស្រី យន់ ផល្លី បានឱ្យដឹងទៀតថា រាល់វត្ថុធាតុដើមសម្រាប់ផលិតចេញជាផលិតផលទាំងនេះ គឺសុទ្ធតែជាដំណាំរបស់ប្រជាកសិករដែលរស់នៅក្នុងភូមិសាស្រ្ដខេត្តកំពង់ចាមទាំងមូលផងដែរ។

ចំពោះទីផ្សារវិញ ផលិតផលរប​ស់សហគ្រាស អ្នកស្រី យន់ ផល្លី ក៏មានដាក់លក់នៅលើផ្សារទំនើប និងផ្សារនានាក្នុងប្រទេសកម្ពុជា ដែលគិតមកទល់ពេលនេះមានប្រមាណជាង៥០០ទីតាំងទូទាំងប្រទេស។

ទាក់ទងនឹងផលិតផលជាង២០មុខ ក្នុងសហគ្រាសរបស់អ្នកស្រី យន់​ ផល្លី ក៏មានផលិតផលដែលអាចជំនួសឱ្យផលិតផលនាំចូលពីប្រទេសថៃបានផងដែរ ក្នុងនោះមានដូចជា៖ ស្ករចេក និងដំណាប់ផ្លែឈើជាច្រើនមុខទៀត ដែលសុទ្ធសឹងតែជាផលិតផលដែលមានស្ដង់ដាត្រឹមត្រូវ និងអាច​ជំនួសឱ្យផលិតផលដែលនាំចូលពីប្រទេសជិតខាងបាន។

យ៉ាងណាមិញ ម្ចាស់សហគ្រាសរូបនេះ ក៏សូមស្នើចិត្ត និងលើកទឹកចិត្តដល់ប្រជាជនខ្មែរទូទាំងប្រទេស មេត្តារួមគ្នាក្នុងស្មារតីតែមួយ ដើម្បីជួយគាំទ្រផលិតក្នុងស្រុកឱ្យបានកាន់តែច្រើនជាងនេះ ដើម្បីធ្វើយ៉ាងណាអាចឱ្យរោងចក្រ ឬសហគ្រាស ក៏ដូចជាសិប្បកម្មក្នុងស្រុកទាំងអស់ អាចមានឱកាសសម្រាប់ការពង្រឹង និងពង្រីកខ្លួនឱ្យបានកាន់តែប្រសើរជាងមុន ផងដែរ។

គួរឱ្យដឹងថា សហគ្រាសគំនិតថ្មី ជាសហគ្រាសរបស់កូនខ្មែរម្នាក់ ដែលបានបើកដំណើរការតាំងពីឆ្នាំ២០១៣មកម្ល៉េះ។ បច្ចុប្បន្ន សហគ្រាសមួយនេះ កំពុងបានដើរតួនាទីយ៉ាងណាសំខាន់ក្នុងការកែច្នៃដំណាំរបស់ប្រជាកសិករដែលស្ថិតក្នុងភូមិសាស្រ្ដស្រុកចំការលើ ខេត្តកំពង់ចាម និងក៏បានជួយឱ្យពលរដ្ឋរស់នៅក្នុងសហគមន៍ មានការងារធ្វើតាមរយៈការផ្គត់ផ្គង់ដំណាំ និងផ្លែឈើផ្សេងៗ បន្ទាប់ពីប្រមូលផលរួចមក៕

អត្ថបទ ៖ សួស សិត