សេដ្ឋកិច្ច

កម្ពុជា នាំចេញទៅវៀតណាមបានជាង ២,៥ ពាន់លានដុល្លារ កើនឡើងជិត ១៥% នៅឆមាសទី១

បានផុស

៣ នាទី មុន

នៅ

ថ្ងៃចន្ទ ១៣ កក្កដា ២០២៦

ដោយ

កម្ពុជាទទួលបានប្រាក់ចំណូលជាង ២,៥ ពាន់លានដុល្លារ ពីការនាំចេញទំនិញទៅប្រទេសវៀតណាម នៅក្នុងឆមាសទី១ ២០២៦ កើនឡើង ១៤,៩% ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់អគ្គនាយករដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ GDCE បង្ហាញថា គិតចាប់ពីខែមករា ដល់ខែមិថុនា ២០២៦ ទំហំពាណិជ្ជកម្មទ្វេភាគីកម្ពុជា-វៀតណាម មានទឹកប្រាក់ ៤,៧២ ពាន់លានដុល្លារ កើនឡើង ៩% ក្នុងនោះកម្ពុជានាំចេញទៅប្រទេសវៀតណាមមានតម្លៃ ២,៥២ ពាន់លានដុល្លារ កើនឡើង ១៤,៩% ចំណែកវៀតណាមនាំចូលមកវិញមានតម្លៃ ២,២០ ពាន់លានដុល្លារ កើនឡើង ២,៩%។

ផលិតផលសំខាន់ៗ របស់កម្ពុជា នាំចេញទៅប្រទេសវៀតណាម រួមមាន ស្រូវ កៅស៊ូ ស្វាយចន្ទី ដំឡូងមី ពោត ចេក ស្វាយ ថ្នាំជក់ ចំណែកឯវៀតណាមនាំចូលមកវិញ មានរួមមាន សម្ភារសំណង់ គ្រឿងម៉ាស៊ីន ប្រេងឥន្ធនៈ ឧបករណ៍អេឡិចត្រូនិក-អគ្គិសនី ជីកសិកម្ម គ្រឿងទេស និងបន្លែ ផ្លែឈើ។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន មានប្រសាសន៍ថា សេដ្ឋកិច្ចរបស់ប្រទេសវៀតណាមមានកំណើន បានជំរុញឱ្យមានតម្រូវការខ្ពស់ជាងមុន ខណៈតម្លៃកសិកផលរបស់កម្ពុជាយើងមានភាពប្រកួតប្រជែង។

រាជរដ្ឋាភិបាលកម្ពុជា បន្តដាក់ចេញវិធានការ ដើម្បីបង្កើនទំហំពាណិជ្ជកម្មទ្វេភាគីជាមួយវៀតណាមឱ្យឈានដល់គោលដៅ ២០ ពាន់លានដុល្លារ។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មកម្ពុជា-វៀតណាម សម្រេចបានទឹកប្រាក់ ៧,៧ ពាន់លានដុល្លារ ធ្លាក់ចុះជិត ១% ធៀបនឹងឆ្នាំ ២០២៤ ដែលមានទំហំ ៧,៨ ក្នុងនោះកម្ពុជានាំចេញទៅវៀតណាមមានទំហំទឹកប្រាក់ប្រមាណ ៣,៧២ ពាន់លានដុល្លារ កើនឡើង ០,៨២% ចំណែកឯវៀតណាមនាំចូលមកវិញ មានតម្លៃ ៤ ពាន់លានដុល្លារ ធ្លាក់ចុះ ២,៥៣%៕

អត្ថបទ៖ ឡេង ដេត

Related Topics:ពាណិជ្ជកម្មកម្ពុជា-វៀតណាម