សេដ្ឋកិច្ច

ទំនិញថៃនាំចូលមកកម្ពុជា ធ្លាក់ចុះជិត ៥០% នៅខែមករា

បានផុស

៤ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

ការដោះដូរទំនិញកម្ពុជា-ថៃ សម្រេចបាននូវទំហំទឹកប្រាក់ចំនួន ២០៩ លានដុល្លារ នៅក្នុងខែមករា ឆ្នាំ ២០២៦ ធ្លាក់ចុះ ៤៣,៥% ប្រៀបធៀបរយៈពេលដូចគ្នានៅឆ្នាំ ២០២៥ ក្នុងនោះកម្ពុជានាំចេញទៅថៃមានតម្លៃ ៥៨ លានដុល្លារ ធ្លាក់ចុះ ១៩,៦% ចំណែកឯថៃនាំចូលមកវិញមានតម្លៃ ១៥១ លានដុល្លារ ធ្លាក់ចុះ ៤៩,៣%។ នេះបើយោងតាមអគ្គនាយករដ្ឋានគយ និងរដ្ឋាករកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម មានប្រសាសន៍ថា ការដោះដូរទំនិញកម្ពុជា-ថៃ បានធ្លាក់ចុះ បន្ទាប់ពីបិទព្រំដែនគោក កាលពីឆ្នាំមុន។

អ្នកនាំពាក្យក្រសួងពាណិជ្ជកម្មបានបញ្ជាក់ថា ក្រៅពីទំនិញដែលកម្ពុជា ហាមឃាត់ មានបន្លែ ផ្លែឈើ អគ្គិសនី ប្រេង និងឧស្ម័ន ពាណិជ្ជកម្មរវាងកម្ពុជា និងថៃ នៅដំណើរការធម្មតា ពោលគឺភាគីថៃបានបង្វែរទិសនាំទំនិញចូលមកតាមផ្លូវទឹក (ច្រកសមុទ្រ)។

ទោះបីជាពាណិជ្ជកម្មទ្វេភាគីកម្ពុជា-ថៃ ធ្លាក់ចុះ ប៉ុន្តែពាណិជ្ជកម្មអន្តរជាតិកម្ពុជា នៅតែមានភាពល្អប្រសើរ ដោយសម្រេចបានកំណើន ១៨% កាលពីឆ្នាំមុន ឆ្លុះបញ្ចាំងពីការរក្សាបានទីផ្សារសំខាន់ៗរបស់ខ្លួន ធានារនូវការផ្គត់ផ្គង់ ក្នុងខ្សែច្រវាក់តម្លៃ និងខ្សែច្រវាក់ផ្គត់ផ្គង់។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-ថៃ សម្រេចបាននូវទំហំទឹកប្រាក់ ៣,៦៥ ពាន់លានដុល្លារ ធ្លាក់ចុះ ១៤,៨៦% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅថៃ ៧៣២ លានដុល្លារ ធ្លាក់ចុះ ១៤,១៥% ចំណែកថៃនាំចូលមកវិញមានតម្លៃ ២,៩ ពាន់លានដុល្លារ ធ្លាក់ចុះ ១៥%៕

អត្ថបទ៖ ឡេង ដេត