សេដ្ឋកិច្ច

ចំណូលលក់សំបុត្រចូលទស្សនាអង្គរបានជាង ១៧ លានដុល្លារ នៅក្នុងរយៈពេល ៥ ខែ ឆ្នាំនេះ

បានផុស

១ ខែ មុន

នៅ

ថ្ងៃចន្ទ ១ មិថុនា ២០២៦

ដោយ

កម្ពុជារកចំណូលបានជាង ១៧,២ លានដុល្លារ ពីការលក់សំបុត្រចូលទស្សនារមណីយដ្ឋានអង្គរនៅក្នុងរយៈពេល ៥ ខែ (មករា-ឧសភា) ២០២៦ ធ្លាក់ចុះជិត ៣០% ធៀបនឹងរយៈពេលដូចគ្នា នៅឆ្នាំ ២០២៥។ នេះបើយោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃចន្ទទី ០១ មិថុនា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់គ្រឹះស្ថានអង្គរបង្ហាញថា គិតចាប់ពីខែមករា ដល់ខែឧសភា ២០២៦ ភ្ញៀវទេសចរអន្តរជាតិចំនួនជាង ៣៥ ម៉ឺននាក់ (៣៥៩ ៤៧១) បានទិញសំបុត្រចូលទស្សនារមណីយដ្ឋានអង្គរដែលនាំឱ្យកម្ពុជារកចំណូលបានជាង ១៧ ២០៤ ៣២២ ដុល្លារ ធ្លាក់ចុះ ២៩,៩៨%។

លោក ខៀវ ធី ប្រធានសមាគមមគ្គុទ្ទេសក៍អង្គរខេត្តសៀមរាប មានប្រសាសន៍ថា បញ្ហាសង្គ្រាមព្រំដែនកម្ពុជា-ថៃ និងការបារម្ភពីការឆបោកអនឡាញបានធ្វើឱ្យភ្ញៀវទេសចរចូលមកទស្សនាក្នុងខេត្តសៀមរាបធ្លាក់ចុះ។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) យល់ឃើញថា កម្ពុជារងសម្ពាធធ្ងន់ធ្ងរកាលពីឆ្នាំមុន បន្ទាប់ពីជំងឺកូវីដ១៩ ដោយសារការចោទប្រកាន់ពីការឆបោកអនឡាញ និងការឈ្លានពានពីប្រទេសថៃ។ «ភូមិសាស្ត្រនយោបាយកំពុងកើតមានឡើងនៅលើពិភពលោក ពិភពលោក អ្វីក៏អាចកើតមានឡើងគ្រប់ពេលវេលា យើងអត់ដឹងថា តើថ្ងៃស្អែកមានអ្វីកើតឡើង»។ លោក ស៊ីណាន បន្ថែមបែបនេះ។