ព័ត៌មានអន្ដរជាតិ

ធនាគារកណ្ដាលថៃ៖ សេដ្ឋកិច្ចធ្លាក់ចុះនៅត្រីមាសទី៣

បានផុស

៦ ខែ មុន

នៅ

ថ្ងៃព្រហស្បតិ៍ ២៣ តុលា ២០២៥

ដោយ

ធនាគារកណ្ដាលថៃ (BoT) បានព្រមានពីការធ្លាក់ចុះនៃសេដ្ឋកិច្ចនៅត្រីមាសទី៣ (កក្កដា-កញ្ញា) ដែលជាការធ្លាក់ចុះប្រចាំត្រីមាសជាលើកដំបូងរាប់តាំងពីចុងឆ្នាំ ២០២២។ នេះបើតាមការចុះផ្សាយរបស់កាសែតបាងកកប៉ុស្តិ៍។

ក្នុងរបាយការណ៍ចេញផ្សាយកាលពីថ្ងៃពុធ ធនាគារកណ្តាលថៃបានកែសម្រួលការព្យាករសេដ្ឋកិច្ចប្រចាំត្រីមាសទី៣ មកត្រឹម ដក ០,៥ ភាគរយ ធៀបនឹងត្រីមាសទី២ ខណៈរំពឹងកំណើន ០,៥ ភាគរយ នៅត្រីមាសចុងក្រោយ។

មន្រ្តីជាន់ខ្ពស់ BoT លោកស្រី Pranee Sutthasri បានសន្មតថា ការធ្លាក់ចុះសេដ្ឋកិច្ចនេះ បណ្ដាលមកពីកត្តាជាច្រើន រាប់ចាប់ពីការបិទរោងចក្របណ្តោះអាសន្ន រហូតដល់ផលប៉ះពាល់នៃពន្ធគយរបស់សហរដ្ឋអាមេរិក។

លោកស្រីបានបន្តថា៖ «សេដ្ឋកិច្ចនឹងស្ទុះងើបឡើងវិញនៅត្រីមាសទី៤ ខណៈរោងចក្របើកដំណើរការឡើងវិញ ហើយវិធានការជំរុញសេដ្ឋកិច្ចរបស់រដ្ឋាភិបាលជំរុញការប្រើប្រាស់»។

ការព្រមានពីសម្ពាធសេដ្ឋកិច្ចរបស់ BoT ធ្វើឡើង ក្រោយក្រុមហ៊ុនផលិតកម្មថៃបានព្រមានថា ពួកគេកំពុងរងផលប៉ះពាល់ខ្លាំងដោយពន្ធរបស់សហរដ្ឋអាមេរិក និងកំណើននៃតម្លៃប្រាក់បាត ចំពេលដែលសេដ្ឋកិច្ចបន្តដើរអូសជើង។

ការធ្លាក់ចុះនៃសេដ្ឋកិច្ចថៃ បង្ហាញពីនិន្នាការបញ្ច្រាស់ពីសេដ្ឋកិច្ចរបស់គូប្រជែងសំខាន់ៗនៅអាស៊ី។ ជាក់ស្ដែង វៀតណាមឯណោះវិញ បានកំណើនសេដ្ឋកិច្ច ១០ ភាគរយ ក្នុងមួយឆ្នាំៗ រយៈពេល ៥ ឆ្នាំទៅមុខ ទោះបីជារងការគំរាមកំហែងពីពន្ធអាមេរិក និងភាពមិនប្រាកដប្រជាសកលផ្សេងៗក្ដី។ សេដ្ឋកិច្ចវៀតណាម បានកើនឡើងប្រមាណ ៨,២២ ភាគរយ នៅត្រីមាសទី ៣ ឆ្នាំ ២០២៥៕