សមាជិកសភាថៃរិះគន់រដ្ឋាភិបាលជុំវិញការផ្ដល់ជំនួយមិនស្មើគ្នា​រវាងជនរងគ្រោះភាគកណ្ដាល និងខាងត្បូង

សមាជិកសភាតំណាងរាស្រ្តខេត្តអយុធ្យា មកពីគណបក្សប្រជាជន​ លោក Tawiwong Totawiwong បានចោទប្រកាន់រដ្ឋាភិបាលរបស់លោកនាយករដ្ឋមន្រ្តី អានុទីន ឆានវីរៈគុន ថាបានអនុវត្តស្តង់ដារ ២ ​សម្រាប់ការឆ្លើយតប​គ្រោះទឹកជំនន់​ ដោយ​ខេត្តនានានៅតំបន់ភាគកណ្តាលដែលរងការ​លិច​លង់អស់រយៈពេលជាច្រើនខែនោះ មិន​ទទួលបាន​ជំនួយដូចគ្នាទៅនឹង​ប្រជាជនរងគ្រោះនៅខេត្តភាគខាងត្បូងនោះទេ។

លោក Tawiwong បាន​លើកឡើងថា មកទល់ពេលនេះ ខេត្តភាគខាងត្បូងថៃបានចូលដល់ដំណាក់កាលស្តារឡើងវិញរួចទៅហើយ ខណៈ​សហគមន៍ជាច្រើននៅខេត្តអយុធ្យា នៅតែបន្តលិចទឹក​អស់រយៈពេល ៤-៥ ខែមកហើយ ​ហើយចំនួនមនុស្សស្លាប់ក៏មាន​រហូតដល់ទៅ ២០ នាក់។ ​

សមាជិកសភាដដែលបាន​និយាយថា ​ប្រជាពលរដ្ឋនៅភាគកណ្ដាល​នៅតែបន្តប្រឈមមុខនឹងការលំបាក​ផ្សេងៗ​រយៈពេលយូរ រួមទាំងការរំខានដល់ជីវិតរស់នៅ ​កំណើនបំណុល​ ​ការខូចខាតលំនៅដ្ឋាន ការបិទសាលារៀន ​និងមជ្ឈមណ្ឌលសុខភាពសហគមន៍​ជាដើម។

ប៉ុន្តែផ្ទុយទៅវិញ លោក​បាន​ធ្វើការប្រៀបធៀបថា បណ្ដាខេត្តរងគ្រោះនៅទឹកជំនន់នាភាគខាងត្បូងប្រទេស បាន​ទទួលជំនួយរហ័ស និងទ្រង់់ទ្រាយធំ រួមទាំង​កញ្ចប់ស្តារឡើងវិញចំនួន ៥៣០ លានបាតសម្រាប់ខេត្តហាតយ៉ៃ និងសំណងបុណ្យសពចំនួន ២ លានបាត/គ្រួសារ នៅខេត្តសុងក្លា។ នៅតំបន់ភាគ​កណ្តាលឯណោះវិញ ​ប្រជាពលរដ្ឋរហូតមកដល់ពេលនេះ បានទទួលតែ​ជំនួយជាប្រាក់តែម្ដងគត់ ពេលទឹកជំនន់់ស្រកចុះ។​

លោក Tawiwong បាន​រិះគន់ទៀតថា ទឹកជំនន់​នៅអយុធ្យា បណ្ដាលមកពីការបរាជ័យយូរអង្វែងរបស់រដ្ឋាភិបាលក្នុងការអនុវត្តដំណោះស្រាយគ្រប់គ្រងទឹកប្រកបដោយចីរភាព។ លោកបានអំពាវនាវសុំការកែតម្រូវ​ជាបន្ទាន់ចំពោះក្របខ័ណ្ឌជំនួយសង្គ្រោះ ឱ្យបាន​ដូចគ្នាទៅនឹង​វិធានការ ដែលរដ្ឋាភិបាល​ផ្តល់ជូននៅខេត្តរងគ្រោះនៅភាគខាងត្បូង ​ដែលរួមបញ្ចូលទាំងការផ្អាកបំណុល និង​ការយកការប្រាក់ ការផ្ដល់កម្ចីគ្មានការប្រាក់ដល់គ្រួសារ និងអាជីវកម្ម ដើម្បីជួសជុលការខូចខាតឡើងវិញ និង​មូលនិធិស្តារ​ហេដ្ឋារចនាសម្ព័ន្ធសាធារណៈ និងលំនៅដ្ឋានជាដើម​។ ​

លោក Tawiwong បាន​បន្តទៀត​ថា ប្រជាជននៅខេត្តអយុធ្យា និងខេត្តអាងថង ដែលនៅជិតខាង ​បានស៊ូទ្រាំនឹងទឹកជំនន់អស់រយៈពេលជាច្រើនខែមក​ហើយ ដូច្នេះ ពួកគេ​​មិនគួរ​ត្រូវអង្គុយរង់ចាំជំនួយពេញដៃនោះទេ។ លោកបានជំរុញឱ្យរដ្ឋាភិបាល​ផ្តល់ជំនួយសង្គ្រោះដោយយុត្តិធម៌ និងទាន់ពេលវេលាដល់ខេត្តដែលរងផលប៉ះពាល់ទាំងអស់៕