សេដ្ឋកិច្ច

ភ្ញៀវទេសចរជាង ៨០ ម៉ឺននាក់ ទិញសំបុត្រចូលទស្សនាអង្គរ និងរកចំណូលបានជាង ៤០ លានដុល្លារ

បានផុស

៧ ខែ មុន

នៅ

ថ្ងៃចន្ទ ១ ធ្នូ ២០២៥

ដោយ

ភ្ញៀវទេសចរអន្តរជាតិចំនួនជាង ៨៦ ម៉ឺននាក់ (៨៦៧ ១៩៥) បានទិញសំបុត្រចូលទស្សនារមណីយដ្ឋានអង្គរ ដែលនាំឱ្យកម្ពុជារកចំណូលបាន ៤០ ៤៨០៩៤៥ ដុល្លារ នៅក្នុងរយៈពេល ១១ ខែ ឆ្នាំ ២០២៥ ធ្លាក់ចុះ ៣,៤១% ប្រៀបធៀបនឹង រយៈពេលដូចគ្នានៅឆ្នាំ ២០២៤។ នេះបើយោងតាមរបាយការណ៍របស់គ្រឹះស្ថានអង្គរ ចេញផ្សាយនៅថ្ងៃទី ០១ ខែធ្នូ ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការរបស់គ្រឹះស្ថានអង្គរបង្ហាញថា សម្រាប់តែមួយខែវិច្ឆិកា ឆ្នាំ ២០២៥ ភ្ញៀវទេសចរចំនួនជាង ១០ ម៉ឺននាក់ (១០១ ៦៧៧) បានទិញសំបុត្រចូលទស្សនាអង្គរ ដែលគិតជាចំណូលប្រមាណជិត ៥ លានដុល្លារ (៤ ៩០៥ ១៦៤) ធ្លាក់ចុះ ១៧,១៥% ធៀបនឹងខែវិច្ឆិកា ឆ្នាំមុន។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) ប្រាប់កម្ពុជាថ្មីថា ដោយសារតែភូមិសាស្ត្រនយោបាយបង្កើតឱ្យមានកម្ដៅភ្លើងរវាងកម្ពុជា-ថៃ រហូតបង្កទៅដល់ការបិទព្រំដែន ធ្វើឱ្យទេសចរកម្ពុជាធ្លាក់ចុះ។

លោកថា កត្តាសេដ្ឋកិច្ចសាកលក៏ជះឥទ្ធិពលដល់កំណើនភ្ញៀវទេសចរ ដូចជាចិន ក៏បានកាត់បន្ថយការធ្វើដំណើរ ខណៈប្រទេសដែលធ្លាប់តែទទួលទេសចរចិនក៏មានការធ្លាក់ចុះដែរ ហើយទេសចរអឺរ៉ុប ក៏កាត់បន្ថយដំណើរផ្លូវឆ្ងាយ ដោយសារតែកត្តាសេដ្ឋកិច្ច ជំងឺឆ្លង និងគ្រោះធម្មជាតិ។

លោក ធួន ស៊ីណាន យល់ឃើញថា ការធ្លាក់ចុះកម្រិតនេះ មិនអាក្រទេ សម្រាប់កម្ពុជា តែអ្វីដែលយើងត្រូវធ្វើគឺរដ្ឋ និងឯកជនត្រូវសហការគ្នារួមគ្នាផ្សព្វផ្សាយ ដូរពីទម្លាប់ពឹងដង្ហើមអ្នកដ៏ទៃដក ប្ដូរមកដកដង្ហើមខ្លួនឯងវិញ។

យោងតាមធនាគារអភិវឌ្ឍន៍អាស៊ី (ADB) វិស័យទេសចរណ៍បង្ហាញពីការបន្តងើបឡើងវិញនៅក្នុងឆមាសទីមួយឆ្នាំ ២០២៥ ជាមួយនឹងការកើនឡើងនៃចំនួនភ្ញៀវទេសចរពីសាធារណៈរដ្ឋប្រជាមានិតចិន។

ប៉ុន្តែភាពតានតឹងនៅតាមព្រំដែនជាមួយប្រទេសថៃដែលកំពុងបន្តកើតមាន នឹងរំខានដល់វិស័យទេសចរណ៍ និងសកម្មភាពនានាក្នុងវិស័យសេវាកម្មទូទៅនៅក្នុងឆមាសទីពីរនៃឆ្នាំនេះ និងពេលខាងមុខ៕

អត្ថបទ៖ ឡេង ដេត