Amazon គ្រោងបញ្ឈប់បុគ្គលិកច្រើនបំផុតក្នុងប្រវត្តិសាស្រ្តក្រុមហ៊ុន ជាង ៣​ ម៉ឺននាក់

ក្រុមហ៊ុនបច្ចេក​វិទ្យាពហុជាតិ​របស់អាមេរិក Amazon គ្រោងនឹង​បញ្ឈប់បុគ្គលិនច្រើនបំផុតក្នុងប្រវត្តិសាស្រ្តរបស់ក្រុមហ៊ុន ដោយចាប់ផ្ដើមពីថ្ងៃអង្គារនេះតទៅ។ នេះបើតាមការរាយការណ៍របស់បណ្ដាញទូរទស្សន៍ CNBC។

CNBC បានស្រង់សម្ដីប្រភពមិនបញ្ចេញឈ្មោះកាលពីថ្ងៃចន្ទថា ការបញ្ឈប់បុគ្គលិកនេះ​នឹង​គ្របដណ្តប់ស្ទើរតែគ្រប់ផ្នែកនៃអាជីវកម្មទាំងអស់របស់ Amazon ហើយការជូនដំណឹងស្ដីពីការបញ្ឈប់នឹង​ត្រូវផ្ញើលើអ៊ីម៉ែលចាប់ពីថ្ងៃអង្គារតទៅ។

បើតាមការរាយការណ៍របស់ទីភ្នាក់ងារសារព័ត៌មាន​រ៉យទ័រ ចំណាត់ការរបស់ក្រុមហ៊ុនគឺមាន​ទ្រង់ទ្រាយធំ ដោយ​នឹង​ប៉ះពាល់លើបុគ្គលិកជាង ៣០ ០០០ នាក់។ មកទល់ពេលនេះ Amazon មិន​ទាន់ប្រតិកម្មយ៉ាងណានៅឡើយទេ។

កាលពីសប្ដាហ៍មុន កាសែតញូវយ៉កថែមស៍បាន​ចុះផ្សាយថា ក្រុមហ៊ុន Amazon គ្រោងពង្រឹងការពឹងផ្អែកលើបច្ចេកវិទ្យាស្វ័យប្រវត្តិកម្ម ដោយប្រើមនុស្សយន្ត (រ៉ូបូត) ជំនួសការជួលកម្មករនៅសហរដ្ឋ​អាមេរិកប្រមាណ ៦០០ ០០០ នាក់ឱ្យធ្វើការត្រឹមឆ្នាំ ២០៣០។

ក្រុមហ៊ុន Amazon ដែលជាក្រុមហ៊ុនឯកជនធំជាងគេទី២របស់​អាមេរិក​ មានបុគ្គលិកប្រហែល ១,៥៤ លាននាក់នៅទូទាំងពិភព​លោក​ ដែល​ភាគច្រើនធ្វើការនៅឃ្លាំង និងបុគ្គលិក​សាជីវកម្មប្រហែល ៣៥០ ០០០ នាក់។ ​ការបញ្ឈប់​បុគ្គលិកលើកនេះ គឺជាការ​ជម្រុះបុគ្គលិកពីវិស័យ​បច្ចេកវិទ្យាដ៏ធំបំផុតចាប់តាំងពីឆ្នាំ ២០២០។ នេះបើយោងតាមរបាយការណ៍របស់ Layoffs.fyi។

រាប់តាំងពីដើមឆ្នាំ ២០២៥ មក​ ក្រុមហ៊ុនបច្ចេកវិទ្យាអាមេរិក​ ជាង ២០០ បានកាត់បន្ថយការងារប្រហែល ៩៨ ០០០ កន្លែង​។ ក្រុមហ៊ុន Microsoft បានបញ្ឈប់បុគ្គលិកចំនួន ១៥ ០០០ នាក់់ ក្រុមហ៊ុន ​Meta ប្រហែល ៦០០ នាក់​ ក្រុមហ៊ុន Google ជាង ១០០ នាក់​ ក្រុមហ៊ុន Salesforce ៤ ០០០ នាក់​ និងក្រុមហ៊ុន Intel ២២ ០០០ នាក់។ ​

ឆ្នាំដ៏អាក្រក់បំំផុតដែល​ក្រុមហ៊ុនបច្ចេកវិទ្យាបញ្ឈប់បុគ្គលិក គឺឆ្នាំ ២០២៣ ដែល​ក្រុមហ៊ុនជិត ១ ២០០ បាន​បញ្ឈប់បុគ្គលិកសរុប ២៦០ ០០០ កន្លែង ដោយសារតែ​អតិផរណា និងអត្រាការប្រាក់ខ្ពស់៕