ព័ត៌មានអន្ដរជាតិ

ឥណ្ឌូណេស៊ីពិចារណាគោលនយោបាយធ្វើការពីផ្ទះ ដើម្បីកាត់បន្ថយការប្រើប្រាស់ប្រេង

បានផុស

៤ ខែ មុន

នៅ

ថ្ងៃពុធ ១៨ មីនា ២០២៦

ដោយ

រដ្ឋមន្ត្រីថាមពលឥណ្ឌូណេស៊ី បានឱ្យដឹងកាលពីថ្ងៃអង្គារ (១៧ មីនា) ថា ប្រទេសឥណ្ឌូណេស៊ីកំពុងពិចារណាលើគោលនយោបាយធ្វើការពីផ្ទះ ដើម្បីកាត់បន្ថយការប្រើប្រាស់ប្រេងឥន្ធនៈ ចំពេលពិភពលោក ជាពិសេសអាស៊ីអាគ្នេយ៍ ធ្លាក់ចូលទៅក្នុងវិបត្តិខ្វះប្រេងផ្គត់ផ្គង់ ដោយសារតែជម្លោះនៅមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មាន Antara។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រី Bahlil Lahadalia បាននិយាយថា រដ្ឋាភិបាលកំពុងពិនិត្យឡើងវិញនូវជម្រើសគោលនយោបាយជាច្រើន រួមទាំងការរៀបចំការធ្វើការពីចម្ងាយ ដែលជាផ្នែកមួយនៃកិច្ចខិតខំប្រឹងប្រែងធំ ដើម្បីកាត់បន្ថយតម្រូវការប្រេងឥន្ធនៈ។ លោកនិយាយថា «ធ្វើការពីផ្ទះ» គឺជាជម្រើសដែលអាចទៅរួច ដើម្បីសន្សំសំចៃប្រេងឥន្ធនៈ។

ទោះបីជាមានកង្វល់ពីកង្វះខាតក្ដី លោក Lahadalia បានធានាថា ប្រេងសាំង ឧស្ម័ន LPG (ហ្គាស) និងរោងចក្រដើរដោយធ្យូងថ្ម នៅតែអាចមានផ្គត់ផ្គង់ក្នុងស្រុកគ្រប់គ្រាន់ពេញមួយរដូវកាលបុណ្យ Eid al-Fitr ឆ្នាំ ២០២៦។

លោករដ្ឋមន្ត្រីបានបន្ថែមថា រដ្ឋាភិបាលមានគម្រោងរក្សាការឧបត្ថម្ភធនប្រេងឥន្ធនៈយ៉ាងហោចណាស់រហូតដល់ចុងបញ្ចប់នៃរដូវបុណ្យទាន ហើយនឹងពិនិត្យឡើងវិញនូវទុនបម្រុងថាមពលក្រោយខែមីនា។

លោក Lahadalia បានសម្តែងសុទិដ្ឋិនិយមដោយប្រុងប្រយ័ត្នអំពីស្ថិរភាពថាមពលសកល ដោយលើកឡើងពីសញ្ញាដែលថា អ៊ីរ៉ង់អាចអនុញ្ញាតឱ្យនាវាដឹកប្រេងពីប្រទេសនានា ក្រៅពីអ៊ីស្រាអែល និងសហរដ្ឋអាមេរិក ឆ្លងកាត់ច្រកសមុទ្រហ័រមូហ្ស បានដោយសុវត្ថិភាព។

គេមើលឃើញថា ការឱ្យដឹងយ៉ាងដូច្នេះ ធ្វើឡើងបន្ទាប់ពីលោកប្រធានាធិបតី ប្រាបូវូ ស៊ូប៊ីយ៉ានតូ បានអំពាវនាវឱ្យមានវិធានការជាមុន ដើម្បីការពារសន្តិសុខថាមពលជាតិ។ លោកបានជំរុញឱ្យរដ្ឋមន្ត្រីពិចារណាលើគោលនយោបាយធ្វើការពីផ្ទះ ដោយរំឭកថា ការរឹតបន្តឹងការធ្វើដំណើរក្នុងអំឡុងវិបត្តិកូវីដ១៩ បានជួយឥណ្ឌូណេស៊ីឱ្យកាត់បន្ថយការប្រើប្រាស់ប្រេងឥន្ធនៈយ៉ាងច្រើន។

ឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍ នៅតែងាយរងគ្រោះដោយសារបញ្ហាថាមពលអន្តរជាតិភ្លាមៗ ដោយសារតែការពឹងផ្អែកខ្លាំងលើទីផ្សារប្រេងសកល ទោះបីជាមានកិច្ចខិតខំប្រឹងប្រែងជាបន្តបន្ទាប់ដើម្បីពង្រឹងភាពធន់ក្នុងស្រុកក៏ដោយ៕