ព័ត៌មានជាតិ

ច្រកអន្តរជាតិត្រពាំងក្រៀលជាប់ព្រំដែនឡាវ ទទួលភ្ញៀវទេសចរចេញចូលជាង ៩ ម៉ឺននាក់ក្នុងឆ្នាំ ២០២៥

បានផុស

៣ ខែ មុន

នៅ

ថ្ងៃសៅរ៍ ១០ មករា ២០២៦

ដោយ

ច្រកព្រំដែនអន្តរជាតិត្រពាំងក្រៀលក្នុងខេត្តស្ទឹងត្រែងដែលជាប់ជាមួយប្រទេសឡាវ នៅក្នុងឆ្នាំ ២០២៥ ទទួលបានអ្នកដំណើរចេញចូលចំនួន ៩២ ៩០៨ នាក់។ នេះបើតាមរបាយការណ៍បូកសរុបលទ្ធផលការងារឆ្នាំ ២០២៥ និងលើកទិសដៅការងារឆ្នាំ ២០២៦ របស់រដ្ឋបាលខេត្តស្ទឹងត្រែង។

របាយការណ៍បានបញ្ជាក់ថា ក្នុងចំណោមទេសចរចម្រុះជាតិសាសន៍ដែលធ្វើដំណើរចេញចូលឆ្លងកាត់តាមច្រកព្រំដែនអន្តរជាតិត្រពាំងក្រៀល ភ្ញៀវដែលធ្វើដំណើរចូលមានចំនួន ៥១ ២៧៧ នាក់ និងភ្ញៀវធ្វើដំណើរចេញមានចំនួន ៤១ ៦៣១ នាក់។

ក្រៅពីភ្ញៀវធ្វើដំណើរចេញចូល សម្រាប់មធ្យោបាយឆ្លងកាត់មានរថយន្តចូលចំនួន ៤ ៥២៣ គ្រឿង និងរថយន្តចេញចំនួន ៤ ២៩៩ គ្រឿង។

ខេត្តស្ទឹងត្រែងមានភូមិសាស្ត្រជាប់ជាមួយប្រទេសឡាវ។ ជាមួយសក្ដានុពលទេសចរណ៍ធម្មជាតិ មានដងទន្លេចំនួន ៤ ហូរកាត់ ជាពិសេសមានសត្វផ្សោតមេគង្គដ៏កម្រនៅក្នុងពិភពលោក ខេត្តស្ទឹងត្រែងទាក់ទាញការចាប់អារម្មណ៍ពីភ្ញៀវជាតិនិងអន្តរជាតិមកទស្សនា ខណៈផលិតផលទេសចរណ៍ខេត្តភូមិភាគឦសានមួយនេះភាគច្រើនពឹងផ្អែកទេសចរណ៍បែបវប្បធម៌-ធម្មជាតិ និងកសិទេសចរណ៍។

ខេត្តមានតំបន់ទេសចរណ៍ចំនួន ២០ កន្លែង ជាគោលដៅទាក់ទាញទេសចរមកកម្សាន្ត។ នេះបើតាមមន្ទីរទេសចរណ៍ខេត្ត។

ក្នុងឆ្នាំ ២០២៥ ខេត្តស្ទឹងត្រែងទទួលបានទេសចរមកកម្សាន្តជាង ៥០ ម៉ឺននាក់កើនឡើង ៨៨% បើធៀបឆ្នាំ២០២៤។៕