ឥណ្ឌូណេស៊ីគ្រោងរឹតត្បឹតវិដេអូហ្គេម ដូច​ PUBG ក្រោយផ្ទុះសាលាមួយ​នៅ​ហ្សាកាតា​

ប្រទេសឥណ្ឌូណេស៊ី កំពុងពិចារណារឹត​ត្បឹត​លើវិដេអូហ្គេម​ ដូចជា PUBG ​ក្រោយ​មាន​ការផ្ទុះនៅសាលារៀនមួយកន្លែងក្នុងទីក្រុងហ្សាកាតា ​បង្កឱ្យមនុស្ស ១០០ នាក់រងរបួស។ នេះបើតាមការចុះផ្សាយរបស់សារព័ត៌មាន​ Bloomberg នៅថ្ងៃចន្ទនេះ។

​ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បាន​ស្នើសុំឱ្យគណៈរដ្ឋមន្ត្រីរបស់លោកសិក្សាពីវិធានការដែលអាចធ្វើទៅបាន ជុំវិញការរឹតត្បឹតនេះ។ នេះបើ​តាមការឱ្យដឹង​របស់លោករដ្ឋលេខាធិការ Prasetyo Hadi កាលពីថ្ងៃអាទិត្យ ​ក្រោយ​ទទួលបានព័ត៌មានថ្មីៗអំពីការស៊ើបអង្កេតរបស់ប៉ូលិសពាក់ព័ន្ធករណីផ្ទុះសាលា​។

វិដេអូហ្គេម PUBG: Battlegrounds ដែលបង្កើតឡើងដោយក្រុមហ៊ុន​ Krafton របស់កូរ៉េខាងត្បូង គឺជាហ្គេមបាញ់ប្រហារតាម​អនឡាញ ដូចក្នុងសមរភូ​មិ ដោយអ្នក ឬក្រុមឈ្នះ ត្រូវសម្លាប់គូវិវាទចោល។ វិដេអូហ្គេមល្បីៗរដៀងគ្នាផ្សេងទៀតរួមមាន​ Fortnite និង Free Fire ​ជាដើម។ ពេលសួរថាវិដេហ្គេមណាខ្លះ នឹងរងចំណាត់ការ លោក Prasetyo បាន​និយាយចំឈ្មោះតែ PUBG ប៉ុណ្ណោះ។

លោកថ្លែងយ៉ាងដូច្នេះថា៖ «យើងកំពុងគិតអំពីការរឹតបន្តឹង ពីព្រោះ​ក្នុងហ្គេមទាំងនេះ មានអាវុធជាច្រើនប្រភេទផ្សេងៗគ្នា។ វាងាយស្រួលរៀន។ ខាង​ផ្នែកចិត្តសាស្ត្រ វាធ្វើឱ្យអំពើហិង្សាក្លាយជារឿងធម្មតា»។ ទោះបីជាយ៉ាងក៏ដោយ​ មន្រ្តីឥណ្ឌូណេស៊ីដដែល មិនបានបញ្ជាក់ពីការរឹតបន្តឹងបែបណា ឬពេលណានោះទេ។

គួរគូសបញ្ជាក់ថា មនុស្សជិត ១០០ នាក់ បានរងរបួសនៅក្នុងការផ្ទុះនៅវិហារសាលារៀនអ៊ិស្លាមមួយកន្លែងនៅភាគខាងជើងនៃទីក្រុងហ្សាកាតាកាលពីថ្ងៃសុក្រ ក្នុងអំឡុងពេលអធិស្ឋាន។ អាជ្ញាធរកំពុងស៊ើបអង្កេត​​លើ​សិស្សអាយុ ១៧ ឆ្នាំម្នាក់ ដែល​រងការចោទប្រកាន់​ថានៅពីក្រោយ​ការផ្ទុះនេះ។

ប៉ូលិសឥណ្ឌូណេស៊ី បានរកឃើញ​គ្រាប់រំសេវ និងសំណេរផ្សេងៗ​នៅផ្ទះរបស់ជនសង្ស័យដដែល​ ហើយ​រកមើលពីការជាប់ទាក់់ទងគ្នាទៅនឹង​ការផ្ទុះ។ ​ប៉ូលិសបាន​ច្រានចោលពីករណីភេរវកម្ម ដោយនិយាយថាសិស្សដែល​ជាជនសង្ស័យ ធ្លាក់ត្រូវបាន​គេធ្វើបាបនៅសាលា ហើយប្រហែលជា​ «គ្រោងទុកការវាយប្រហារអត្តឃាត» ដើម្បីសងសឹក។

ទោះបីជាយ៉ា់ងណាក៏ដោយ មិនមាន​ការបកស្រាយណាមួយ​ជាលម្អិត ថាតើវាជាប់ទាក់ទងគ្នាយ៉ាងណាទៅនឹង​វិដេអូហ្គេមបាញ់ប្រហារគ្នាតាមអនឡាញនោះទេ៕

​