​ចំណូល​ពន្ធដារ ​សម្រេច​បាន​ជាង ១,៧ ​ពាន់លានដុល្លារ កើនជាង ៤៦% ​ត្រឹម​រយៈពេល​ ៤ ខែ ឆ្នាំនេះ​

អគ្គនាយកដ្ឋានពន្ធដារ​ ប្រមូលចំណូលបានជាង​ ១,៧៨ ​ពាន់លានដុល្លារ ​នៅក្នុងរយៈពេល ៤ ខែ (មករា-មេសា) ២០២៦ កើនឡើង ៤៦,៧៥% ធៀបនឹងរយៈពេលដូចគ្នា​កាលពីឆ្នាំមុន​។ នេះ​បើ​យោង​តាមរបាយការណ៍​របស់​អគ្គនាយកដ្ឋានពន្ធដារចេញផ្សាយនៅថ្ងៃទី ២១ ឧសភា ២០២៦​។​

​លោក អូន ព័ន្ធមុនីរ័ត្ន ​ឧបនាយករដ្ឋមន្ត្រី ​រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍​ថា អគ្គនាយកដ្ឋានពន្ធដារ​ កំពុងដើរតួនាទីយ៉ាងសំ​ខាន់ក្នុងការប្រមូល​ចំណូលជូនរដ្ឋ ​និង​រួមចំណែក​ជំរុញ​ការអភិវឌ្ឍគ្រប់វិស័យ ​ក្នុង​ការ​គាំទ្រ​ដល់វិស័យឯកជន ​ដែល​ជា​ក្បាល​ម៉ាស៊ីន​ដ៏ចាំបាច់​នៃកំណើនសេដ្ឋកិច្ច ​និង​ជាឆ្អឹងខ្នង​នៃការ​អភិវឌ្ឍសង្គមជាតិ។​

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅក្នុងពិធីសម្ពោធ​អគារទីស្នាក់ការកណ្តាល​របស់​អគ្គ​នាយកដ្ឋាន​ពន្ធដារនៅថ្ងៃទី ២១ ឧសភា ២០២៦ថា ការកៀរគរប្រមូលពន្ធ គឺជាការចាំបាច់ក្នុងការគាំទ្រដល់កិច្ចដំណើរការ និងការអភិវឌ្ឍសង្គម សេដ្ឋកិច្ចជាតិ។

សម្ដេចធិបតីបានបន្ថែមថា នៅទសវត្សរ៍ចុងក្រោយនេះ ជាមួយនឹងកំណើនសេដ្ឋកិច្ច ចំណូលពន្ធដារ មានការកើនឡើង​គួឱ្យកត់សម្គាល់ ដែលការណ៍នេះ បានអនុញ្ញាតឱ្យរាជរដ្ឋាភិបាលមានលទ្ធភាពក្នុងការកសាងហេដ្ឋារចនាសម្ព័ន្ធសំខាន់ៗ ដូចជាផ្លូវថ្នល់ ស្ពាន អគារ សាលារៀន មន្ទីរពេទ្យជាដើម នៅទូទាំងប្រទេស។

សម្ដេច ហ៊ុន ម៉ាណែត បញ្ជាក់ថា៖ «ចំណូលពន្ធដារ ក៏បានអនុញ្ញាតឱ្យរាជរដ្ឋាភិបាល អាចកៀរគរទុនជាប្រាក់សន្សំ សម្រាប់ប្រើប្រាស់ក្នុងការអនុវត្ត វិធានការនានា ដើម្បីជម្នះនូវរាល់បញ្ហាប្រឈម និងអាចសម្របខ្លួនទៅតាមការប្រែប្រួលនៃសភាពការណ៍ក្នុងតំបន់ និងសាកលលោក ដែលបានកើតឡើងជាបន្តបន្ទាប់ សំដៅការពារអធិបតេយ្យភាព បូរណ​ភាពទឹកដី រក្សាលំនឹងជីវភាពប្រជាជន ស្ថិរភាពម៉ាក្រូសេដ្ឋកិច្ច ព្រមទាំងប្រែក្លាយបញ្ហាទាំងនោះទៅជាកាលានុវត្តភាពសម្រាប់ប្រទេសជាតិ»។ សម្រាប់ឆ្នាំ ២០២៦ ​អគ្គនាយករដ្ឋានពន្ធដារ ​គ្រោង​​ប្រមូល​ពន្ធគយ​ឱ្យ​បាន​ ៣,៨ ​ពាន់​លានដុល្លារ​៕

អត្ថបទ៖ ឡេង ដេត