​អាមេរិក​សិក្សា​សក្ដានុពលវិនិយោគ​នៅកម្ពុជា​

លោក ចាក ម៉ាយអ៊ិន (Jack Myint) ប្រធានប្រចាំតំបន់ទទួលបន្ទុកកម្ពុជា ឡាវ មីយ៉ានម៉ា ថៃ និង​វៀត​ណាម របស់ក្រុមប្រឹក្សាធុរកិច្ចអាមេរិក-អាស៊ាន បានកត់សម្គាល់ឃើញការរីក​ចម្រើនយ៉ាង​ឆាប់​រហ័ស​នៅកម្ពុជា ជាពិសេសលើវិស័យហេដ្ឋារចនាសម្ព័ន្ធ និងវត្តមានព្រលានយន្តហោះថ្មី។ ​

​លោក ចាក ម៉ាយអ៊ិន ​ (Jack Myint) ​បានលើកឡើងក្នុងពេលជួបពិភាក្សាការងារជាមួយ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅថ្ងៃទី ២៧ ខែវិច្ឆិកា ​អំឡូងពេលលោក ចាក ម៉ាយអ៊ិន បំពេញទស្សនកិច្ចនៅកម្ពុជា ដោយផ្តោតសំខាន់លើការលើកកម្ពស់ទំនាក់ទំនងស្ថាប័នទាំងពីរ និងការជំរុញពាណិជ្ជកម្ម និងវិនិយោគរវាងអាមេរិក និងកម្ពុជា។

​លោក ចាក ម៉ាយអ៊ិន សង្ឃឹមថា ទំនាក់ទំនងល្អប្រសើរនាពេលបច្ចុប្បន្ន រវាងកម្ពុជានិងអាមេរិក នឹងក្លាយជាកាលានុវត្តភាពបង្កលក្ខណៈងាយស្រួលដល់ការធ្វើធុរកិច្ចរវាងប្រទេសទាំងពីរ។ ក្នុងន័យនេះ លោកមានបំណងសិក្សាស្វែងយល់បន្ថែមពីសក្តានុពលវិនិយោគនៅកម្ពុជា និងចូលរួមជំរុញការដោះស្រាយបញ្ហាប្រឈម ក៏ដូចជាកង្វល់នានារបស់វិស័យឯកជន។

​អ្នកឧកញ៉ា គិត ម៉េង បានវាយតម្លៃខ្ពស់ចំពោះទំនាក់ទំនងដ៏ល្អប្រសើររវាង សភាពាណិជ្ជកម្មកម្ពុជា និងក្រុមប្រឹក្សាធុរកិច្ចអាមេរិក-អាស៊ាន អស់រយៈពេលជាច្រើនឆ្នាំមកហើយ ដោយស្ថាប័នទាំង​ពីរតែង​សហការគ្នារៀបចំព្រឹត្តិការណ៍ធុរកិច្ច ដើម្បីទាក់ទាញវិនិយោគិន និងជំរុញពាណិជ្ជកម្មទ្វេភាគី។

​អ្នកឧកញ៉ា គិត ម៉េង​ ក៏បានលើកឡើងពីទំនាក់ទំនងដ៏រឹងមាំរវាងកម្ពុជា និងអាមេរិក ជាពិសេស ការមានកិច្ចព្រមព្រៀងពន្ធគយបដិកា ដែលផ្តល់ទំនុកចិត្តខ្ពស់ដល់ធុរជននៃប្រទេសទាំងពីរ។ ​

សភាពាណិជ្ជកម្មកម្ពុជា និងក្រុមប្រឹក្សាធុរកិច្ចអាមេរិក-អាស៊ាន ត្រូវបន្តសហការគ្នាឱ្យកាន់​តែជិតស្និទ្ធ ដើម្បីផលប្រយោជន៍ និងវិបុលភាពនៃសហគមន៍ធុរកិច្ច ទាំងពីរ៕